Dira Gore Pelo ya Gago e Boife Jehofa

“Fa fela ba ne ba ka dira gore pelo eno ya bone e mpoife le go boloka ditaelo tsotlhe tsa me ka metlha.”—DUTERONOME 5:29.

1. Re ka tlhomamisega jang gore letsatsi lengwe batho ba tla bo ba gololesegile mo poifong?

BATHO ga ba bolo go tshwenngwa ke poifo ka makgolokgolo a dingwaga. Go boifa tlala, bolwetse, bokebekwa kgotsa ntwa go dirile gore dimilione tsa batho ba nne ba tshwenyegile ka dinako tsotlhe. Ke gone ka moo matseno a Maiphako a Lefatshe Lotlhe a Ditshwanelo Tsa Batho a tlhalosang keletso ya go tlisa lefatshe le mo go lone batho botlhe ba tla gololesegang mo poifong. * Se se itumedisang ke gore, Modimo ka boene o re tlhomamisetsa gore lefatshe le le ntseng jalo le tla tla—mme le ka se tlisiwe ke motho. Jehofa o dirisa moporofeti wa gagwe Mika go re solofetsa gore mo lefatsheng la gagwe le lesha la tshiamo, ‘go tla bo go se na ope yo o ba boifisang.’—Mika 4:4.

2. (a) Dikwalo di re rotloetsa jang gore re boife Modimo? (b) Go ka tsoga dipotso dife fa re sekaseka tshwanelo ya rona ya go boifa Modimo?

² Kafa letlhakoreng le lengwe, poifo gape e ka nna le tlhotlheletso e e siameng. Mo Dikwalong batlhanka ba Modimo ba rotloediwa gangwe le gape gore ba boife Jehofa. Moshe o ne a raya Baiseraele a re: “O boife Jehofa Modimo wa gago, o direle ene.” (Duteronome 6:13) Makgolo a dingwaga moragonyana Solomone o ne a kwala jaana: “Boifa Modimo wa boammaaruri mme o boloke ditaelo tsa gagwe. Gonne seno ke tshwanelo yotlhe ya motho.” (Moreri 12:13) Fa re ntse re dira tiro ya rona ya go naya bosupi, e re e dirang ka kaelo ya baengele, le rona re rotloetsa batho botlhe gore ba ‘boife Modimo ba mo neye kgalalelo.’ (Tshenolo 14:6, 7) Mo godimo ga go boifa Jehofa, Bakeresete ba tshwanetse ba mo rata ka pelo ya bone yotlhe. (Mathaio 22:37, 38) Re ka rata Modimo jang mme gape re mmoifa? Ke eng fa re tshwanetse go boifa Modimo yo o lorato? Re solegelwa molemo jang fa re boifa Modimo? Go araba dipotso tseno, sa ntlha re tshwanetse ra tlhaloganya se go boifa Modimo go se kayang le kafa mofuta ono wa poifo o leng karolo ya konokono ka teng mo kamanong ya rona le Jehofa.

Tshisimogo, Tlotlo le Poifo

3. Go boifa Modimo go kaya eng?

³ Go boifa Modimo ke boikutlo jo Bakeresete ba tshwanetseng ba nna le jone ka Modiri wa bone. Poifo eno e tlhalosiwa go twe ke “tshisimogo le tlotlo e e boteng ka Mmopi le poifo e e tshwanetseng ya go tshaba go mo utlwisa botlhoko.” Ka gone, go boifa Modimo go tlhotlheletsa dikarolo tse pedi tsa botlhokwa tsa matshelo a rona: boikutlo jwa rona ka Modimo le boikutlo jwa rona malebana le boitshwaro jo a bo tlhoileng. Go phepafetse gore dikarolo tseno ka bobedi di botlhokwa e bile di tlhoka gore re di ele tlhoko sentle. Jaaka Expository Dictionary of New Testament Words ya ga Vine e bontsha, mo Bakereseteng, poifo eno ya go tlotla e ‘laola botshelo jwa rona, mo dilong tsa semoya le tsa boitshwaro.’

