Jehofa o re Bontsha Gore re Bale Malatsi A Rona Jang
Jehofa o re Bontsha Gore re Bale Malatsi A Rona Jang
“Re bontshe gore re bale malatsi a rona jang ka tsela e ka yone re tla nnang le pelo e e botlhale.”—PESALEMA 90:12.
1. Ke eng fa go tshwanela go kopa Jehofa gore a re “bontshe gore re bale malatsi a rona jang”?
JEHOFA MODIMO ke Mmopi wa rona le Moneibotshelo wa rona. (Pesalema 36:9; Tshenolo 4:11) Ka gone, ga go na ope o sele yo o neng a ka kgona go re bontsha kafa re ka dirisang dingwaga tsa botshelo jwa rona ka tsela e e botlhale go mo feta. Go a tshwanela he go bo mopesalema a ile a kopa Modimo jaana: “Re bontshe gore re bale malatsi a rona jang ka tsela e ka yone re tla nnang le pelo e e botlhale.” (Pesalema 90:12) Ruri go a tshwanela gore re sekaseke ka kelotlhoko Pesalema ya bo90 e boikuelo jono bo fitlhelwang mo go yone. Mme gone, mma pele re sekaseke tshobokanyo e khutshwane ya pina eno e e tlhotlheleditsweng.
2. (a) Ke mang yo go tlhalosiwang e le mokwadi wa Pesalema 90, mme e ka tswa e kwadilwe leng? (b) Pesalema ya bo90 e tshwanetse ya ama jang tsela e re lebang botshelo ka yone?
2 Mafoko a a fa godimo a Pesalema 90 a e bitsa “thapelo ya ga Moshe, monna wa Modimo wa boammaaruri.” E re ka pesalema eno e gatelela kafa botshelo jwa motho bo leng bokhutshwane ka teng, go ka direga gore e ile ya kwalwa morago ga Baiseraele ba sena go gololwa mo bokgobeng kwa Egepeto le ka nako ya mosepele wa bone wa dingwaga tse 40 mo sekakeng, fa diketekete tsa kokomana eo e e sa ikanyegeng di ne di swela mo nageng. (Dipalo 32:9-13) E ka ne go ntse jalo kana nnyaa, gone Pesalema 90 e bontsha gore botshelo jwa batho ba ba sa itekanelang bo bokhutshwane thata. Go a bonala he gore re tshwanetse go dirisa malatsi a rona a a botlhokwa ka botlhale.
3. Pesalema 90 e tshwere dintlha dife tse di botlhokwa?
3 Pesalema 90 temana ya 1 go ya go ya 6 di tlhalosa fa Jehofa e le bonno jwa rona jwa bosaengkae. Temana ya 7 go ya go ya 12 di re bontsha se re tshwanetseng go se dira gore re dirise dingwaga tsa botshelo jwa rona tse di fetang ka bofefo ka tsela e a e amogelang. Mme jaaka go tlhalositswe mo temaneng ya 13 go ya go ya 17, re eletsa ka tlhoafalo gore Jehofa a re abele bopelonomi jwa gagwe jwa lorato le masego a gagwe. Ke boammaaruri gore, pesalema eno ga e bolelele pele se se tla diragalelang mongwe le mongwe wa batlhanka ba ga Jehofa. Le fa go ntse jalo, mongwe le mongwe wa rona o tshwanetse go tsaya mafoko ano a thapelo tsia. Ka gone, a re sekasekeng Pesalema 90 ka kelotlhoko go ya kafa batho ba ba ineetseng mo Modimong ba tshwanetseng go leba dilo ka teng.
Jehofa—“Bonno Jwa Rona Jwa Mmatota”
4-6. Jehofa ke “bonno jwa rona jwa mmatota” ka tsela efe?
4 Mopesalema o simolola ka mafoko ano: “Wena Jehofa, o itshupile o le bonno jwa rona jwa mmatota mo kokomaneng morago ga kokomana. Pele dithaba di tsholwa, kgotsa o ne wa tshola lefatshe le naga e e ungwang jaaka e kete ka ditlhabi tsa pelegi, o Modimo le eleng go tswa bosasimologeng go ya bosakhutleng.”—Pesalema 90:1, 2.
