‘Ba ne Ba ya Jalo Kwa Tlase’

“Metsi a a gogomogang a ne a ba khurumetsa; ba ne ba ya kwa botennyeng jaaka leje.”

KA MAFOKO ao, Moshe le Baiseraele ba ne ba opela ba itumelela go tshedisiwa Lewatle le Lehibidu le go nyelediwa ga baba ba bone ba Baegepeto e bong Faro le mephato ya gagwe ya sesole ba ba neng ba ba beile lengole.—Ekesodo 15:4, 5.

Mongwe le mongwe yo o neng a bona tiragalo eo e e gakgamatsang, o ne a lemoga sentle se e neng e se ruta. Ga go na motho ope yo o ka kgonang go tsuologela kana go gana taolo ya ga Jehofa a bo a tshela. Le fa go ntse jalo, dikgwedi di sekae fela morago go moo, Baiseraele bangwe ba maemo a a kwa godimo—Kora, Dathane, Abirame le batshegetsi ba bone ba le 250—ba ne ba tsuologela phatlalatsa taolo e Moshe le Arone ba neng ba e filwe ke Modimo.—Dipalo 16:1-3.

Ka taelo ya ga Jehofa, Moshe o ne a tlhagisa Baiseraele gore ba tswe mo megopeng ya batsuolodi bao. Dathane le Abirame ba ba neng ba potapotilwe ke ba malapa a bone, ba ne ba nna tlhogoethata mme ba gana go reetsa. Morago ga moo Moshe o ne a bolela gore Jehofa o ne a tla bontsha batho sentle ka tsela ya Gagwe gore banna bano ba ne ba “tshwere Jehofa ka go tlhoka tlotlo.” Ka nako eo, Jehofa a dira gore lefatshe le fatoge fa tlase ga bone. “Ba fologela jalo kwa tlase, le botlhe ba e neng e le ba bone ba tsena ba tshela mo teng ga Sheole, mme lefatshe la ba bipa.” Go tweng ka Kora le batsuolodi ba bangwe? “Molelo wa tswa kwa go Jehofa wa laila banna ba ba makgolo a mabedi le masome a matlhano ba ba isang maswalo.”—Dipalo 16:23-35; 26:10.

Faro le mephato ya gagwe mmogo le batsuolodi bale ba kwa nageng, botlhe ba ile ba nyelela ka gonne ga ba a ka ba tlotla taolo ya ga Jehofa le kafa a amegang ka batho ba gagwe ka teng. Ka jalo, go botlhokwa thata gore botlhe ba ba batlang go sirelediwa ke Jehofa mo metlheng eno e e thata ba ithute ka ga Jehofa ba bo ba mo ikobele ka e le “Mogodimodimo” le “Mothatayotlhe.” Ka go dira jalo, ba ka tlhatswiwa pelo ke mafoko ano a ga Jehofa: “Go tla wa sekete fa thoko ga gago le dikete di le lesome kafa seatleng sa gago sa moja; wena ga go kitla go go atamela. O tla leba ka matlho a gago fela mme o bone tefetso ya baikepi. Ka gonne o ne wa re: ‘Jehofa ke botshabelo jwa me,’ o dirile Mogodimodimo bonno jwa gago.”—Pesalema 91:1, 7-9.