Barutisi ba Lefoko la Modimo Ba Rotloediwa go Diragatsa Thomo ya Bone

MO DIKGWEDING tsa bosheng jaana barutisi ba le diketekete di le makgolokgolo ba ne ba kopana mmogo gore ba rutiwe. Go simolola ka May ngwagatlola, ba ne ba kokoana go ralala lefatshe ba le makgolokgolo kwa Dikopanong Tsa Kgaolo Tsa Basupi ba ga Jehofa tsa “Barutisi ba Lefoko la Modimo.” Batlakopanong ba ne ba rotloediwa gore ba ithute, ba tshwanelege botoka, mme ba diragatse thomo ya bone jaaka barutisi.

A o ne o le teng kwa go nngwe ya dikopano tseno? Fa go ntse jalo, kwantle ga pelaelo o ile wa anaanela dijo tse di molemo tsa semoya tse di neng di abiwa kwa dikokoanong tseno tsa go obamela Modimo wa boammaaruri, Jehofa. Ke ka ntlha yang fa o sa boeletse thulaganyo e e rutang eno ya kopano le rona?

Letsatsi la Ntlha—Dikwalo Tse di Tlhotlheleditsweng di Molemo go Ruta

Modulasetulo wa kopano o ne a amogela batlakopanong ka puo e e reng “Tlang lo Tle go Rutwa, Lona Barutisi ba Lefoko la Modimo.” Jesu Keresete o ne a nna Morutisi yo Mogolo ka go ithuta mo go Jehofa, “Motlhatlheledi yo Mogolo.” (Isaia 30:20; Mathaio 19:16) Le rona fa re batla go gatela pele jaaka barutisi ba Lefoko la Modimo, re tshwanetse go rutwa ke Jehofa.

Go tswa foo go ne ga latela puo e e reng “Go Ruta ka Bogosi go Tlhagisa Maungo a a Molemo.” Fa barutisi ba Lefoko la Modimo ba ba nang le maitemogelo ba ne ba botsolodiwa, go ne ga gatelelwa boipelo le masego a a nnang teng a tiro ya go dira barutwa.

Go ne ga latela puo e e kgothatsang e e nang le  setlhogo se se reng “Go Tlhotlhelediwa ke ‘Dilo Tse Dikgolo’ Tsa Modimo.” Mo lekgolong la ntlha la dingwaga, “dilo tse dikgolo” tse di amanang le Bogosi jwa Modimo di ne di rotloetsa batho gore ba tseye kgato. (Ditiro 2:11) Le rona re ka rotloetsa batho gore ba tseye kgato ka go bolela “dilo tse dikgolo” tse di jaaka dithuto tsa Dikwalo ka thekololo, tsogo, le kgolagano e ntšha.

Puo e e latelang e ne e kgothatsa botlhe go “Bona Boitumelo mo Tshiamong ya ga Jehofa.” (Pesalema 35:27) Re thusiwa go latelela tshiamo ka go ithuta go rata se se siameng le go tlhoa se se bosula, ka go ithuta Baebele, ka go gana ditlhotlheletso tse di kotsi semoyeng le ka go tlhagolela boikokobetso. Dikgato tse di ntseng jalo di re sireletsa gore re se ka ra tsalana le batho ba ba bosula, mo mekgweng ya lefatshe ya go rata dilo tse di bonalang, le mo boitlosobodutung jo bo bontshang boitsholo jo bo maswe le thubakanyo.

Puo ya setlhogo, e e reng, “Re Tlhomeletswe ka Botlalo go Nna Barutisi ba Lefoko la Modimo,” e ne ya re gakolola gore Jehofa ke ene a re dirang badiredi ba gagwe ba ba tshwanelegang ka Lefoko la gagwe, moya wa gagwe o o boitshepo le phuthego ya gagwe ya mo lefatsheng. Sebui se ne sa re gakolola jaana malebana le kafa re tshwanetseng go dirisa Lefoko la Modimo ka teng: “Mokgele wa rona ke go dira gore molaetsa wa Baebele o tshele mme re o gatelele mo dipelong tsa bareetsi ba rona.”

