Dipotso Tse di Tswang Kwa Babading

Noga kwa tshimong ya Edene e ne ya dira jang gore Efa a nne le mogopolo wa go roba molao wa Modimo malebana le setlhare sa kitso ya molemo le bosula?

Genesise 3:1 e bolela jaana: “Jaanong noga ya itshupa e le botlhajana thata mo dibataneng tsotlhe tsa naga tse Jehofa Modimo a di dirileng. Ka jalo ya raya mosadi ya re: ‘A tota go ntse jalo gore Modimo o rile lo se ka lwa ja mo setlhareng sengwe le sengwe sa tshingwana?’” Go na le dikakanyo tse dintsi malebana le gore noga eo e ka tswa e buile jang le Efa. Kgopolo e nngwe ke gore e buile le ene e dirisa mmele wa yone. Ka sekai, moruti wa Moesemane Joseph Benson o ne a akgela jaana: “Go lebega e kete e ne e dirisa matshwao a mofuta mongwe. E bile ba bangwe ba akanya gore mekgwa ya dinoga e e neng e itsege ka nako eo e ne e le go akanya le go bua, . . . mme ga go na bosupi jwa seno.”

Le fa go ntse jalo, ka go dirisa boitshikinyo jwa mmele fela, noga e ne e ka dira jang gore Efa a nne le mogopolo wa go ja leungo le le neng le ileditswe gore a tle a tshwane le Modimo, a kgone go dira tshwetso ya gore ke eng se se molemo le se se bosula? Mo godimo ga moo, Efa o ne a na le seabe mo motlotlong oo, a araba potso e noga e neng e e boditse. (Genesise 3:2-5) Pono ya gore noga e ne e bua fela ka matshwao kgotsa ka go tshikhinya mmele e ka dira gore go dirwe tshwetso ya gore Efa o ne a araba ka go tlhalosa ka diatla, mme Baebele yone e re o ne a bua.

Fa Paulo a ne a bua ka tiragalo eno o ne a tlhagisa Bakeresete mmogo le ene jaana: “Ke boifa gore ka tsela nngwe, jaaka noga e ne ya faposa Efa ka boferefere jwa yone, megopolo ya lona e ka nna ya senngwa.” Kotsi e Paulo a neng a bua ka yone e ne e tswa mo ‘baaposetoloing ba maaka, badiri ba ba tsietsang.’ Kotsi e ‘baaposetoloi bao ba ba molemo go feta selekanyo’ ba neng ba e baka e ne e sa amane fela le go itshikinya mmele kgotsa go tlhalosa ka diatla. E ne e akaretsa go bua—mafoko a boferefere, a a neng a buiwa go timetsa ba bangwe.—2 Bakorintha 11:3-5, 13.

Le fa go ne go dirisiwa puo go tsietsa Efa kwa tshimong ya Edene, ga go na sepe se se bontshang gore noga eo e ne e na le methapo ya go bua. Tota e ne e sa e tlhoke. Fa moengele wa Modimo a ne a bua le Baalame ka esela e namagadi, phologolo eo e ne e sa tlhoke kgokgotsho e e raraaneng e e tshwanang le ya motho. (Dipalo 22:26-31) Go phepafetse gore fa ‘pelesa e e se nang lentswe e ne e bua ka lentswe la motho,’ maatla a gore e dire jalo a ne a tswa kwa sebakeng sa moya.—2 Petere 2:16.

Mo Baebeleng go bolelwa gore sebopiwa sa semoya se se neng se dira gore noga e bue le Efa ke “noga ya kwa tshimologong, e e bidiwang Diabolo le Satane.” (Tshenolo 12:9) Mafoko a a utlwalang a Efa a a utlwileng a bo a a fetola a ne a tlhotlhelediwa ke Satane, yo o ‘nnang a iphetola moengele wa lesedi.’—2 Bakorintha 11:14.

[Setshwantsho mo go tsebe 27]

“Lo tla tshwana le Modimo, lo itse molemo le bosula”