5 Mo go rona Jehofa “Modimo yo o sa khutleng” ke ‘bonno jwa mmatota’—botshabelo jwa semoya. (Baroma 16:26) Re ikutlwa re babalesegile ka gonne ka metlha o iketleeleditse go re thusa e re ka e le “Moutlwi wa thapelo.” (Pesalema 65:2) Ka go bo re latlhela ditlhobaelo tsa rona mo go Rraarona wa selegodimo ka Morwawe yo o rategang, ‘kagiso ya Modimo e e gaisang kakanyo yotlhe e disa dipelo tsa rona le maatla a rona a mogopolo.’—Bafilipi 4:6, 7; Mathaio 6:9; Johane 14:6, 14.
6 Re sireletsegile semoyeng ka gonne Jehofa ke “bonno jwa rona jwa mmatota” fa re bua ka tsela ya tshwantshetso. Gape o re naya ‘diphaposi tse di kwa teng’—tse go ka diregang gore di bo di amana le diphuthego tsa batho ba gagwe—tse e leng boremelelo jwa dilo tsa semoya, tse mo go tsone badisa ba ba lorato ba nnang le seabe se segolo mo go direng gore re ikutlwe re babalesegile. (Isaia 26:20; 32:1, 2; Ditiro 20:28, 29) Mo godimo ga moo, bangwe ba rona re tswa mo malapeng a a nang le lobaka lo loleele a direla Modimo mme re ile ra iponela ka namana gore ke ‘bonno jwa mmatota mo kokomaneng morago ga kokomana.’
7. Dithaba le lefatshe di ile tsa ‘tsholwa’ jang jaaka e kete ka “ditlhabi tsa pelegi”?
7 Jehofa o nnile gone pele dithaba di “tsholwa” kana pele lefatshe le tsholwa jaaka e kete ka “ditlhabi tsa pelegi.” Go ya kafa go bonalang ka teng mo bathong, go tlhagisa lefatshe leno ka dipopego tsotlhe tsa lone, thulaganyo ya lone ya dikhemikale le medikologo ya lone e e raraaneng go ne ga tlhoka matsapa a magolo. Mme fa mopesalema a re dithaba di ne tsa “tsholwa” le lefatshe le ne la tlhagisiwa jaaka e kete ka “ditlhabi tsa pelegi,” o bontsha go tlotla matsapa a magolo a Jehofa a neng a a tsaya fa a ne a bopa dilo tseno. A le rona ga re a tshwanela go nna le tlotlo le kanaanelo e e ntseng jalo ka ditiro tsa Mmopi wa rona?
Ka Metlha Jehofa o Iketleeleditse go re Thusa
8. Mafoko a a reng Jehofa ke Modimo “go tswa bosasimologeng go ya bosakhutleng” a kaya eng?
8 Mopesalema o ile a opela jaana: “O Modimo le eleng go tswa bosasimologeng go ya bosakhutleng.” Lefoko le le ranotsweng e le “bosakhutleng” le ka kaya dilo tse di nang le bofelelo mme boleele jwa nako ya tsone bo sa tlhomamisiwe. (Ekesodo 31:16, 17; Bahebera 9:15) Le fa go ntse jalo, mo go Pesalema 90:2 le ditemana tse dingwe tsa Dikwalo Tsa Sehebera, lefoko “bosakhutleng” le kaya “go ya go ile.” (Moreri 1:4) Megopolo ya rona ga e kgone go tlhaloganya kgang ya gore Modimo o sa le a ntse a le teng. Le fa go ntse jalo, Jehofa ga a na tshimologo e bile ga a kitla a nna le bokhutlo. (Habakuke 1:12) O tla nna a tshela ka metlha e bile a iketleeleditse go re thusa.
9. Mopesalema o lekanya dingwaga tse di sekete tsa go nna gone ga batho le eng?
9 Mopesalema o ne a tlhotlhelediwa go lekanya dingwaga tse di sekete tsa go nna gone ga batho le lobaka lo lokhutshwane thata mo botshelong jwa Mmopi yo o nnetseng ruri. Fa a bua le Modimo o ile a kwala jaana: “O dira gore motho yo o nang le go swa a boele mo selong se se thubagantsweng, mme wa re: ‘Boang, lona bomorwa batho.’ Gonne mo matlhong a gago dingwaga di le sekete di tshwana le maabane fa a fetile, le jaaka tebelo mo bosigong.”—Pesalema 90:3, 4.