Simphosiamo sa ntlha sa kopano se ne se na le setlhogo se se reng, “Go Ithuta fa re Ntse re Ruta ba Bangwe.” Puo ya ntlha e ne ya gatelela gore re tshwanetse go dumalana le melao e e kwa godimo ya boitsholo jwa Bokeresete e re e rutang ba bangwe. Puo e e latelang e ne ya re kgothaletsa go ‘tshwara lefoko la boammaaruri sentle.’ (2 Timotheo 2:15) Gore re ithute, go botlhokwa go nna le thuto ya botho ya ka metlha e e tlhoafetseng ya Baebele, go sa kgathalesege gore re na le lobaka lo lo kana kang re direla Modimo. Puo ya bofelo ya simphosiamo e ne ya bontsha gore Diabolo o re etse tlhoko, o batla go bona mo go rona mekgwa e e jaaka boikgodiso, moya wa go itaola, go ipona re le botlhokwa thata, lefufa, bopelotshetlha, go tshwara ba bangwe ka pelo le go rata go tshwaya diphoso. Le fa go ntse jalo, fa re ganetsa Diabolo ka tlhagafalo, o tla re tshaba. Gore re kgone go mo ganetsa, re tshwanetse go atamela gaufi le Modimo.—Jakobe 4:7, 8.

Puo e e mo nakong ya setlhogo se se reng, “Tlhoa Sebetso sa Lefatshe Leno sa Ditshwantsho Tse di Hepisang” e ne ya re bontsha gore re ka  emelana jang le matshosetsi ao a a maswe mo bomoyeng jwa rona. Moporofeti Habakuke o ne a bua jaana ka Jehofa: “O itshekile thata mo matlhong gore o ka bona se se bosula; e bile ga o kgone go leba matshwenyego.” (Habakuke 1:13) Re tshwanetse go ‘tlhoa se se boikepo.’ (Baroma 12:9) Batsadi ba ne ba kgothadiwa gore ba laole tsela e bana ba bone ba dirisang Internet ka yone le kafa ba lebelelang thelebishene ka gone. Sebui se ne sa bolela gore ba ba iphitlhelang ba kgatlhwa ke ditshwantsho tse di hepisang ba tshwanetse go kopa thuso mo tsaleng e e godileng semoyeng. Se sengwe se se ka thusang ke go tlhatlhanya le go tshwara ka tlhogo ditemana tse di tshwanang le Pesalema 97:10; Mathaio 5:28; 1 Bakorintha 9:27; Baefeso 5:3, 12; Bakolosa 3:5; le 1 Bathesalonika 4:4, 5.

Puo e e latelang ya setlhogo se se reng, “A Kagiso ya Modimo e go Dibele,” e ne ya re gomotsa ka go re tlhomamisetsa gore fa re imetswe ke tlhobaelo, re ka latlhela morwalo wa rona mo go Jehofa. (Pesalema 55:22) Fa re senola maikutlo a rona mo thapelong, Jehofa o tla re naya “kagiso ya Modimo,” go ritibala mo re nnang le gone ka ntlha ya go bo re na le kamano e e botlhokwatlhokwa le ene.—Bafilipi 4:6, 7.

Letsatsi la ntlha le ne la fela ka tsela e e itumedisang thata ka puo e e reng, “Jehofa o Ntlafatsa Batho ba Gagwe ka Lesedi,” e e neng ya tlhalosa go diragadiwa ga Isaia kgaolo 60. Mo lefifing le le leng teng mo lefatsheng gone jaanong, “batswakwa”—boidiidi jo bogolo jwa batho ba sekadinku—ba itumelela lesedi la ga Jehofa mmogo le Bakeresete ba ba tloditsweng. Sebui se ne sa tlhalosa jaana, fa se ne se bua ka ditemana 19 le 20: “Jehofa ga a na go ‘phirima’ jaaka letsatsi kgotsa go ‘fifala’ jaaka ngwedi. O tla tswelela a ntlafatsa batho ba gagwe ka go ba phatsimisetsa lesedi. A bo re tlhomamisediwa ka tsela e e molemolemo jang jaaka re tshela mo malatsing a bofelo a lefatshe leno le le lefifi!” Kwa bokhutlong jwa puo eno, sebui se ne sa itsise go gololwa ga buka ya setlhogo se se reng Boporofeti Jwa ga Isaia—Lesedi la Batho Botlhe, Bolumo ya Bobedi. A o feditse go bala kgatiso eno e ntšha?

