Kafa Bogole Bo Tla Felang ka Teng

A KANYA fela matlho a difofu a bona, ditsebe tsa bosusu di utlwa modumo mongwe le mongwe, loleme lwa ba ba sa kgoneng go bua lo opela ka boitumelo mme maoto a ba ba tlhotsang a tiile e bile a kgona go tsamatsamaya! Ga re bue ka sengwe se kalafi ya saense e tla bong e se fitlheletse, mme re bua ka se se tla diregang fa Modimo a sena go tsaya kgato go thusa batho. Baebele e bolelela pele jaana: “Ka nako eo matlho a difofu a tla bulwa, le ditsebe tsa bosusu di tla thibololwa. Ka nako eo setlhotsa se tla palama fela jaaka kgama e tonanyana, le loleme lwa yo o sa kgoneng go bua lo tla goa ka boitumelo.” (Isaia 35:5, 6) Mme re ka tlhomamisa jang gore boporofeti jono jo bo gakgamatsang jaana bo tla diragadiwa?

Sa ntlha, fa Jesu Keresete a ne a le mo lefatsheng, o ne a fodisa batho ba ba nang le mefuta yotlhe ya bolwetse le bogole. Mo godimo ga moo, bontsi jwa dikgakgamatso tsa gagwe di ne tsa bonwa ke basupi ba le bantsi—tota le ke baba ba gagwe. Tota e bile, mo e ka nnang bobotlana ka lekgetlo le le lengwe, baganetsi ba ba belaelang ba ne ba tlhotlhomisa ka botlalo tiro nngwe ya go fodisa gore ba tle ba ganetse Jesu. Mme se se neng sa ba swabisa ke gore se ba neng ba se dira se ne se tlhomamisa fela gore o dirile kgakgamatso eo. (Johane 9:1, 5-34) Fa Jesu a sena go dira kgakgamatso e nngwe e e ka se kang ya latolwa, ba ne ba bua jaana ba betilwe ke pelo: “Re tla dirang, ka gonne monna yono o dira ditshupo di le dintsi?” (Johane 11:47) Le fa go ntse jalo, batho fela ba ne ba se tlhogo e thata jalo, ka gonne ba le bantsi ba ne ba simolola go dumela mo go Jesu.—Johane 2:23; 10:41, 42; 12:9-11.

Dikgakgamatso Tsa ga Jesu—Pontsho ya Phodiso ya Lefatshe Lotlhe

Dikgakgamatso tsa ga Jesu ga di a ka tsa supa fela gore Jesu ke Mesia le Morwa Modimo. Gape di ile tsa dira gore batho ba kgone go dumela mo ditsholofetsong tsa Baebele tsa gore batho ba ba kutlo ba tla fodisiwa mo isagweng. Ditsholofetso tseno di akaretsa boporofeti jo bo mo go Isaia kgaolo 35, jo bo umakilweng mo serapeng sa ntlha. Isaia 33:24 e bolela jaana malebana le kafa batho ba ba boifang Modimo ba tla itekanelang ka teng mo isagweng: “Ga go na monni ope yo o tla reng: ‘Ke a bobola.’” Tshenolo 21:4 le yone e solofetsa jaana: “[Modimo] o tla phimola dikeledi tsotlhe mo matlhong a bone, mme loso lo tla bo lo seyo le fa e le khutsafalo le fa e le selelo le fa e le botlhoko di tla bo di sa tlhole di le gone. Dilo tsa pele [diteko le go boga ga gompieno] di fetile.”

Batho ba rapela ka metlha gore dipolelelopele tseno di diragadiwe fa ba boeletsa thapelo ya sekao ya ga Jesu, e bontlhanngwe jwa yone bo reng: “Bogosi jwa gago a bo tle. Go rata ga gago a go dirwe  mo lefatsheng jaaka kwa legodimong.” (Mathaio 6:10, Baebele e e Boitshepo) Ee, go rata ga Modimo go akaretsa lefatshe le batho. Bolwetse le bogole, le fa gone di letleletswe ka ntlha ya mabaka a a rileng, di tla tloga di fedisiwa; ga di kitla di senyetsa “sebeo [sa Modimo] sa dinao” ruri.—Isaia 66:1 *

Go Fodisiwa Kwantle ga go Utlwa Botlhoko Kana go Duela

Le fa batho ba ka tswa ba ne ba na le bolwetse bofe, Jesu o ne a ba fodisa a sa ba utlwise botlhoko, a sa senye nako e bile a sa ba duedise. Jaaka fa go ne go ka lebelelwa, dikgang tse di malebana le seno di ile tsa anama ka bonako, mme go ise go ye kae “boidiidi jo bogolo jwa mo atamela, bo na le batho ba ba tlhotsang, ba ba golafetseng, ba ba foufetseng, ba ba dimumu, le ba bantsi ba ba ka tsela e sele, mme ba ba latlhela fela fa dinaong tsa gagwe, mme a ba alafa.” Batho ba ne ba arabela jang? Pego ya ga Mathaio ya se a se iponetseng ka matlho e tswelela pele jaana: “Boidiidi bo [ne] jwa gakgamala fa bo bona dimumu di bua le ditlhotsa di tsamaya le difofu di bona, mme ba galaletsa Modimo wa Iseraele.”—Mathaio 15:30, 31.