10. Modimo o dira jang gore batho ba “boele mo selong se se thubagantsweng”?
10 Motho o a swa, mme Modimo o dira gore a “boele mo selong se se thubagantsweng.” Ke go re, motho o boela “mo loroleng” a nna mmu o o thubagantsweng kana o o loupa. Tota re ka re Jehofa a re: ‘Boela mo leroleng le o dirilweng ka lone.’ (Genesise 2:7; 3:19) Seno se ama batho botlhe—ba ba nonofileng kana ba ba bokoa, bahumi kana bahumanegi—ka gonne ga go na motho ope yo o sa itekanelang ‘yo o ka gololang morwarraagwe, le fa e le go mo ntshetsa thekololo mo Modimong gore a tshele ka bosaengkae.’ (Pesalema 49:6-9) Mme gone a bo re leboga jang ne go bo ‘Modimo a ile a ntsha Morwawe yo o tsetsweng a le esi, gore mongwe le mongwe yo o dumelang mo go ene a nne le botshelo jo bo sa khutleng’!—Johane 3:16; Baroma 6:23.
11. Ke eng fa re ka re lobaka lo loleele mo go rona ke nako e khutshwane thata mo Modimong?
11 Go ya kafa Jehofa a lebang dilo ka teng, tota le Methusela wa dingwaga tse 969, o tshedile lobaka lo lo sa feteng letsatsi. (Genesise 5:27) Mo Modimong, dingwaga tse di sekete di tshwana fela le maabane—lobaka lwa diura tse 24 fela—fa a fetile. Mopesalema gape o bolela gore mo Modimong, dingwaga tse di sekete di tshwana fela le diura tse nnè tsa go lebelela bothibelelo fa go le bosigo. (Baatlhodi 7:19) Ga go pelaelo he gore, lobaka lo loleele mo go rona ke nakonyana e khutshwane thata mo go Jehofa Modimo wa bosakhutleng.
12. Modimo o “gogola” batho jang?
12 Botshelo jwa rona jwa gone jaanong bo bokhutshwane thata fa bo bapisiwa le botshelo jwa Modimo wa bosakhutleng. Mopesalema a re: “O ba gogotse; ba fetoga boroko fela; mo mosong ba tshwana fela le bojang jo botala jo bo fetogang. Mo mosong bo ntsha dithunya mme bo tshwanetse go fetoga; maitseboa bo a swaba bo bo bo omelele.” (Pesalema 90:5, 6) Moshe o ne a bona diketekete tsa Baiseraele di swela mo sekakeng, ba ‘gogolwa’ ke Modimo jaaka e kete ka morwalela. Karolo eno ya pesalema e ile ya ranolwa jaana: “O gogola batho ka boroko jwa loso.” (New International Version) Kafa letlhakoreng le lengwe, boleele jwa botshelo jwa batho ba ba sa itekanelang ke “boroko fela” jo bokhutshwane—jo bo tshwanang fela le boroko jwa bosigo bo le bongwe.
13. Re “tshwana fela le bojang jo botala” ka tsela efe, mme seno se tshwanetse go ama jang tsela ya rona ya go akanya?
13 Re tshwana fela le ‘bojang jo botala jo bo ntshang dithunya mo mosong’ mme bo tloge bo swabe mo maitseboeng ka ntlha ya mogote wa letsatsi. Ee, botshelo jwa rona bo bokhutshwane fela jaaka tlhaga e e swabang mo letsatsing le le lengwe fela. Ka gone, a re se diriseng letlotlo leno le le botlhokwa botlhaswa. Go na le moo, re tshwanetse ra kopa gore Modimo a re kaele gore re dirise jang dingwaga tsa rona tse di setseng mo tsamaisong eno ya dilo.
Jehofa o re Thusa ‘go Bala Malatsi a Rona’
14, 15. Pesalema 90:7-9 e ne ya diragadiwa jang mo Baiseraeleng?
14 Mopesalema o ile a oketsa jaana malebana le Modimo: “Re khutlile mo bogaleng jwa gago, mme re fuduilwe ke tšararego ya gago. O beile ditlolo tsa rona fela fa pele ga gago, dilo tsa rona tse di fitlhegileng fa pele ga sefatlhego sa gago se se phatsimang. Gonne malatsi otlhe a rona a tlile bokhutlong jwa one mo tšhakgalong ya gago; re feditse dingwaga tsa rona fela jaaka mafoko a a sebasebiwang.”—Pesalema 90:7-9.
