Batho ba ba Senyang Ditlhare

MO METLHENG ya Baebele, ditlhare di ne di tsewa e le dilo tse di botlhokwa thata. Ka sekai, fa Aborahame a ne a rekela mosadi wa gagwe yo o rategang e bong Sara setsha sa lebitla, go ne ga umakiwa ditlhare mo tumalanong e e neng e bontsha gore o fiwa setsha seo.—Genesise 23:15-18.

Le gompieno, ditlhare di tsewa di le botlhokwa thata, mme go dirwa maiteko a magolo mo lefatsheng lotlhe go sireletsa dikgwa. Buka ya State of the World 1998, e bolela jaana: “Le mororo batho ba le bantsi mo dinageng tse di ka kwa ntlheng ya bokone ba amega thata ka dikgwa tsa boboatsatsi, ba ka tswa ba sa lemoge gore dikgwa tsa tlelaemete e e lekalekaneng tse di mo dinageng tsa bone ke tsone tse di katoganeng thata le tse di senngwang thata go gaisa tsotlhe.” Ke eng se se bayang dikgwa tsa dinaga tseo tsa Yuropa le Amerika Bokone mo kotsing? Batho ba le bantsi ba tlhalosa gore ke go rengwa ga dikgwa, mme le fa go ntse jalo go na le dilo tse dingwe gape tse di senyang ditlhare ka bongwe ka bongwe. Dilo tseo ke eng? Go kgotlelwa ga moya le pula ya asiti. Dilo tseno tse di kgotlelang di koafatsa ditlhare ka iketlo, di dira gore go nne motlhofo gore di tlhaselwe ke disenyi le malwetse.

Go fetile masome a dingwaga baithutatikologo le baagi ba bangwe ba ba amegang ba tlhagisa batho malebana le botlhokwa jwa go sirelediwa ga tikologo ya lefatshe. Ka bo1980, fa borasaense ba sena go sekaseka ditlamorago tsa go kgotlelwa ga moya le dipula tsa asiti mo tikologong, ba ne ba swetsa jaana: ‘Fa go sa dirwe sepe, mo e ka nnang ka ngwaga wa 2000, batho ba tla kgona go bona dikgwa fela mo ditshwantshong le mo dibaesekopong tsa bogologolo.’ Ka lesego, maatla a go intšhafatsa a lefatshe a nonofile jaana mo e leng gore go fitlha jaanong a kgonne go emelana le bontsi jwa tshenyo e e ileng ya bolelelwa pele.

Le fa go ntse jalo, mo nakong e e tlang, ke Modimo yo o tla dirang go le gontsi go ngomaela tikologo ya lefatshe la rona. “O nosetsa dithaba go tswa kwa matlwaneng a gagwe a a kwa godimo” e bile o “dira gore bojang jo botala bo tlhogele dibatana, le dimela gore di dirisiwe ke batho.” Mme o solofeditse gore o tla “senya ba ba senyang lefatshe.” (Pesalema 104:13, 14; Tshenolo 11:18) A bo go tla itumedisa jang ne fa baagi ba lefatshe ba tla bo ba kgona go nnela ruri mo lefatsheng le moya wa lone o sa kgotlelwang!—Pesalema 37:9-11.