Letsatsi la Bobedi—Go Tshwanelega Sentle go Ruta ba Bangwe

Morago ga motlotlo wa temana ya letsatsi mo letsatsing la bobedi, re ne ra reetsa simphosiamo sa bobedi sa kopano ka kgatlhego e kgolo, “Badiredi ba ba Thusang ba Bangwe go Nna Badumedi.” Dibui tsa simphosiamo seno se se nang le dipuo tse tharo di ne tsa gatelela dikgato tse tharo tse di tsewang go thusa batho go nna badumedi—go anamisa molaetsa wa Bogosi, go tlhagolela kgatlhego e e bonweng, le go ruta batho ba ba kgatlhegang go dira se Keresete a se laetseng. Ka thuso ya dipotsolotso le dipontsho, re ne ra kgona go bona ka tsela e e maleba kafa re ka rutang ba bangwe ka teng go nna barutwa.

Puo e e latelang e ne e na le setlhogo se se reng, “Mo Boitshokong Jwa Lona, Tsenyang Boineelo Jwa Bomodimo.” Sebui se ne sa bontsha gore kwa bofelong se e leng sa botlhokwa ke go ‘itshoka go ya bokhutlong.’ (Mathaio 24:13) Re tshwanetse go dirisa dilo tsotlhe tse Modimo a di re rulaganyeditseng—thapelo, thuto ya botho, dipokano le bodiredi  jwa rona—go tlhagolela boineelo jwa bomodimo. Re tshwanetse go thibela dikeletso tsa lefatshe le ditiro tsa lone gore di se ka tsa tsenelela mo boineelong jwa rona jwa bomodimo kgotsa tsa bo senya.

Batho ba ba dirang ka natla le ba ba imelwang ba ka bona jang tapologo gompieno? Puo e e reng, “Go Bona Tapologo mo Jokweng ya ga Keresete” e ne ya araba potso eo. Jesu o ne a laletsa balatedi ba gagwe ka bopelonomi gore ba rwale jokwe ya gagwe mme ba ithute mo go ene. (Mathaio 11:28-30) Re ka rwala jokwe ya ga Jesu ka go latela sekao sa gagwe sa go tshela botshelo jo bo sa raraanang, jo bo lekalekaneng. Dintlha tsa konokono tsa polelo eno di ne tsa gatelelwa fa go ne go botsolodiwa ba ba dirileng gore matshelo a bone e nne a a sa raraanang.

Nngwe ya ditiragalo tsa botlhokwa kwa dikokoanong tse dikgolo tsa Basupi ba ga Jehofa ke go kolobediwa ga batlhanka ba ba sa tswang go ineela ba Modimo. Mokaulengwe yo o neng a neela puo e e reng, “Kolobetso e re Naya Ditshiamelo Tse Dikgolwane Tsa go Ruta” o ne a amogela bayakolobetsong ka lorato mme a ba kopa gore ba nne le seabe mo ditshiamelong tse dikgolwane tsa tirelo. Barutisi ba ba sa tswang go kolobediwa ba Lefoko la Modimo, ba ba tshwanelegang go ya ka Dikwalo ba ka gagamalela maikarabelo mo phuthegong.

Puo ya ntlha thapama e ne e na le setlhogo se se reng, “Etsa Morutisi yo Mogolo.” Fa Jesu a ne a le kwa legodimong ka diketekete tsa dingwaga o ne a etse Rraagwe tlhoko thata e bile a mo etsa, ka jalo a nna Morutisi yo Mogolo. Fa a ne a le mo lefatsheng, o ne a dirisa mekgwa e e nang le matswela ya go ruta, jaaka go dirisa dipotso tse di fatang motho maikutlo le go dirisa ditshwantsho tse di sa raraanang tse di tlhaloganyesegang motlhofo. Jesu o ne a thaile thuto ya gagwe mo Lefokong la Modimo mme a bua ka matlhagatlhaga, lorato le ka maatla. A ga re a ka ra tlhotlheletsega go etsa Morutisi yo Mogolo?