4. Re ka nna jang le maikutlo a go sisimoga le go tlotla Mmopi wa rona?

⁴ Re ka dira jang gore re sisimoge le go tlotla Mmopi wa rona? Re sala re gamaregile fa re bona naga e ntle, diphororo tse dintle tsa metsi kgotsa phirimo e ntle ya letsatsi. Boikutlo jono bo a gola fa re lemoga, ka matlho a tumelo, maatla a Modimo mo ditirong tse di ntseng jalo tsa popo. Mo godimo ga moo, jaaka Kgosi Dafide, re lemoga  kafa re seng ba sepe ka teng fa re bapisiwa le popo e e boitshegang ya ga Jehofa. “Fa ke bona magodimo a gago, ditiro tsa menwana ya gago, ngwedi le dinaledi tse o di baakantseng, motho yo o nang le go swa ke eng go bo o nna o mo gopotse?” (Pesalema 8:3, 4) Poifo eno e e boteng e e nang le go sisimoga e gogela mo tlotlong e e re tlhotlheletsang go leboga le go baka Jehofa ka ntlha ya sotlhe se a se re direlang. Dafide gape o ne a kwala jaana: “Ke tla go baka ka gonne ke dirilwe ka tsela e e boitshegang e e gakgamatsang. Ditiro tsa gago di a gakgamatsa, jaaka moya wa me o lemoga sentle.”—Pesalema 139:14.

5. Ke ka ntlha yang fa re tshwanetse go boifa Jehofa, mme re na le sekao sefe se se molemo mo ntlheng eno?

⁵ Maikutlo a tshisimogo le tlotlo a tsala poifo e e siameng le ya go tlotla maatla a Modimo jaaka Mmopi le thata ya gagwe jaaka Mmusi yo o tshwanetseng wa lobopo. Mo ponatshegelong e moaposetoloi Johane a neng a e bona, “ba ba tswang ba fentse mo sebataneng le mo setshwantshong sa sone”—balatedi ba ga Keresete ba ba tloditsweng ba le mo boemong jwa bone jwa selegodimo—ba re: “Ditiro tsa gago di dikgolo e bile di a gakgamatsa, Jehofa Modimo, Mothatayotlhe. Ditsela tsa gago di siame e bile di boammaaruri, Kgosi ya bosakhutleng. Ke mang yo tota a ka se kang a go boifa, Jehofa, a ba a galaletsa leina la gago?” (Tshenolo 15:2-4) Go boifa Modimo, mo go bakwang ke go tlotla maemo a gagwe a a kwa godimo fela thata, go dira gore bano ba ba tla busang le Keresete mo Bogosing jwa selegodimo ba tlotle Modimo jaaka ene yo o nang le thata go gaisa botlhe. Fa re akanya ka sotlhe se Jehofa a se dirileng le tsela e e siameng e a busang lobopo ka yone, a ga re nne le lebaka le le utlwalang la go mmoifa?—Pesalema 2:11; Jeremia 10:7.

6. Ke ka ntlha yang fa re tshwanetse ra nna le poifo e e siameng ya go tshaba go utlwisa Jehofa botlhoko?

⁶ Le fa go ntse jalo, mo godimo ga tshisimogo le tlotlo, go boifa Modimo go tshwanetse ga akaretsa poifo e e siameng ya go tshaba go mo utlwisa botlhoko kgotsa go se mo utlwe. Ka ntlha yang? Ka gonne le fa Jehofa a le ‘bonya go galefa e bile a na le bopelonomi jo bogolo jwa lorato,’ re tshwanetse ra gopola gore ‘ga a kitla a golola mo kotlhaong ka gope.’ (Ekesodo 34:6, 7) Le fa Jehofa a le lorato e bile a le pelotlhomogi, ga a dumelele tshiamololo le go dira phoso ka boomo.  (Pesalema 5:4, 5; Habakuke 1:13) Ba ba dirang se se boikepo mo matlhong a ga Jehofa ka boomo e bile ba sa ikwatlhaye mme ka go dira jalo ba nna kgatlhanong le ene ba ka se ka ba tlhoka go otlhaiwa. Jaaka moaposetoloi Paulo a ne a bolela, “ke selo se se boifisang go wela mo diatleng tsa Modimo yo o tshelang.” Go nna le poifo e e siameng ya go tshaba go wela mo seemong se se ntseng jalo, kgabagare go a re sireletsa.—Bahebera 10:31.