15 Baiseraele ba ba sa ikanyegeng ba ile ba ‘khutla mo bogaleng jwa Modimo.’ Ba ile ba ‘fuduiwa ke bogale jwa gagwe,’ kana go ‘tshoswa ke tšararego ya gagwe.’ (New International Version) Bangwe ba ne ba “lalaanngwa fa fatshe kwa nageng” ka ntlha ya dikatlholo tsa Modimo. (1 Bakorintha 10:5) Jehofa o ne a ‘baya ditlolo tsa bone fa pele ga gagwe.’ O ile a dira gore ba ikarabelele ditlolo tsa bone tse ba di dirileng phatlalatsa, mme tota le ‘dilo tsa bone tse di fitlhegileng,’ kana maleo a bone a a subegileng, a ne a le ‘fa pele ga sefatlhego sa gagwe se se phatsimang.’ (Diane 15:3) E re ka Baiseraele ba ba sa ikwatlhayeng ba ne ba galefisitse Modimo, ba ne ba ‘feditse dingwaga tsa bone fela jaaka mafoko a a sebasebiwang.’ Malebana le seno, le botshelo jwa rona jo bokhutshwane bo tshwana fela le mohemo o o fetang ka dipounama tsa rona jaaka mafoko fela a a sebasebiwang.
16. Fa batho bangwe ba itlwaeditse go dira boleo mo sephiring, ba tshwanetse go dira eng?
16 Fa re ne re ka itlwaetsa go dira boleo mo sephiring, re ne re ka kgona go fitlhela batho ba bangwe boitshwaro joo jwa rona. Le fa go ntse jalo, ditlolo tseo tse di fitlhegileng di ne di tla ‘nna fa pele ga sefatlhego sa ga Jehofa se se phatsimang,’ mme dikgato tseo tsa rona di ne di tla senya kamano ya rona le ene. Gore re boe re nne le botsala le Jehofa, re ne re tla tshwanelwa ke go kopa gore a re itshwarele, re latlhe ditlolo tsa rona mme re itumelele go amogela thuso ya semoya e re e neelwang ke bagolwane ba Bakeresete. (Diane 28:13; Jakobe 5:14, 15) A bo seo se ne se ka nna botoka jang ne go na le gore gongwe re ‘fetse dingwaga tsa rona fela jaaka mafoko a a sebasebiwang,’ re sentse tsholofelo ya rona ya botshelo jo bo sa khutleng!
17. Batho ba le bantsi ba tshela lobaka lo lo kae, mme dingwaga tsa rona di tletse ka eng?
17 Malebana le botshelo jo bokhutshwane jwa batho, mopesalema a re: “Malatsi a dingwaga tsa rona ka boone ke dingwaga di le masome a supa; mme fa e le ka ntlha ya thata e e kgethegileng ke dingwaga di le masome a le robedi, le fa go ntse jalo di ganelela mo matshwenyegong le mo dilong tse di utlwisang botlhoko; gonne di tshwanetse go feta ka bonako, mme re fofele koo.” (Pesalema 90:10) Go tlwaelegile gore bontsi jwa batho ba tshele dingwaga di le 70, mme Kalebe o ne a bolela fa a na le nonofo e e sa tlwaelegang fa a le dingwaga tse 85. Go ile ga nna le batho bangwe ba ba tshetseng go feta dingwaga tseno, ba ba jaaka Arone (123), Moshe (120), le Joshua (110). (Dipalo 33:39; Duteronome 34:7; Joshua 14:6, 10, 11; 24:29) Mme kokomana e e sa ikanyegeng e e neng ya tswa kwa Egepeto yone, ba ba kwadisitsweng ba bone go tloga ka ba dingwaga tse 20 go ya kwa godimo, ba ne ba swa mo dingwageng tse 40. (Dipalo 14:29-34) Gompieno mo dinageng tse dintsi bontsi jwa batho ba sa ntse ba tshela lobaka lo lo lekanang le lo mopesalema a le tlhalositseng. Dingwaga tsa rona di tletse ka ‘matshwenyego le dilo tse di utlwisang botlhoko.’ Di feta ka bonako mme re tloge re “fofele koo.”—Jobe 14:1, 2.
18, 19. (a) ‘Go bala malatsi a rona ka tsela e ka yone re tla nnang le pelo e e botlhale’ go kaya eng? (b) Go dira dilo ka botlhale go tla re tlhotlheletsa go dira eng?