Puo e nngwe e e neng e rotloetsa thata e ne e re, “A o Iketleeditse go Direla ba Bangwe?,” e ne ya re kgothatsa go etsa sekao sa ga Jesu ka go direla batho ba bangwe. (Johane 13:12-15) Sebui se ne sa kgothatsa banna ba ba tshwanelegang ka tlhamalalo gore ba tshwane le Timotheo mme ba dirise ditshono tsa go thusa ba bangwe. (Bafilipi 2:20, 21) Batsadi ba ne ba kgothalediwa go etsa Elekana le Hana ka go thusa bana ba bone go tsenela bodiredi jwa nako e e tletseng. Basha ba ne ba kgothalediwa go etsa sekao sa ga Jesu Keresete le Timotheo yo mmotlana ka go re ba ithaope ka moya wa go rata. (1 Petere 2:21) Gape re ne ra tlhotlhelediwa ke se ba ba dirisitseng ditshono go thusa ba bangwe ba neng ba se bua.

Setlhogo sa simphosiamo ya boraro e ne e le “Solegelwa Molemo ka Botlalo ke Thuto ya Modimo.” Sebui sa ntlha se ne sa gatelela botlhokwa jwa go oketsa selekanyo se re tlhomang mogopolo ka sone. Gore re kgone go fitlhelela mokgele oo, re ka simolola ka go nna le thuto ya botho e e tsayang lobaka lo lokhutshwane re bo re leka go nna re e lelefatsa. Gape o ne a kgothatsa bareetsi gore ba bale dikwalo le gore ba kwale dintlha kwa dipokanong. Sebui sa bobedi se ne sa re tlhaba podimatseba ka botlhokwa jwa gore re ngaparele “sekao sa mafoko a a itekanetseng.” (2 Timotheo 1:13, 14) Re tshwanetse gore re reke nako ya go dira thuto ya botho le ya go nna gone kwa dipokanong gore re kgone go itshireletsa mo boitsholong jo bo maswe jo bo bontshiwang ke metswedi ya dikgang, difilosofi tsa batho, batho ba ba tshwayang Baebele diphoso le ke dithuto tsa batlhanogi. (Baefeso 5:15, 16) Sebui sa bofelo sa simphosiamo se ne sa gatelela botlhokwa jwa go dirisa dilo tse re di ithutileng gore thuto ya Modimo e tle e re solegele molemo ka botlalo.—Bafilipi 4:9.Re ne re itumeletse go utlwa puo e e reng, “Dithulaganyo Tse Disha Tse di re Thusang go Gatela Pele Semoyeng”! Re ne ra itumelela go utlwa gore mo bogautshwaneng go tla gatisiwa buka e ntšha e e nang le setlhogo se se reng Solegelwa Molemo ke Thuto ya Sekolo sa Bodiredi sa Puso ya Modimo.  Re ne re tlhoafaletse go bona buka eo fa sebui se ntse se tlhalosa diteng tsa yone. Malebana le karolo ya buka eo e e nang le dintlha di le mmalwa tse baithuti ba abelwang go berekela mo go tsone, sebui se ne sa re: “Bukathuto eno e ntšha ga e a kwalwa jaaka dibuka tsa lefatshe fa e bua ka dintlha tse 53 tsa go bala, go bua, le go ruta sentle. E kwadilwe go ya ka melaometheo ya Dikwalo.” Buka eno e tla bontsha kafa baporofeti, Jesu le barutwa ba gagwe ba neng ba bontsha mekgwa e e molemo ya go ruta ka teng. Eleruri, bukathuto eno le dintlha tse disha tsa Sekolo sa Puso ya Modimo e tla re thusa go nna barutisi ba ba botoka ba Lefoko la Modimo.

