Setifikeite sa Bonatla

SEO ke se Mokgatlho wa Tlhabololo ya Babegadikgang ba Congo le ba Afrika (AJOCAD) kwa Democratic Republic of Congo o se nayang go “duela batho kana mekgatlho e e supang bokgoni jwa yone jwa go thusa mo tlhabololong ya [Congo].”

Ka November 17, 2000, Setifikeite sa Bonatla se ne sa fiwa Basupi ba ga Jehofa ka ntlha ya “go thusa ga bone mo tlhabololong ya batho ba Congo [ka] thuto e e mo dikgatisong tsa bone.”

Fa lokwalodikgang lwa kwa Kinshasa e leng Le Phare lo akgela ka sekgele seno lo ne lwa bolela jaana: “Go thata go bona motho wa Congo yo a iseng a bale dimakasine tsa Tora ya Tebelo le Tsogang! kana dikgatiso tse dingwe tse di gatisitsweng ke Basupi ba ga Jehofa. Dimakasine tseno di [tlotla ka] dikarolo tsotlhe tsa botshelo.” Setlhogo se se ile sa tlhalosa gape gore dikgatiso tseno di bontsha “kafa motho a ka lebanang le mathata a gompieno ka gone” e bile di tlhalosa “bokao jwa mmatota jwa ditiragalo tse di diragalang gompieno.” Ga go na makasine ope wa Tsogang! o o “inaakanyang le dipolotiki e bile ga e tlotlomatse lotso lope godimo ga lo longwe.” Mo godimo ga moo, dikgatiso tseno di thusa batho gore “ba ikanye ditsholofetso tsa Mmopi tsa lefatshe le le nang le kagiso le pabalesego le le tla tlogang le tsaya boemo jwa tsamaiso eno ya dilo e e boikepo, le e e bosula.”

Jaaka AJOCAD e tlhalositse, dikgatiso tsa Basupi ba ga Jehofa di ile tsa itshupa di le mosola mo baaging ba le bantsi ba kwa Congo. E re ka di le teng ka dipuo di le dintsintsi, le wena o ka solegelwa molemo ke molaetsa wa tsone o o nayang tsholofelo.

Tsweetswee bona tshedimosetso e e fa tlase go bona kafa o ka di iponelang ka teng.