Ela tlhoko gore Jesu o ne a sa tlhaole batho ba ba rileng mo gare ga boidiidi a ba a ba fodisa—e leng boferefere jo bo dirisiwang ke batsietsi. Go na le moo, ba losika le ditsala tsa batho ba ba lwalang ba ne ba ba “latlhela fela fa dinaong tsa [ga Jesu] mme a ba alafa.” Jaanong a re sekasekeng dikai dingwe tse di rileng tsa kafa Jesu a neng a kgona go fodisa ka teng.

Bofofu: Fa Jesu a ne a le kwa Jerusalema, o ne a dira gore monna yo o neng a “foufetse fa a sa le a tsholwa” a kgone go bona. Monna yono o ne a itsege thata mo motseng e le mokopi yo o foufetseng. Ka jalo o ka akanya fela gore batho ba ne ba itumetse e bile ba tsositse modumo go le kana kang fa ba mmona a tsamatsamaya e bile a bona! Le fa go ntse jalo, ga se batho botlhe ba ba neng ba itumetse. E re ka maloko mangwe a lekoko la Sejuda la maemo a a kwa godimo le le nang le tlhotlheletso e kgolo le le bidiwang Bafarasai a ne a utlwisitswe botlhoko ke go bo Jesu a ile a senola boikepo jwa bone pelenyana ga moo, ba ne ba eletsa thata go bona bosupi jwa gore Jesu o ne a dira boferefere. (Johane 8:13, 42-44; 9:1, 6-31) Ka jalo, ba ne ba botsolotsa monna yo o fodisitsweng, ba botsolotsa batsadi ba gagwe, mme go tswa foo ba botsolotsa monna yoo gape. Mme dipotsolotso tsa Bafarasai di ile tsa tlhomamisa fela gore kgakgamatso ya ga Jesu tota e ne e diragetse, mme seo se ne sa ba galefisa. E re ka monna yo o fodisitsweng yono a ne a gakgamadiwa ke botlhogoethata jwa baitimokanyi bano ba bodumedi, o ne a bolela jaana: “Go tswa bogologolong ga go ise go ke go utlwiwe gore mongwe o butse matlho a motho yo o tsetsweng a le sefofu. Fa monna yono a ne a sa tswe kwa Modimong, o ne a ka se ka a dira sepe ka gope.” (Johane 9:32, 33) Monna yono yo pele e neng e le sefofu o ne a tlhalosa tumelo ya gagwe jalo ka mafoko a a boammaaruri le a a botlhale, mme ka ntlha ya seo Bafarasai ba ile ba “mo leleka,” se se ka tswang se raya gore ba ne ba mo koba mo sinagogeng.—Johane 9:22, 34.

Bosusu: Fa Jesu a ne a le kwa Dekapolise, karolo nngwe e e kwa botlhaba jwa Noka ya Joredane, batho ba koo ba ne ba “mo tlisetsa monna yo o neng a le susu e bile a na le bothata jwa go bua.” (Mareko 7:31, 32) Jesu ga a ka a fodisa monna yono fela mme gape o ne a supa gore o tlhaloganya thata kafa bosusu ba ikutlwang ka teng, gore ba ka nna ba tlhabiwa ke ditlhong mo gare ga boidiidi. Baebele e re bolelela gore Jesu o ne a tsaya monna yo o susu “a mo tlosa mo boidiiding a mo isa kwa thoko” mme a mo fodisa. Le fano gape, batho ba ba neng ba iponetse seo ka matlho ba ne ba “tshwarwa ke kgakge ka tsela e e sa tlwaelegang tota,” ba re: “O dirile dilo tsotlhe sentle. E bile o dira gore bosusu ba utlwe le ba ba sa kgoneng go bua ba bue.”—Mareko 7:33-37.