Letsatsi la Boraro—Nnang Barutisi ka Ntlha ya Nako

Morago ga motlotlo wa temana ya letsatsi mo letsatsing la bofelo, botlhe ba ne ba reetsa ka kelotlhoko simphosiamo sa bofelo sa kopano se se reng, “Boporofeti Jwa ga Malaki bo re Baakanyetsa Letsatsi la ga Jehofa.” Malaki o porofetile dingwaga di ka nna lekgolo morago ga gore Bajuda ba boe kwa Babelona. Ba ne ba boetse gape mo botlhanoging le mo boikepong, ba sa tlotle leina la ga Jehofa ka go tlhokomologa melao ya gagwe e e siameng le ka go tlisa ditlhabelo tsa diphologolo tse di foufetseng, tse di golafetseng le tse di lwalang. Mo godimo ga moo, ba ne ba tlhala basadi ba bosha jwa bone, gongwe e le gore ba nyale basadi ba baheitane.

Kgaolo ya ntlha ya boporofeti jwa ga Malaki e re tlhomamisetsa gore Jehofa o rata batho ba gagwe. E gatelela botlhokwa jwa go boifa Jehofa ka tshisimogo mmogo le go anaanela dilo tse di boitshepo. Jehofa o lebeletse gore re mo direle ka bojotlhe, re mo obamele ka lorato lo e seng lwa bopelotshetlha. Tirelo ya rona e e boitshepo ga e a tshwanela go nna seomodiro fela, mme re tshwanetse go ikarabelela mo Modimong.

Sebui sa simphosiamo sa bobedi se ne sa botsa jaana fa se ne se bua kafa kgaolo ya bobedi ya Malaki e diragadiwang ka teng mo motlheng wa rona: “A rotlhe motho ka namana re podimatseba gore ‘go se ka ga fitlhelwa tshiamololo epe mo dipounameng tsa rona’?” (Malaki 2:6) Ba ba eteletseng pele mo go ruteng ba tshwanetse go tlhomamisa gore se ba se buang se theilwe ka nitamo mo Lefokong la Modimo. Re tshwanetse go tlhoa boferefere jo bo tshwanang le go dira ditlhalo tse di sa siamang.—Malaki 2:14-16.

Sebui sa bofelo sa simphosiamo seno se ne sa re thusa go ipaakanyetsa letsatsi la ga Jehofa, fa se ne se bua ka setlhogo se se reng, “Ke Mang yo o Tla Falolang Letsatsi la ga Jehofa?” Sebui se ne sa buela kwa godimo sa re “Batlhanka ba Modimo ba kgothadiwa ke go itse gore Malaki kgaolo 3, temana 17, e diragadiwa ka selekanyo se segolo mo go bone!” E bolela jaana: ‘“Mme ruri ba tla nna ba me,” go buile Jehofa wa masomosomo, “ka letsatsi  la fa ke tla bo ke tlhagisa thuo e e kgethegileng. Ke tla ba bontsha bopelotlhomogi, fela jaaka rre a bontsha bopelotlhomogi mo go morwawe yo a mo direlang.”’”

Tiragalo e nngwe ya botlhokwa kwa kopanong e ne e le terama ya metlha ya Baebele ya setlhogo se se reng, “Tlotla Bolaodi Jwa ga Jehofa,” e e neng e bontsha bomorwa Kora. Le fa rraabone a ne a tsuologela Moshe le Arone, ba ne ba nna ba ikanyega mo go Jehofa le mo baemeding ba gagwe. Le fa Kora le balatedi ba gagwe ba ne ba nyelediwa, bomorwa Kora bone ba ne ba falola. Puo e e latelang ya setlhogo se se reng, “Ineele mo Bolaoding Jwa Modimo ka Boikanyegi,” e ne ya bua kafa molaetsa wa terama o amang mongwe le mongwe wa rona ka teng. Sebui se ne sa re tlhagisa ka dintlha tse thataro tse Kora le balatedi ba gagwe ba neng ba dira phoso mo go tsone: go sa eme bolaodi jwa ga Jehofa nokeng ka boikanyegi; go letla boikgogomoso, boikgodiso le lefufa gore di ba laole; go tlhoma mogopolo thata mo makoeng a batho ba ba tlhomilweng ke Jehofa; go nna le moya wa go ngongorega; go sa kgotsofalele ditshiamelo tsa bone tsa tirelo; le go baya ditsala kgotsa ba losika kwa godimo ga go ikanyega mo go Jehofa.Setlhogo sa puo ya phatlalatsa se ne se re, “Ke Bomang ba ba Rutang Ditšhaba Tsotlhe Boammaaruri?” Go ne go sa buiwe ka boammaaruri ka kakaretso, mme go ne go buiwa ka boammaaruri malebana le maikaelelo a ga Jehofa a Jesu Keresete a neng a neela bosupi ka one. Sebui se ne sa sekaseka boammaaruri malebana le ditumelo, boammaaruri jo bo malebana le mokgwa wa kobamelo le boammaaruri malebana le boitshwaro. Tumelo ya rona ya gore ‘ruri Modimo o mo gare ga rona’ e ne ya nonotshiwa tota ka go tshwantshanya Bakeresete ba lekgolo la ntlha la dingwaga le Basupi ba ga Jehofa gompieno.—1 Bakorintha 14:25.