“Lo mo Ngaparele”

7. Re na le mabaka afe a go ikanya maatla a ga Jehofa a a bolokang?

⁷ Fa re batla go ikanya Jehofa le go mo tshepa, re tshwanetse pele ra mmoifa ka tsela ya go mo tlotla re bo re lemoge sentle maatla a gagwe a a boitshegang. Fela jaaka ngwana yo monnye a ikutlwa a sireletsegile fa rraagwe a le gaufi, le rona re ikutlwa re sireletsegile e bile re itshepa mo tlhokomelong ya ga Jehofa. Ela tlhoko kafa Baiseraele ba ileng ba itshwara ka teng fa Jehofa a sena go ba etelela pele go tswa mo Egepeto: “Iseraele ya bona seatla se segolo se Jehofa a neng a se dirisa kgatlhanong le Baegepeto; mme batho ba simolola go boifa Jehofa le go dumela mo go Jehofa.” (Ekesodo 14:31) Boitemogelo jwa ga Elisha le jone bo supela ntlha ya gore “moengele wa ga Jehofa o thibelela go dikologa ba ba mmoifang, mme o a ba namola.” (Pesalema 34:7; 2 Dikgosi 6:15-17) Hisitori ya batho ba ga Jehofa ya motlha wa gompieno gongwe le boitemogelo jwa rona ka namana bo tlhomamisa gore Modimo o dirisa maatla a gagwe go thusa batho ba ba mo direlang. (2 Ditiragalo 16:9) Ka gone re lemoga gore “go na le tshepo e e nonofileng mo go boifeng Jehofa.”—Diane 14:26.

8. (a) Ke ka ntlha yang fa go boifa Modimo go re tlhotlheletsa gore re tsamaye mo ditseleng tsa gagwe? (b) Tlhalosa kafa re tshwanetseng ra ‘ngaparela’ Jehofa ka teng.

⁸ Go boifa Modimo ka tshwanelo ga go dire fela gore re mo ikanye mme gape go re rotloetsa gore re tsamaye mo ditseleng tsa gagwe. Fa Solomone a ne a tlhomamisa tempele, o ne a rapela Jehofa jaana: “[A Baiseraele] ba go boife ka go tsamaya mo ditseleng tsa gago malatsi otlhe a ba a tshelang mo godimo ga lefatshe le o le neileng borraaronamogologolwane.” (2 Ditiragalo 6:31) Pelenyana, Moshe o ne a rotloetsa Baiseraele jaana: “Lo sale Jehofa Modimo wa lona morago, lo boife ene, lo boloke ditaelo tsa gagwe, lo reetse lentswe la gagwe, lo mo direle, lo bo lo mo ngaparele.” (Duteronome 13:4) Jaaka ditemana tseno di bontsha sentle, go eletsa go tsamaya mo ditseleng tsa ga Jehofa le go ‘mo ngaparela’ go bakwa ke go ikanya Modimo. Ee, go boifa Modimo go dira gore re utlwe Jehofa, re mo direle, re mo ngaparele, fela jaaka ngwana yo monnye a ka ngaparela rraagwe yo a mo ikanyang gotlhelele.—Pesalema 63:8; Isaia 41:13.

Go Rata Modimo ke go Mmoifa

9. Go rata Modimo le go boifa Modimo go amana jang?

⁹ Go ya kafa Dikwalong, go boifa Modimo ga go re thibele go mo rata. Go fapaana le seo, Baiseraele ba ne ba laelwa gore ba ‘boife Jehofa gore ba tsamaye mo ditseleng tsotlhe tsa gagwe le go mo rata.’ (Duteronome 10:12) Ka gone, go boifa Modimo le go rata Modimo ke diyathoteng di bapile. Go boifa Modimo go re tlhotlheletsa gore re tsamaye mo ditseleng tsa gagwe, mme seo se supa gore re a mo rata. (1 Johane 5:3) Seno se a utlwala ka gonne fa re rata mongwe, go a tshwanela gore re tshabe go mo utlwisa botlhoko. Baiseraele ba ne ba utlwisa Jehofa botlhoko ka botsuolodi jwa bone kwa nageng. Eleruri re ka se batle go dira sepe se se ka utlwisang Rraarona wa selegodimo botlhoko jalo. (Pesalema 78:40, 41) Kafa letlhakoreng le lengwe, e re ka ‘Jehofa a ipelela ba ba mmoifang,’ go mo utlwa le go ikanyega mo go ene go ipedisa pelo ya gagwe. (Pesalema 147:11; Diane 27:11) Go rata Modimo go dira gore re mo itumedise mme go boifa Modimo go dira gore re se ka ra mo utlwisa botlhoko. Ke dinonofo tse di tlatsanang, e seng tse di ganetsanang.