Go swa ditokololo: Fa Jesu a ne a le kwa Kaperenama, batho ba ne ba tla kwa go ene ka monna yo o suleng ditokololo a rapame mo bolaong. (Mathaio 9:2) Ditemana 6 go ya go 8 di tlhalosa gore go ne ga diragala eng. “[Jesu] a raya yo o suleng ditokololo a re: ‘Nanoga, tsaya bolao jwa gago, mme o ye legaeng la gago.’ Mme a tswa a ya legaeng la gagwe. Fa boidiidi bo bona seno jwa welwa ke poifo, mme jwa galaletsa Modimo, yo o neileng batho taolo e e ntseng jalo.” Kgakgamatso eno le yone e ne ya dirwa barutwa ba ga Jesu le baba ba gagwe ba le teng. Ela tlhoko gore, barutwa ba gagwe bone, ka go bo ba ne ba sa foufadiwa ke letlhoo le go tlhaola batho, ba ne ba “galaletsa Modimo” ka ntlha ya se ba neng ba se bona.

 Bolwetse: “Gape molepero mongwe a tla kwa go [Jesu], a mo rapela e bile a obile lengole, a mo raya a re: ‘Fa fela o batla, o ka nntlafatsa.’ Foo a tlhomoga pelo, mme ya re a otlolola seatla sa gagwe a mo ama, a mo raya a re: ‘Ke a batla. Ntlafala.’ Mme ka yone nako eo lepero la nyelela mo go ene.” (Mareko 1:40-42) Ela tlhoko gore Jesu ga a ka a fodisa motho yono ka go ikgolola fela mme o ne a dira jalo ka gonne a mo utlwela botlhoko tota. Akanya fela o le molepero. O ne o ka ikutlwa jang fa o ne o ka fodisiwa ka bonako o sa utlwisiwe botlhoko, o fodisiwa bolwetse bongwe jo bo botlhoko, jo bo neng bo ile jwa go golafatsa ka iketlo jwa ba jwa dira gore o nne motho yo o sa batlegeng mo setšhabeng? Ruri o ka tlhaloganya gore ke ka ntlha yang fa molepero yo mongwe yo o neng a fodisiwa ka kgakgamatso a ne a “wela ka sefatlhego fa dinaong tsa ga Jesu, a mo leboga.”—Luke 17:12-16.

Dikgobalo: Kgakgamatso ya bofelo e Jesu a e dirileng pele ga a tshwarwa a bo a bapolwa e ne e le ya go fodisa. Moaposetoloi Petere o ne a nna mafega mo go ba ba neng ba tlile go tsaya Jesu mme “e re ka a ne a tshotse tšhaka, [o ne] a e somola mme a janya motlhanka wa moperesiti yo o kwa godimo mme a kgaola tsebe ya gagwe ya moja.” (Johane 18:3-5, 10) Pego e e tshwanang le eno e e mo go Luke e re bolelela gore Jesu o ne “a ama tsebe a mo fodisa.” (Luke 22:50, 51) Tiro eno ya bopelonomi le yone e ne ya dirwa fa pele ga ditsala tsa ga Jesu mmogo le baba ba gagwe—mo lekgetlong leno, e le batshwari ba gagwe.

Ee, fa re sekaseka dikgakgamatso tsa ga Jesu ka kelotlhoko thata, re lemoga sentle bosupi jwa gore di boammaaruri. (2 Timotheo 3:16) Mme jaaka go umakilwe pelenyana, tshekatsheko e e ntseng jalo e tshwanetse go nonotsha tumelo ya rona mo tsholofetsong ya Modimo ya gore o tla fodisa batho ba ba kutlo. Baebele e tlhalosa tumelo ya Bakeresete e le “go lebelela ka tlhomamisego dilo tse di solofetsweng, pontsho e e bonalang sentle ya dilo tsa mmatota le fa di sa bonwe.” (Bahebera 11:1) Go bonala sentle gore Modimo ga a re kgothaletse gore re dumele fela kwantle ga go tlhomamisega pele kana go solofela fela gore dilo di tla diragadiwa, go na le moo, o batla gore re nne le tumelo e e nonofileng e e ikaegileng ka bosupi. (1 Johane 4:1) Fa re ntse re nna le tumelo e e ntseng jalo, re tla bona re nonofa semoyeng, re nna le botsogo jo bo botoka e bile re itumela thata.—Mathaio 5:3; Baroma 10:17.

Phodiso ya Semoya e Tshwanetse go Tla Pele!

