A o A Gakologelwa?

A o ile wa itumelela go bala dimakasine tsa bosheng tsa Tora ya Tebelo? Fa go ntse jalo, bona gore a o ka kgona go araba dipotso tse di latelang:

• Ke eng fa dipotso tse di bodiwang mo kgaolong ya 38 ya Jobe di tlhoka go akanyediwa le e leng gompieno?

Bontsi jwa ditiro tse di gakgamatsang tse Modimo a batlang gore di elwe tlhoko ga di tlhaloganngwe ka botlalo le e leng ke baitsesaense ba gompieno. Ditiro tseno di akaretsa ntlha ya gore maatlakgogedi a boloka lefatshe jang le le mo modikologong wa lone, gore lesedi ke eng tota, ke eng fa go na le dipopego tse dintsintsi jaana tsa manathwana a kapoko, kafa marothodi a pula a bopegang ka teng le kafa maatla a dirang ka teng mo tumong ya maru.—4/15, ditsebe 4-11.

• Ke dikao dife tsa Baebele tse di ka re thusang go fenya maikutlo a a sa siamang?

Asafe, Baruke le Naomi ba ne ba lebana le dinako tse ka tsone ba neng ba kgobega marapo kana ba nna le maikutlo a mangwe a a sa siamang ka tsone mme pego ya Dikwalo e e bontshang kafa ba ileng ba atlega ka gone go fenya maemo a a ntseng jalo e ka re thusa.—4/15, ditsebe 22-4.

• Dingwe tsa ditsela tse di molemo tse batlholagadi ba Bakeresete ba ka thusiwang ka tsone ke dife?

Ditsala di ka ithaopa ka bopelotshweu le ka tsela e e tlhamaletseng. Maloko a lelapa kana ba bangwe ba ka ithaopa go thusa ka tsa madi kana ka dilo tse di bonalang, fa go tlhokega tota. Bakeresete ba bangwe le bone ba ka thusa ka go nna botsalano, ba mo tshegetse ka dilo tsa semoya le go mo gomotsa.—5/1, ditsebe 5-7.

• Ke ka ntlha yang fa go le botlhokwa go nyala “mo Moreneng fela” jaaka 1 Bakorintha 7:39 e gakolola?

Gantsi manyalo a batho ba ba nyalaneng le batho ba e seng badumedi a nnile le masetlapelo. Mo godimo ga moo, go latela kgakololo eno ya bomodimo ke kgang ya go ikanyega mo go Jehofa Modimo. Fa re dira go ya ka Lefoko la Modimo, dipelo tsa rona ga di re bone molato. (1 Johane 3:21, 22)—5/15, ditsebe 20-1.

• E re ka e le Jehofa yo o itshwarelang maleo a rona, ke eng fa Bakeresete ba tshwanetse go ipolela maleo a bone a a masisi mo bagolwaneng ba phuthego?

Ee, Mokeresete o tshwanetse go kopa Jehofa gore a mo itshwarele boleo jo bo masisi. (2 Samuele 12:13) Mme fela jaaka moporofeti Nathane a ile a thusa Dafide, bagolwane ba ba godileng mo phuthegong ba ka thusa baleofi ba ba ikwatlhayang. Go ya kwa bogolwaneng go tsamaisana le kaelo e e neetsweng mo go Jakobe 5:14, 15.—6/1, tsebe 31.

• Go na le bosupi bofe jwa gore re tshwanetse go tlhokomela dikhutsana le batlholagadi ba ba tlhokang?

Pego ya ditiragalo e bontsha gore go neela tlhokomelo e e ntseng jalo e ne e le nngwe ya dilo tse di neng di tlhaola kobamelo ya boammaaruri go Bahebera ba bogologolo le mo Bakereseteng ba bogologolo. (Ekesodo 22:22, 23; Bagalatia 2:9, 10; Jakobe 1:27) Moaposetoloi Paulo o ne a akaretsa mo Dikwalong dikaelo tse di tlhamaletseng tsa gore Bakeresete ba tlhokomele batlholagadi ba ba tlhokang. (1 Timotheo 5:3-16)—6/15, ditsebe 9-11.

• Tsela e e molemolemo ya go bona botshelo jo bo itumetseng le jo bo nang le bokao ke efe?

Re tshwanetse go tlhagolela botsalano jo bo siameng le Jehofa, Rraarona wa selegodimo. Go ithuta Baebele ke tsela e e botlhokwa ya go re thusa go dira jalo.—7/1, ditsebe 4-5.

• A motho mongwe le mongwe o na le moya o o sa sweng o o tswelelang o tshela morago ga loso?

Le fa bangwe ba dumela gore moya (spirit)—e seng moya (soul)—ga o swe, Baebele ga e tshegetse kgopolo eo. E bontsha gore fa motho a swa, o boela mo leroleng mme ga a tlhole a le gone. Mme Modimo o dula a ntse a na le maatla a go mmusetsa mo botshelong, ka gone tsholofelo epe fela ya botshelo jwa isagwe, ka go tsosiwa mo losong, e ikaegile ka Modimo. (Moreri 12:7)—7/15, ditsebe 3-6.

• Daniele o ne a le kae fa Bahebera ba bararo ba ne ba lekiwa kwa lebaleng la Dura?

Baebele ga e bolele. Go ka nna ga direga gore Daniele o ne a sa patelesege go nna gone ka ntlha ya maemo a gagwe, kana o ka tswa a ne a ile go dira tiro nngwe ya puso golo gongwe go sele. Mme le fa go ntse jalo, re ka tlhomamisega gore ga a ka a tlogela go ikanyega mo go Jehofa.—8/1, tsebe 31.