Leboga Mme o Itumele

LOKWALODIKGANG lwa kwa Canada e leng Calgary Herald lo ne lwa bolela jaana: “Boikutlo jwa go rata go leboga ke selo sa botlhokwa mo mothong.” Herald e ile ya nopola baithuti bangwe ba dingwaga tse robongwe ba sekolo se se kwa tlase ba morutabana wa bone a neng a ba kopa gore ba kwale ka dilo tsotlhe tse ba di lebogelang. Mosha mongwe o ne a bolela gore o leboga lelapa la gaabo ‘ka gonne le ile la mo tlhokomela.’ Mosetsanyana mongwe le ene o ne a leboga lelapa la gaabo, a bolela jaana: “Ba mpoloka ke sireletsegile, ke itekanetse, ba a ntlhokomela, ba a nthata, ba a mphepa mme fa e ne e se ka batsadi ba me, nka bo ke seyo mo lefatsheng mono.”

Go sa leboge go dira gore motho a nne a sa kgotsofale. Go ya ka moithutabodumedi yo e leng mofilosofi e bong J. I. Packer, “re bopilwe gore re ikaege ka Modimo le go ikaega mongwe ka yo mongwe.” Seno se re gopotsa kgakololo nngwe e e botlhale ya Baebele e e ileng ya neelwa makgolokgolo a dingwaga a a fetileng, e e reng: “Itshupeng lo na le tebogo.” (Bakolosa 3:15) Go leboga ba bangwe go tswa pelong go dira gore go nne le dikamano tse mo go tsone re amegang mongwe ka yo mongwe.

Mo godimo ga moo, fa re anaanela e bile re tseelana kwa godimo, re bontsha gore re leboga Jehofa mme o kgona go bona seno. Baebele e bolela jaana: “Matlho a [ga Jehofa] a ya kwa le kwa mo lefatsheng lotlhe gore a bontshe ba pelo ya bone e feletseng mo go ene nonofo ya gagwe.” (2 Ditiragalo 16:9) Modimo o re tlhomamisetsa gore o gakologelwa le go anaanela lorato lo batho ba le bontshang ka leina la gagwe. (Bahebera 6:10) Ee, re na le lebaka le le utlwalang la go itshupa re le batho ba ba lebogang ka gonne fa nonofo eno ya bomodimo e bontshiwa letsatsi le letsatsi, go itumedisa Jehofa e bile go oketsa boitumelo jwa rona. Go ntse jaaka Diane 15:13 e bolela: “Pelo e e ipelang e na le phelelo e e molemo mo sefatlhegong.”