Batho ba bantsi ba ba tsogileng sentle mo mmeleng ga ba a itumela. Bangwe ba bile ba leka go ipolaya ka go bo ba se na tsholofelo epe ka isagwe kana ka go bo ba ikutlwa ba gateletswe ke mathata. Re ka re ba digole semoyeng—seemo se mo matlhong a Modimo se leng masisi thata go feta go golafala mo mmeleng. (Johane 9:41) Ka fa letlhakoreng le lengwe, ba le bantsi ba ba golafetseng mo mmeleng, jaaka Christian le Junior ba ba umakilweng mo setlhogong se se fetileng, ba tshela matshelo a a itumetseng a a nang le bokao. Ka ntlha yang? Ka gonne ba itekanetse semoyeng e bile ba nonotshiwa ke tsholofelo e e tlhomameng e e theilweng mo Baebeleng.

Fa Jesu a ne a bua ka dilo tse rona batho re di tlhokang thata o ne a bolela jaana: “Motho o tshwanetse go tshela, e seng ka senkgwe se le sosi, fa e se ka lefoko lengwe le lengwe le le tswang ka molomo wa ga Jehofa.” (Mathaio 4:4) Ee, batho ga ba tshwane le diphologolo ka gonne ga ba tlhoke dijo tsa senama fela. E re ka re bopilwe mo “setshwanong” sa Modimo, re tlhoka dijo tsa semoya—kitso ka ga Modimo le seabe sa rona mo maikaelelong a gagwe le gore re dire go rata ga gagwe. (Genesise 1:27; Johane 4:34) Kitso ka ga Modimo e dira gore matshelo a rona a nne le bokao le gore re tlhagafale semoyeng. Mme gape e dira gore batho ba tshwanelegele botshelo jo bo sa khutleng mo lefatsheng la paradaise. Jesu o ne a re: “Seno se raya botshelo jo bo sa khutleng, go tsenya kitso ka ga gago, Modimo yo o esi wa boammaaruri, le ka ga yo o mo romileng, e bong Jesu Keresete.”—Johane 17:3.

Go botlhokwa go ela tlhoko gore batho ba ba neng ba tshela mo motlheng wa ga Jesu ba ne ba sa mmitse “Mofodisi” mme ba ne ba mmitsa “Moruti.” (Luke 3:12; 7:40) Ka ntlha yang? Ka gonne Jesu o ne a ruta batho ka tharabololo ya leruri ya mathata a batho—Bogosi jwa Modimo. (Luke 4:43; Johane 6:26, 27) Puso eno ya selegodimo e eteletswe pele ke Jesu Keresete e tla busa lefatshe lotlhe mme e diragatse ditsholofetso tsotlhe tse di mo Baebeleng tse di malebana le kafa batho ba ba siameng le legae la bone la lefatshe le tla tsosolosiwang ka botlalo le ka bosakhutleng ka teng. (Tshenolo 11:15) Ke gone ka moo Jesu mo thapelong ya gagwe ya sekao, a ileng a umaka go diragadiwa ga go rata ga Modimo mo lefatsheng fa a sena go bua ka go tla ga Bogosi.—Mathaio 6:10.

 Mo bathong ba le bantsi ba ba nang le bogole, go ithuta ka tsholofelo eno e e kgatlhang go ile ga dira gore dikeledi tsa bone tsa bohutsana di fetoge dikeledi tsa boipelo. (Luke 6:21) Tota e bile, Modimo ga a ne a fedisa bolwetse le bogole fela; gape o tla nyeletsa sone se se dirang gore batho ba boge—boleo ka bojone. Aitsane, Isaia 33:24 le Mathaio 9:2-7, tse di nopotsweng pelenyana, di amanya bolwetse le seemo sa rona sa go nna baleofi. (Baroma 5:12) Ka gone, fa boleo bo setse bo fentswe, kgabagare batho ba tla itumelela “kgololesego e e galalelang ya bana ba Modimo,” kgololesego e e akaretsang go itekanela mo mogopolong le mo mmeleng.—Baroma 8:21.

Go motlhofo gore batho ba ba nang le botsogo jo bo siameng ba se ka ba anaanela botsogo jwa bone. Mme ga go a nna jalo ka ba ba bogang ka ntlha ya dilo tse di utlwisang botlhoko tse di bakwang ke bogole. Ba itse sentle gore boitekanelo le botshelo di botlhokwa jang le gore dilo di ka fetoga ka bonako e bile go sa lebelelwa. (Moreri 9:11) Ka gone, re solofela gore babadi ba rona ba ba nang le bogole bongwe ba tla sekaseka ka kelotlhoko ditsholofetso tse di itumedisang tsa Modimo tse di kwadilweng mo Baebeleng. Jesu o ne a ntsha botshelo jwa gagwe go tlhomamisa gore di a diragadiwa. Re ka nna le tlhomamisetso efe e e botoka go gaisa eno?—Mathaio 8:16, 17; Johane 3:16.

[Ntlha e e kwa tlase]