“Letsatsi la go Amogela Ditumelo Tsa ba Bangwe”

MOGOKGO wa sekolo sengwe kwa Poland o ne a beela letsatsi lengwe kwa thoko kwa sekolong sa gagwe gore e nne “Letsatsi la go Amogela Ditumelo Tsa ba Bangwe,” morago ga gore a buisane le Basupi ba ga Jehofa. O ne a akantsha gore baithaopi bangwe mo baithuting—Bakatoliki, Babuda le Basupi ba ga Jehofa—ba baakanyetse dipuo tse dikhutshwane gore ba thuse baithuti ba bangwe go itse ka ditumelo le ditiro tsa bone. Basha ba bararo ba Basupi ba ga Jehofa ba ne ba ithaopa gone fela foo.

Fa letsatsi leo le goroga, Malwina yo o nang le dingwaga di le 15 e ne e le ene wa ntlha go bua. Gareng ga dilo tse dingwe o ne a re: “Bontsi jwa lona lo re itsile pele ga re simolola go tsena sekolo seno ka gonne re kile ra ya kwa magaeng a lona. Gongwe lo ipotsa gore ke ka ntlha yang fa re nna re lo etela ka metlha. Ke ka gonne re latela sekao sa ga Jesu Keresete, Mothei wa Bokeresete. O ne a rera dikgang tse di molemo tsa Bogosi jwa Modimo gongwe le gongwe kwa go neng go na le batho teng. Baaposetoloi le Bakeresete ba bangwe ba bogologolo ba ne ba dira jalo le bone. Mo mafelong a mantsi, Basupi ba ga Jehofa ba itshokela diteko tse di thata tsa tumelo, mme re a itumela gore mo sekolong sa rona re na le kagiso, e lotlhe lo nang le seabe mo go direng gore re nne le yone. Re lo lebogela seo!”

Kwa bokhutlong jwa puo ya gagwe, Malwina o ne a bolela jaana: “Go na le lebaka le lengwe la go bo re lo etela kwa gae. Re a lo kgathalela. Baebele e bolela gore go ise go ye kae go na le ditiragalo dingwe tse di botlhokwa thata tse di tlileng go diragalela batho. Ka jalo, nako e e tlang fa re kokota kwa gaeno, tsweetswee o iphe nako ya go reetsa. Re ka rata go lo bolelela kafa re ka tshelang ka teng mmogo ka bosakhutleng mo lefatsheng la paradaise.”

Sebui se se latelang e ne e le Mateusz, yo le ene a nang le dingwaga di le 15. Mateusz o ne a bolelela bareetsi ba gagwe gore go ralala dingwaga, Basupi ba ga Jehofa ba ntse ba dirisa mekgwa e e farologaneng ya go bolela dikgang tse di molemo. Ka sekai, ka 1914—ka nako e go neng go dirwa dibaesekopo tse go sa buiweng sepe mo go tsone—Basupi ba ne ba bontsha “Photo-Drama of Creation,” baesekopo le pontsho ya diselaete tse di neng di tsamaisana le modumo wa lentswe.

 Mateusz o ne a bua ka seabe se radio e nnileng le sone mo go anamiseng molaetsa wa Bogosi mme a tlhalosa thulaganyo e e tlhomologileng thata ya khomputara e e bidiwang multilanguage electronic phototypesetting system (MEPS) e e dirilweng ke Basupi ba ga Jehofa. Gape o ne a bolela kafa Basupi ba ga Jehofa ba thusitseng ka teng go itsise dingaka ka kalafi e e sa diriseng madi. O ne a re: “Jaanong dingaka tse di itsegeng tsa mo Poland di amogela boemo jwa rona mme di bolela gore ngwaga le ngwaga balwetse ba le bantsi ba e seng Basupi ba arwa go sa dirisiwe madi.”

Mateusz o ne a konela ka go bolela ka kago ya Diholo Tsa Bogosi mme a re: “A o ka rata go etela ya rona? Go tsenwa mahala, e bile ga go na koleke ya madi.” Fa Mateusz a ne a bua ka lefelo la dikopano kwa Sosnowiec o ne a re: “O tshwanetse go bona kago eno e kgolo le e e agilweng ka tsela e e dirang gore e kgone go dirisediwa maikaelelo a yone ka tsela e e mosola. Ke ka ntlha yang fa re sa ye teng mmogo? Re na le kakantsho nngwe mme tsala ya rona Katarzyna o tla lo bolelela ka yone.”

Go tswa foo Katarzyna yo o nang le dingwaga tse 15 o ne a bolela jaana ka matlhagatlhaga: “Lo lalediwa go tla kopanong ya kgaolo ya Basupi ba ga Jehofa kwa Sosnowiec. Go tla buiwa ka dikgang tse di amang basha.” Katarzyna gape o ne a bua ka tiragalo ya botlhokwa thata ya Bakeresete—Segopotso sa loso lwa ga Jesu Keresete. O ne a kgothatsa bareetsi ba gagwe jaana: “Ngwaga o o fetileng batho ba le dimilione di le 14 lefatshe ka bophara ba ne ba nna teng kwa moketeng oo. Ke ka ntlha yang fa o sa tle go kopanela le rona mo lekgetlhong le le latelang?”

Morago ga dipuo tsa bone, Malwina, Mateusz le Katarzyna ba ne ba naya barutabana buka e e reng Basupi ba ga Jehofa—Baboledi ba Bogosi jwa Modimo mmogo le dikhasete di le pedi tsa bidio tse di buang ka ditumelo le ditiro tsa Basupi ba ga Jehofa. * Barutabana ba ne ba di amogela ba itumetse mme ba solofetsa gore ba tla di dirisa mo ditlelaseng tsa bone tsa hisitori.

Kwa bokhutlong jwa thulaganyo eno, Martyna yo o nang le dingwaga di le 12 o ne a leletsa botlhe ba ba neng ba kgobokane pina e e nang le setlhogo se se reng “Re a Go Leboga, Jehofa.” Basupi bano ba basha ba ne ba ‘nna pelokgale ka Modimo wa bone’ mme ba neela bosupi jo bo molemo. (1 Bathesalonika 2:2) A bo e le dikao tse di molemo jang mo Basuping ba basha gongwe le gongwe!

[Ntlha e e kwa tlase]

[Setshwantsho mo go tsebe 26]

Malwina a baakanyetsa puo ya gagwe malatsi a sekae pele ga a e neela kwa sekolong

[Setshwantsho mo go tsebe 26]

Katarzyna o tlhopha dikwalo tse a tla di dirisang mo puong