Morago ga tshobokanyo ya Tora ya Tebelo ya setlhogo se se neng se ithutiwa mo bekeng eo, barutisi botlhe ba lefoko la Modimo ba ba neng ba le teng ba ne ba tlhotlhelediwa ke puo e e konelang e e reng, “Go Dira Tiro ya Rona ya go Ruta ka Potlako.” Fa go ne go boelediwa thulaganyo ka bokhutshwane go ne ga gatelelwa botlhokwa jwa go dirisa Dikwalo fa re ruta, ditsela tse re ka nnang barutisi ba ba tshwanelegang ka tsone le botlhokwa jwa go tshepa boammaaruri jo re bo rutang ba bangwe. Sebui se ne sa re kgothatsa gore re dire gore ‘botswelelopele jwa rona bo bonatshege’ le gore re ‘itlhokomele e bile re tlhokomele go ruta ga rona.’—1 Timotheo 4:15, 16.

Re ne ra itumelela mokete wa semoya kwa Kopanong ya Kgaolo ya “Barutisi ba Lefoko la Modimo!” E kete re ka etsa Motlhatlheledi wa rona yo Mogolo, Jehofa, le Morutisi wa rona yo Mogolo, Jesu Keresete, fa re ruta ba bangwe lefoko la Modimo.

[Lebokoso/Ditshwantsho mo go tsebe 28]

Dikgatiso Tse Disha Tse Di Tla Thusang Ka Ditlhoko Tse Di Kgethegileng

Batlakopanong ya Kgaolo ya “Barutisi ba Lefoko la Modimo” ba ne amogela dikgatiso tse pedi ka boitumelo tse di tla ba thusang thata go ruta batho boammaaruri jwa Dikwalo mo dikarolong tse di rileng tsa lefatshe. Pampitshana e e nang le setlhogo se se reng A o Na le Moya O o Sa Sweng? e tla thusa thata go simolola metlotlo le batho ba ba nnang mo dinageng tse go buiwang dipuo tse di sa direng pharologano fa gare ga “moya” (soul) le “moya” (spirit). Pampitshana eno e ntšha e bontsha ka phepafalo gore maatla a moya a farologane le sebopiwa sa moya le gore batho ga ba fetoge dibopiwa tsa moya fa ba swa.

Kwa bokhutlong jwa letsatsi la bobedi la kopano go ne ga gololwa boroutšhara jo bo reng A Satisfying Life—How to Attain It. Boroutšhara jono bo dirilwe ka maikaelelo a gore go simololwe dithuto tsa Baebele le batho ba ba sa tlhaloganyeng kgopolo ya gore go na le Mmopi yo e leng motho le ya gore go na le buka e e tlhotlheleditsweng ke Modimo. A o setse o kgonne go dirisa dikgatiso tseno tse disha mo bodireding jwa gago?

[Ditshwantsho mo go tsebe 26]

Kwa Milan, kwa Italy, le kwa dikopanong go dikologa lefatshe, go ne ga kolobediwa batho ba le makgolokgolo

[Setshwantsho mo go tsebe 29]

Bareetsi ba ne ba rotloediwa ke terama e e reng “Tlotla Bolaodi jwa ga Jehofa”