18 Go tswa foo mopesalema o opela jaana: “Ke mang yo o itseng nonofo ya bogale jwa gago le tšhakgalo ya gago kafa go boifiweng ga gago? Re bontshe gore re bale malatsi a rona jang ka tsela e ka yone re tla nnang le pelo e e botlhale.” (Pesalema 90:11, 12) Ga go ope wa rona yo o itseng ka botlalo nonofo ya bogale jwa Modimo kana selekanyo sa tšhakgalo ya gagwe, mme seno se tshwanetse sa godisa tsela e re tlotlang Jehofa ka yone. Tota go tshwanetse ga re tlhotlheletsa go mo kopa gore a re “bontshe gore re bale malatsi a rona jang ka tsela e ka yone re tla nnang le pelo e e botlhale.”
19 Mafoko ano a mopesalema ke thapelo ya gore Jehofa a rute batho ba gagwe kafa ba ka dirisang botlhale ka teng ka go tsaya malatsi a a setseng a le botlhokwa le go a dirisa ka tsela e Modimo a e amogelang. Motho yo o tlileng go tshela dingwaga di le 70 o tla nna le malatsi a ka nna 25 500. Mme le fa re ka tswa re na le dingwaga tse kae, ‘ga re itse se botshelo jwa rona e tla bong e le sone ka moso, gonne re mouwane o o bonalang ka lobakanyana mme go tswa foo o bo o nyelela.’ (Jakobe 4:13-15) E re ka ‘rotlhe re diragalelwa ke motlha le tiragalo e e sa bonelwang pele,’ re ka se itse gore re tla tshela lobaka lo lo kae. Ka gone a re rapeleleng botlhale jwa gore re fenye diteko, re tshware batho ba bangwe sentle le gore re dire bojotlhe mo tirelong ya ga Jehofa gone jaanong—gompieno! (Moreri 9:11; Jakobe 1:5-8) Jehofa o re kaela ka Lefoko la gagwe, moya wa gagwe le ka phuthego ya gagwe. (Mathaio 24:45-47; 1 Bakorintha 2:10; 2 Timotheo 3:16, 17) Go dira dilo ka botlhale go re tlhotlheletsa go ‘batla pele Bogosi jwa Modimo’ le go dirisa malatsi a rona ka tsela e e tla galaletsang Jehofa le go mo itumedisa. (Mathaio 6:25-33; Diane 27:11) Ke boammaaruri gore, go mo obamela ka pelo yotlhe go ka se ka ga fedisa mathata a rona otlhe, mme gone go dira gore re nne le boipelo jo bogolo.
Masego a ga Jehofa a re Leretse Boipelo
20. (a) Modimo o ‘ikwatlhaya’ ka tsela efe? (b) Jehofa o tla dirisana jang le rona fa re dira phoso e e masisi mme gone re bontsha go e ikwatlhaela ka mmatota?
20 Go ne go ka nna molemo jang ruri fa re ne re ka itumela mo botshelong jotlhe jwa rona! Moshe o ile a ikuela jaana malebana le seno: “Boa, tlhe Jehofa! E tla nna lobaka lo lo kae? Mme o ikwatlhaele batlhanka ba gago. Re kgotsofatse mo mosong ka bopelonomi jwa gago jwa lorato [kana “lorato lwa gago lo lo ikanyegang”], gore re goe ka boipelo mme re ipele mo malatsing otlhe a rona.” (Pesalema 90:13, 14; mokwalo o o kwa tlase mo go NW) Modimo ga a dire diphoso. Mme gone, o a ‘ikwatlhaya’ le go ‘boa ka morago’ mo bogaleng jwa gagwe le mo go otlhayeng batho fa ba fetola boikutlo jwa bone fa a ba tlhagisa mme ba ikwatlhaya. (Duteronome 13:17) Ka gone, le fa re diretse Jehofa phoso e e masisi mme gone re ikwatlhaya ka mmatota, o tla re ‘kgotsofatsa ka bopelonomi jwa gagwe jwa lorato,’ mme re tla nna le lebaka la go ‘goa ka boipelo.’ (Pesalema 32:1-5) Fa re tshela ka tsela e e siameng, re tla kgona go utlwa lorato lo lo ikanyegang lo Modimo a re ratang ka lone mme re tla kgona go ‘ipela mo malatsing otlhe a rona’—ee, botshelo jotlhe jwa rona.