10. Jesu o ne a bontsha jang gore o ne a itumelela go boifa Jehofa?

¹⁰ Botshelo jwa ga Jesu Keresete bo tshwantsha sentle kafa re ka ratang Modimo ka teng mme re ntse re mmoifa. Moporofeti Isaia o ne a kwala jaana ka ga Jesu: “Moya wa ga Jehofa o tla nna mo go ene, moya wa botlhale le wa go tlhaloganya, moya wa kgakololo le wa thata, moya wa kitso le wa go boifa Jehofa; mme o tla ipelela go boifa  Jehofa.” (Isaia 11:2, 3) Go ya ka boporofeti jono, moya wa Modimo o ne wa rotloetsa Jesu go boifa Rraagwe wa selegodimo. Mo godimo ga moo, re lemoga gore poifo eno e ne e se mokgweleo, mme go na le moo e ne e mo kgotsofatsa. Jesu o ne a ipelela go dira thato ya Modimo le go mo itumedisa, tota le fa maemo a ne a le bokete thata. Fa a ne a lebane le go bolawa mo thupeng ya tlhokofatso, o ne a raya Jehofa a re: “E seng jaaka go rata nna, mme jaaka go rata wena.” (Mathaio 26:39) E re ka Morwa Modimo a ne a mmoifa jaana, Jehofa o ne a reetsa mekokotlelo ya gagwe a e amogela, a mo nonotsha, a bo a mmoloka a mo ntsha mo losong.—Bahebera 5:7.

Go Ithuta go Boifa Jehofa

11, 12. (a) Ke eng fa re tshwanetse ra ithuta go boifa Modimo? (b) Jesu o re ruta jang go boifa Jehofa?

¹¹ Go boifa Modimo ga go itlele fela jaaka tshisimogo e e itlelang fela fa re bona maatla le bogolo jwa dilo tsa tlholego. Ke gone ka moo Dafide yo Mogolwane, Jesu Keresete, a re laletsang jaana ka tsela ya boporofeti: “Tlang, bana ke lona, ntheetsang; ke tla lo ruta go boifa Jehofa.” (Pesalema 34:11) Re ka ithuta go boifa Jehofa jang mo go Jesu?

¹² Jesu o re ruta go boifa Jehofa ka go re thusa go tlhaloganya botho jo bo kgatlhisang jwa ga Rraarona wa selegodimo. (Johane 1:18) Sekao sa ga Jesu ka boene se bontsha kafa Modimo a akanyang ka teng le kafa a dirisanang le ba bangwe ka teng, gonne Jesu o bontsha botho jwa ga Rraagwe ka tsela e e feletseng. (Johane 14:9, 10) Mo godimo ga moo, ka thuso ya setlhabelo sa ga Jesu, re kgona go bua le Jehofa fa re rapelela gore re itshwarelwe maleo. Tsela eno e e tlhomologileng e e bontshang bopelotlhomogi jwa Modimo ka boyone e re tlhotlheletsa go mmoifa. Mopesalema o ne a kwala jaana: “O na le boitshwarelo jwa boammaaruri, gore o tle o boifiwe.”—Pesalema 130:4.

13. Go thathamisitswe dikgato dife mo bukeng ya Diane tse di re thusang go boifa Jehofa?

¹³ Buka ya Diane e re naya lenaane la dikgato tse di dirang gore re kgone go nna le poifomodimo. “Morwaaka, fa e le gore o tla amogela mafoko a me mme wa boloka ditaelo tsa me mo go wena, gore o tle o tlhwaele botlhale tsebe, gore o tle o sekamisetse pelo ya gago kwa temogong; mo godimo ga moo, fa o tlhaeletsa tlhaloganyo mme o ntshetsa temogo lentswe la gago, . . . foo o tla tlhaloganya go boifa Jehofa, mme o tla bona e e leng kitso ya Modimo.” (Diane 2:1-5) Ka jalo, fa re batla go boifa Modimo re tshwanetse ra ithuta Lefoko la gagwe, mme re leke ka pelo yotlhe go tlhaloganya se le se rutang mme re bo re tlhwaela kgakololo ya lone tsebe ka kelotlhoko.

