Dipotso Tse di Tswang Kwa Babading

Jobe o ile a boga nako e kana kang?

Batho bangwe ba akanya gore diteko tsa ga Jobe di ile tsa tsaya dingwaga di le dintsi, mme buka ya Jobe ga e bontshe gore o ile a boga nako e telele jalo.

Go bonala fa karolo ya ntlha ya diteko tsa ga Jobe, e leng go latlhegelwa ke maloko a lelapa la gagwe le dithoto, go tsere lobaka lo lokhutshwane thata. Re bala jaana: “Jaanong ya nna letsatsi le bomorwawe le bomorwadie [Jobe] ba neng ba ja e bile ba nwa beine mo ntlong ya ga morwarraabone wa leitibolo.” Jobe o ne a amogela dipego ka go latelana gore o latlhegetswe ke dilo—dikgomo tsa gagwe, diesele tsa gagwe, dinku tsa gagwe, dikamela tsa gagwe le batlhanka ba ba neng ba tlhokomela diphologolo tseo. Go bonala e ne ya re ka bonako morago ga foo Jobe a utlwa ka loso lwa bomorwawe le bomorwadie, ba ba neng ba “ja e bile ba nwa beine mo ntlong ya ga morwarraabone wa leitibolo.” Go bonala fa dilo tseno tsotlhe di diragetse ka letsatsi le le lengwe.—Jobe 1:13-19.

Karolo e e latelang ya diteko tsa ga Jobe e tshwanetse ya bo e ile ya tsaya nako e e oketsegileng. Satane o ne a atamela Jehofa mme a bolela gore Jobe o tla palelwa fa a ne a boga ka boene—mo mmeleng wa gagwe. Jobe o ne a itewa ka “ditlhagala tse di kotsi go simolola kwa patong ya lonao lwa gagwe go fitlha kwa phogong ya tlhogo.” Gore bolwetse jono bo aname mo mmeleng wa gagwe otlhe go ka tswa go ile ga tsaya nako. Mme go ka tswa go ile ga tsaya nako gore dikgang tsa “masetlapelo ano otlhe” di fitlhe kwa bathong ba ba ileng ba tla kwa go ene, ba ba neng ba ipitsa bagomotsi ba gagwe.—Jobe 2:3-11.

Elifase o ne a tswa kwa Temane kwa nageng ya Edoma mme Sofare ene o ne a tswa kwa karolong ya bokonebophirima jwa Arabia, ka gone, dinagagae tsa bone di ne di se kgakala le kwa Jobe a neng a le gone kwa Usa, e e ka tswang e ne e le ntlheng ya bokone jwa Arabia. Le fa go ntse jalo, Biledade e ne e le Moshuha mme go dumelwa gore batho ba gaabo ba ne ba nna go bapa le noka ya Euferatese. Fa e le gore Biledade o ne a le kwa gae ka nako eo, go ka tswa go ile ga tsaya dibeke kana dikgwedi gore a utlwe ka seemo sa ga Jobe le go tsaya loeto lwa go ya Usa. Gone mme, go ka direga gore banna ba bararo bano ba bo ba ne ba le gaufi le mo Jobe a nnang teng fa a simolola go boga. Mme gone, fa ditsala tse tharo tsa ga Jobe di fitlha, ba ne “ba nna ba ntse le ene fa fatshe malatsi a le supa le masigo a le supa” ba sa bue sepe.—Jobe 2:12, 13.

Morago ga foo go ne ga latela karolo ya bofelo ya diteko tsa ga Jobe, tseo ditlhaloso tsa tsone di tlatsang dikgaolo tse dintsi tsa buka eo. Go nnile le dikganetsano kana dipuisano di le dintsi tse batho ba ba neng ba ipitsa bagomotsi ba neng ba nna le tsone mme gantsi Jobe o ne a araba. Fa di sena go fela, lekawana le go tweng ke Elihu le ne la ba kgalemela mme Jehofa o ne a kgalemela Jobe go tswa kwa magodimong.—Jobe 32:1-6; 38:1; 40:1-6; 42:1.

Ka gone, go boga ga ga Jobe le go fedisiwa ga gone go ka tswa go ile ga direga mo dikgweding di sekae, gongwe e le nako e e kwa tlase ga ngwaga. O ka tswa o itse go ya ka se se go diragaletseng gore diteko tse di boima di bonala di nnela ruri. Le fa go ntse jalo, ga re a tshwanela go lebala gore di a fela, fela jaaka tsa ga Jobe. Go sa kgathalesege gore diteko tse re lebanang natso di tsaya nako e e kana kang, a re gakologelwe gore Modimo o a re tshegetsa, jaaka go tlhalosiwa mo mafokong ano a a tlhotlheleditsweng: “Gone le fa pitlagano e le ya nakwana e bile e le motlhofo, e re bakela kgalalelo ya bokete jo bogolo thata e bile e le e e sa khutleng.” (2 Bakorintha 4:17) Moaposetoloi Petere o ne a kwala jaana: “Fa lo sena go boga ka lobakanyana, Modimo wa bopelonomi jotlhe jo bo sa re tshwanelang, yo o neng a lo biletsa kgalalelong ya gagwe e e sa khutleng seoposengweng le Keresete, ene ka boene o tla wetsa thapiso ya lona, o tla lo nitamisa, o tla lo nonotsha.”—1 Petere 5:10.