21. Moshe a ka tswa a ne a kopa eng ka mafoko a a kwadilweng mo go Pesalema 90:15, 16?
21 Mopesalema o rapela jaana ka tlhoafalo: “Dira gore re ipele ka malatsi a a lekanang le a o re bogisitseng ka one, dingwaga tse re boneng masetlapelo ka tsone. A tiro ya gago e bonale mo batlhankeng ba gago le bontlentle jwa gago mo barweng ba bone.” (Pesalema 90:15, 16) Moshe a ka tswa a ne a kopa Modimo gore a segofatse Iseraele ka boipelo jo bo lekanang le malatsi a mahutsana a bone le jo bo tsayang lobaka lo lo lekanang le dingwaga tse ba di feditseng ba boga masetlapelo. O ne a kopa gore “tiro” ya Modimo ya go segofatsa Baiseraele e bonale mo batlhankeng ba Gagwe le gore bontlentle jwa Gagwe bo bonale mo barweng ba bone kana mo baneng ba bone. Re ka rapelela gore batho ba ba kutlo ba abelwe masego mo lefatsheng le lesha la Modimo.—2 Petere 3:13.
22. Go ya ka Pesalema 90:17, re tla bo re se phoso fa re rapelela eng?
22 Pesalema 90 e konela ka boikuelo jono: “A bontle jwa ga Jehofa Modimo wa rona bo itshupe bo le mo go rona, le tiro ya diatla tsa rona o e tlhomamise ka thata mo go rona. Ee, tiro ya diatla tsa rona, o e tlhomamise ka thata.” (Pesalema 90:17) Mafoko ano a bontsha gore re tla bo re se phoso fa re rapela Modimo gore a segofatse maiteko a rona mo tirelong ya gagwe. E ka ne re Bakeresete ba ba tloditsweng kana ditsala tsa bone tsa “dinku tse dingwe,” re itumelela gore “bontle jwa ga Jehofa” bo na le rona. (Johane 10:16) A bo re itumela jang ruri go bo Modimo a ‘tlhomamisitse tiro ya diatla tsa rona’ ya go nna baboledi ba Bogosi le ka ditsela tse dingwe!
A re Tsweleleng Pele re Bala Malatsi a Rona
23, 24. Re ka solegelwa molemo jang ke go tlhatlhanya ka Pesalema ya bo90?
23 Go tlhatlhanya ka Pesalema 90 go tshwanetse ga oketsa tsela e re ikaegileng ka yone ka Jehofa, “bonno jwa rona jwa mmatota.” Fa re akanya ka mafoko a yone a a bontshang gore botshelo bo bokhutshwane, re tshwanetse ra lemoga fela thata gore re tlhoka kaelo ya Modimo go re thusa go bala malatsi a rona. Mme fa re senka botlhale jwa bomodimo e bile re bo dirisa, re ka tlhomamisega gore Jehofa o tla re abela bopelonomi jwa gagwe jwa lorato le masego.
24 Jehofa o tla tswelela pele a re bontsha kafa re ka balang malatsi a rona ka teng. Mme fa re ikobela kaelo ya gagwe, re tla kgona go tswelela pele re bala malatsi a rona ka bosakhutleng. (Johane 17:3) Le fa go ntse jalo, fa ruri re batla go bona botshelo jo bo sa khutleng, Jehofa o tshwanetse go nna botshabelo jwa rona. (Jude 20, 21) Jaaka fa re tla bona mo setlhogong se se latelang, kgang eno e gatelelwa sentle mo mafokong a a amang pelo a Pesalema ya bo91.
O ka Araba Jang?
• Jehofa ke “bonno jwa rona jwa mmatota” ka tsela efe?
• Ke eng fa re ka re ka metlha Jehofa o iketleeleditse go re thusa?
• Jehofa o re thusa “go bala malatsi a rona” jang?
• Ke eng se se re thusang gore re “ipele mo malatsing otlhe a rona”?
[Dipotso Tsa Thuto]
[Setshwantsho mo go tsebe 11]
“Pele dithaba di tsholwa” Jehofa e ne e ntse e le Modimo
[Setshwantsho mo go tsebe 12]
Go ya kafa Jehofa a lebang dilo ka teng Methusela wa dingwaga tse 969 o tshedile lobaka lo lo sa feteng letsatsi
[Ditshwantsho mo go tsebe 14]
Jehofa o ‘tlhomamisitse tiro ya diatla tsa rona’