Dipotso Tse di Tswang Kwa Babading

Polelo e e mo go Bahebera 12:4 e e reng: “Ga lo ise lo bo lo emelelane le jone go fitlha mading” e bolela eng?

Polelwana “lo emelelane le jone go fitlha mading” e kaya go ya bokgakaleng jwa go swa, gore motho a tsholole madi a gagwe ka tsela ya mmatota.

Moaposetoloi Paulo o ne a itse gore Bakeresete bangwe ba Bahebera ka ntlha ya tumelo ya bone, ba ne ba setse ba ‘itshoketse ntwa e kgolo tlase ga dipogo.’ (Bahebera 10:32, 33) Fa Paulo a ne a bua ka seo, go bonala a ne a dirisa tshwantshiso ya kgaisano ya diatleletiki ya Bagerika, e e ka tswang e ne e akaretsa go thuba lobelo, go sokasokana, motshameko wa mabole, le go latlhela discus le javelin. Go dumalana le seo, mo go Bahebera 12:1 o ne a rotloetsa Bakeresete mmogo le ene jaana: “A le rona re apoleng bokete bongwe le bongwe le boleo jo bo re rareetsang motlhofo, mme a re tabogeng ka boitshoko lobelo lo re lo tlhomilweng pele.”

Mo ditemaneng tse tharo tse di latelang eo, mo go Bahebera 12:4, Paulo o ka tswa a ne a sa tlhole a bua ka go thuba lobelo mme jaanong a bua ka kgaisano ya motshameko wa mabole. (Ditshwantshiso tseno ka bobedi di tlhaga mo go 1 Bakorintha 9:26.) Boramabole ba bogologolo ba ne ba bofa mabole a bone le malokololo a diatla tsa bone ka dikgole tsa letlalo. E bile dikgole tseo di ka tswa di ne di dirilwe bokete ka “lloto, tshipi, kgotsa ditalama tsa metale tse di neng di dira gore boramabole ba gobale ka tsela e e masisi.” Dintwa tseo tse di setlhogo di ne di baka go tshologa ga madi, ka dinako tse dingwe le loso.

Bakeresete ba Bahebera ba ne ba na le dikao tse di lekaneng tsa batlhanka ba ba ikanyegang ba Modimo ba ba neng ba bogisitswe le go sotlwa setlhogo, go ya bokgakaleng jwa gore ba swe, “go fitlha mading.” Tlhokomela gore Paulo o ne a bua kgang ya se se neng sa diragalela batho ba bogologolo ba ba neng ba ikanyega fa a ne a bua ka eng:

“Ba ne ba kgobotlediwa, ba lekwa, ba fatoganngwa, ba swa ba bolawa ka tšhaka, ba kgarakgatshega ba apere matlalo a dinku, matlalo a dipodi, ba le mo letlhokong, mo pitlaganong, ba tshwerwe setlhogo.” Morago ga moo, Paulo o ne a bua ka Moitekanedisi wa tumelo ya rona, Jesu: “O ne a itshokela kota ya tlhokofatso, a nyatsa ditlhong, mme o ntse kafa seatleng sa moja sa setulo sa bogosi sa Modimo.”—Bahebera 11:37; 12:2.

Ee, batho ba le bantsi ba ne ba “emelelane le jone go fitlha mading,” ke gore go ya bokgakaleng jwa go swa. Ntwa ya bone e ne e feta go lwantshana fela le boleo jwa go tlhoka tumelo. Ba ne ba ikanyega fa ba ne ba sotlwa setlhogo mo mmeleng, ba ikanyega go fitlha losong.

Batho ba basha mo phuthegong ya Jerusalema, gongwe ba ba nnileng Bakeresete morago ga pogiso e e setlhogo e sena go feta, ba ne ba ise nke ba lekwe ka tsela e e feteletseng jalo. (Ditiro 7:54-60; 12:1, 2; Bahebera 13:7) Le fa go ntse jalo, le diteko tse di seng setlhogo thata di ne di kgoba bangwe ba bone marapo gore ba se ka ba tswelela ka kgaisano; ba ne ba ‘lapa le meya ya bone e felelwa ke thata.’ (Bahebera 12:3) Ba ne ba tlhoka go gatela pele kwa go goleng sentle. Seo se ne se tla nonotsha bokgoni jwa bone jwa go itshokela sengwe le sengwe se se neng se tla tla, le fa seo se ne se akaretsa go sotlwa mo mmeleng go ya bokgakaleng jwa gore madi a bone a tshololwe.—Bahebera 6:1; 12:7-11.

Bakeresete ba bantsi mo metlheng ya segompieno ba “emelelane le jone go fitlha mading,” ba bolaelwa gore ba ne ba gana go ineela ka go itatola Bokeresete jwa bone. Go na le gore mafoko a ga Paulo mo go Bahebera 12:4 a re tshose, re ka a tsaya e le sesupo sa gore re ikemiseditse go ya bokgakaleng bofe, gore re nne re ikanyega mo Modimong. Moragonyana mo go lone lekwalo leno le le yang go Bahebera, Paulo o ne a kwala jaana: “A re tsweleleng re nna le bopelonomi jo bo sa re tshwanelang, jo re ka direlang Modimo tirelo e e boitshepo ka jone ka tsela e e amogelesegang re na le poifo ya bomodimo le tshisimogo.”—Bahebera 12:28.