14. Re ka latela jang kgakololo e e neetsweng dikgosi tsa Iseraele?

¹⁴ Kgosi nngwe le nngwe ya Iseraele wa bogologolo e ne e laetswe go dira khopi ya Molao le ‘go e bala malatsi otlhe a botshelo jwa yone, gore e tle e ithute go boifa Jehofa Modimo wa yone gore e boloke mafoko otlhe a molao.’ (Duteronome 17:18, 19) Go bala le go ithuta Baebele go botlhokwa fela jalo mo go rona fa re batla go ithuta go boifa Jehofa. Fa re ntse re dirisa melaometheo ya Baebele mo botshelong jwa rona, fa go ntse go ya re nna le botlhale le kitso ya Modimo. Re simolola go “tlhaloganya go boifa Jehofa” ka gonne re bona matswela a a siameng a go a tlisang mo botshelong jwa rona, mme re tseela kamano ya rona  le Modimo kwa godimo. Mo godimo ga moo, ka go kopanela ka metlha le badumedi ka rona, basha le bagolo ba ka reetsa thuto ya Modimo, ba ithuta go mmoifa ba bo ba tsamaya mo ditseleng tsa gagwe.—Duteronome 31:12.

Go Itumela Mongwe le Mongwe yo o Boifang Jehofa

15. Go boifa Modimo go amana le go mo obamela ga rona ka ditsela dife?

¹⁵ Se se fa godimo se re bontsha gore go boifa Modimo ke boikutlo jo bo siameng jo rotlhe re tshwanetseng go nna le jone, e re ka e le karolo ya konokono ya kobamelo ya rona go Jehofa. Go dira gore re mo ikanye gotlhelele, re tsamaye mo ditseleng tsa gagwe re bo re mo ngaparele. Fela jaaka go ne go ntse ka Jesu Keresete, go boifa Modimo gape go ka re tlhotlheletsa gore re diragatse maikano a rona a boineelo gone jaanong le ka bosakhutleng.

16. Ke ka ntlha yang fa Jehofa a re kgothaletsa gore re mmoife?

¹⁶ Poifomodimo ga e ke e tshosa kgotsa ga e gagamatse dilo ka tsela e e feteletseng. Baebele e re tlhomamisetsa jaana: “Go itumela mongwe le mongwe yo o boifang Jehofa, yo o tsamayang mo ditseleng tsa gagwe.” (Pesalema 128:1) Jehofa o re kgothaletsa gore re mmoife ka gonne o a itse gore nonofo eno e tla re sireletsa. Re lemoga kamego ya gagwe e e lorato mo mafokong a a neng a a raya Moshe: “Fa fela [Baiseraele] ba ne ba ka dira gore pelo eno ya bone e mpoife le go boloka ditaelo tsotlhe tsa me ka metlha, gore dilo di ba tsamaele sentle le bomorwaabone ka bosakhutleng!”—Duteronome 5:29.

17. (a) Go boifa Modimo go na le melemo efe? (b) Setlhogo se se latelang se tla tlhalosa dikarolo dife tsa poifomodimo?

¹⁷ Fela jalo, fa re dira gore pelo ya rona e boife Modimo, dilo di tla re tsamaela sentle. Ka ditsela dife? Sa ntlha, boikutlo jo bo ntseng jalo bo tla itumedisa Modimo e bile bo tla re atametsa gaufi le ene. Dafide o ne a itse ka dilo tse di mo diragaletseng gore “o tla diragatsa keletso ya ba ba mmoifang, e bile o tla utlwa go goa ga bone ba kopa thuso, mme o tla ba boloka.” (Pesalema 145:19) Sa bobedi, poifomodimo e tla re solegela molemo ka gonne e tla ama tsela e re lebang se se bosula ka yone. (Diane 3:7) Setlhogo se se latelang se tla tlhalosa kafa poifo eno e re sireletsang ka teng mo kotsing ya semoya, mme se tla sekaseka dikai dingwe tse di mo Dikwalong tsa banna ba ba neng ba boifa Modimo mme ba se ka ba dira bosula.

[Ntlha e e kwa tlase]

A o Ka Araba Dipotso Tse di Latelang?

• Go boifa Modimo go kaya eng, mme go re ama jang?

• Go boifa Modimo le go tsamaya le Modimo go amana jang?

• Sekai sa ga Jesu se bontsha jang gore go boifa Modimo go amana le go rata Modimo?

• Re ka dira ka ditsela dife gore pelo ya rona e boife Jehofa?

[Dipotso Tsa Thuto]

[Setshwantsho mo go tsebe 17]

Dikgosi tsa Iseraele di ne di laetswe go itirela khopi ya Molao le go e bala malatsi otlhe

[Setshwantsho mo go tsebe 18]

Go boifa Jehofa go dira gore re mo ikanye fela jaaka morwa a ikanya rraagwe

[Motswedi wa Setshwantsho mo go tsebe 15]

Stars: Photo by Malin, © IAC/​RGO 1991