Ditiro Tse di Molemo di Galaletsa Modimo

BAKERESETE ba boammaaruri ba galaletsa Modimo ka boitshwaro jwa bone jo bontle le ka ditiro tsa bone tse di molemo. (1 Petere 2:12) Seno se ka bonwa mo go se se diragetseng kwa Italy mo dingwageng tsa bosheng jaana.

Ka September 1997, go ne ga nna le thoromo ya lefatshe e e maatla mo dikarolong tse di farologaneng tsa Marche le mo dikgaolong tsa Umbria, ya senya magae a a ka nnang 90 000. Ditlhopha tsa Basupi ba ga Jehofa di ile tsa ithaopa ka bonako go thusa badumedi ka bone le ba bangwe. Go ne ga tlisiwa ditereilara, malao, ditofo, dijenereitara le dilo tse dingwe tse di neng di tlhokega. Ditiro tseno tsa namolo di ne tsa elwa tlhoko ke ba bangwe.

Lokwalodikgang lwa Il Centro lo ne lwa bega jaana: “Batho ba ntlha go tla ka dilwana tsa namolo mo mafelong a a amegileng e ne e le Basupi ba ga Jehofa ba kwa Roseto [kwa porofenseng ya Teramo] . . . Mo godimo ga gore ba kopane gangwe le gape go rapela, batho bano ba ba ikanyegang mo go Jehofa ba dira ka tsela e e mosola, ba thusa ba ba bogang, go sa kgathalesege gore ke ba bodumedi bofe.”

Ratoropo wa Nocera Umbra, nngwe ya ditoropo tse di neng di amegile thata, o ne a kwalela Basupi jaana: “Ke lo leboga ka namana le ka pelo yotlhe ka ntlha ya go thusa baagi ba Nocera. Ke dumela gore se ke se buang ke maikutlo a baagi botlhe ba lefelo leno.” Mo godimo ga moo, Lefapha la Tsa Selegae le ne la abela Congregazione Cristiana dei Testimoni di Geova (Phuthego ya Bokeresete ya Basupi ba ga Jehofa) setifikeiti sa tebogo le mentlele “tse di akgolang tiro e e dirilweng le bonatla jo bo bontshitsweng mo ditirong tse di amanang le maemo a tshoganyetso a a neng a tlhaga kwa dikgaolong tsa Umbria le Marche.”

Ka October 2000, morwalela o o boitshegang o ne wa tlhasela kgaolo ya Piedmont kwa bokone jwa Italy. Basupi ba ile ba tsaya kgato gape ka bonako go ya go thusa le go dira dithulaganyo tsa namolo. Ditiro tse di molemo tseno le tsone di ile tsa elwa tlhoko. Kgaolo ya Piedmont e ne ya ba neela letlapa la segopodiso ka ntlha ya “tiro ya bone e ntle ya boithaopo ya go tshegetsa baagi ba Piedmont ba ba neng ba amilwe ke morwalela.”

Jesu Keresete o ne a laela barutwa ba gagwe jaana: “A lesedi la lona le phatsime fa pele ga batho, gore ba tle ba bone ditiro tsa lona tse di molemo mme ba neye Rraalona yo o kwa magodimong kgalalelo.” (Mathaio 5:16) Basupi ba ga Jehofa ba galaletsa Modimo ka boitumelo, go na le gore ba ikgalaletse ka bobone, ka go dira “ditiro tse di molemo” tse di thusang baagelani ba bone mo semoyeng le ka ditsela tse dingwe.