A o Tla Nna o Bolokile Bothokgami Jwa Gago?

GO LETSE go sule dithaga tse kae maabane? Ga go na ope yo o itseng, mme gongwe ke ba se kae fela ba ba tshwenyegang ka seo—dinonyane di dintsi thata. Le fa go ntse jalo, Jehofa ene o a tshwenyega. Jesu o ne a bua ka dinonyane tseno tse go lebegang e se tsa botlhokwa fa a ne a raya barutwa ba gagwe a re: “Ga go le fa e le nngwe ya tsone e e tla welang fa fatshe kwantle ga kitso ya ga Rraalona.” O ne a oketsa jaana: “Se boifeng: lo botlhokwa go feta dithaga tse dintsi.”—Mathaio 10:29, 31.

Moragonyana barutwa ba ne ba tlhaloganya sentle go feta pele kafa Jehofa a ba tsayang ba le botlhokwa ka gone. Mongwe wa bone e bong moaposetoloi Johane o ne a kwala jaana: “Lorato lwa Modimo lo ne lwa bonadiwa ka seno mo go rona, ka gonne Modimo o ne a romela Morwawe yo o tsetsweng a le esi mo lefatsheng gore re bone botshelo ka ene.” (1 Johane 4:9) Jehofa ga a rulaganya thekololo fela mme gape o tlhomamisetsa mongwe le mongwe wa batlhanka ba gagwe jaana: “Ruri ga ke na ke go tlogela ka gope le fa e le go go latlha ka gope.”—Bahebera 13:5.

Go bonala sentle gore lorato lo Jehofa a ratang batho ba gagwe ka lone lo nitame. Le fa go ntse jalo, potso ke gore, ‘A re rata Jehofa thata mo e leng gore le ka motlha re ka se ka ra mo tlogela?’

Maiteko a ga Satane a go Fedisa Bothokgami Jwa Rona

Fa Jehofa a ne a bontsha Satane bothokgami jwa ga Jobe, Satane o ne a re: “A Jobe o ne a ka go obamela fela a sa boelwe ke sepe?” (Jobe 1:9, Today’s English Version) O ne a kaya gore batho ba ikanyega mo Modimong fela ka gonne ‘go na le melemo mengwe e ba tla e bonang.’ Fa go ka bo go ntse jalo, bothokgami jwa Mokeresete mongwe le mongwe fela bo ne bo ka fedisiwa—fa fela go dirisitswe thaelo e e gogelang sentle.

Mo kgannyeng ya ga Jobe, kwa tshimologong Satane o ne a bolela gore Jobe o ne a tla kgaotsa go ikanyega mo Modimong fa a ka latlhegelwa ke dilo tsa gagwe tse a neng a di rata thata. (Jobe 1:10, 11) Fa dilo di sa diragale go ya ka tatofatso e e bosula eno, Satane o ne a re: “Motho a ka tlogela sengwe le sengwe gore a nne a tshela.” (Jobe 2:4, TEV) Le fa batho bangwe ba ka dira go ya ka maiphako a ga Satane, Jobe ene o ne a gana go tlogela bothokgami jwa gagwe. Pego ya hisitori e supela seo. (Jobe 27:5; 42:10-17) A le wena o ikanyega fela jalo? Kgotsa o ne o ka letla Satane a fedisa bothokgami jwa gago? Akanya ka seemo sa gago fa re ntse re sekaseka dintlha dingwe tsa boammaaruri tse di amang Mokeresete mongwe le mongwe.

Moaposetoloi Paulo o ne a dumela gore boikanyegi jwa boammaaruri jwa Bokeresete e ka nna jo bo nonofileng tota. O ne a kwala jaana: “Ke tlhatswegile pelo gore le fa e le loso kgotsa botshelo . . . kgotsa dilo tse jaanong di leng fano kgotsa dilo tse di tlang . . . kgotsa sebopiwa le fa e le sefe se sengwe, ga di ka ke tsa kgona go re kgaoganya le lorato lwa Modimo lo lo mo go Keresete Jesu Morena wa rona.” (Baroma 8:38, 39) Le rona re ka tlhatswega pelo jalo fa lorato lo re ratang Jehofa ka lone lo nonofile. Lorato lo lo ntseng jalo ke sebofo se se ka se kang sa senngwa, se le loso tota lo ka se kang lwa se fenya.

Fa re na le kamano e e ntseng jalo le Modimo, le  ka motlha re ka se ipotse jaana, ‘A ke tla bo ke sa ntse ke direla Jehofa mo dingwageng di se kae tse di tlang?’ Go sa tlhomamisege ka tsela eo go ka kaya gore boikanyegi jwa rona mo Modimong bo ikaegile ka se se ka re diragalelang mo botshelong. Bothokgami jwa boammaaruri ga bo amiwe ke maemo a ka fa ntle. Bo ikaegile ka gore o motho wa mofuta mang ka fa teng. (2 Bakorintha 4:16-18) Fa re rata Jehofa ka pelo yotlhe, le ka motlha re ka se mo swabise.—Mathaio 22:37; 1 Bakorintha 13:8.

Le fa go ntse jalo, ga re a tshwanela go lebala gore ka metlha Satane o leka go fedisa bothokgami jwa rona. A ka nna a re raela gore re ineele mo dikeletsong tsa nama, re ineele fa re gatelelwa ke balekane, kgotsa re letlelele gore bothata bope fela bo re tlogedise boammaaruri. Lefatshe le le tlhoboganeng le Modimo le dirisiwa thata ke Satane mo tlhaselong eno, le mororo go sa itekanelang ga rona go dira gore tiro ya gagwe e nne motlhofo. (Baroma 7:19, 20; 1 Johane 2:16) Le fa go ntse jalo go na le dilo di le mmalwa tse di ka re thusang mo ntweng eno, mme sengwe sa tsone se se ka re thusang thata ke lebaka la go bo re itse maano a ga Satane.— 2 Bakorintha 2:11.

Maano a ga Satane ke afe? Mo lekwalong le Paulo a neng a le kwalela Baefeso o ne a a tlhalosa e le “maano a boferefere.” (Baefeso 6:11) Satane o dirisa maretshwa go fedisa bothokgami jwa rona. Se se itumedisang ke gore re kgona go lemoga ditiro tseno tsa boferefere ka gonne mekgwa ya ga Diabolo e kwadilwe mo Lefokong la Modimo. Maiteko a ga Satane a go fedisa bothokgami jwa ga Jesu le Jobe a bontsha dingwe tsa ditsela tse a di dirisang go leka go fedisa bothokgami jwa rona jwa Bokeresete.

Bothokgami Jwa ga Jesu Bo ne Bo ka Se ka Jwa Fedisiwa

Fa Jesu a ne a simolola bodiredi jwa gagwe, Satane o ne a nna le sebete sa go raela Morwa Modimo ka go mo gwetlha gore a fetole leje senkgwe. A boferefere! Jesu o ne a feditse malatsi a le 40 a sa je, ka jalo ga go pelaelo gore o ne a tshwerwe ke tlala thata. (Luke 4:2, 3) Satane o ne a akantsha gore Jesu a kgotsofatse keletso ya gagwe ya tlholego ka yone nako eo, ka tsela e e neng e sa tsamaisane le thato ya ga Jehofa. Gompieno le gone dikgopolo tse di tsietsang tsa lefatshe di kgothaletsa batho gore ba ikgotsofatse ka bonako, ba sa akanye sepe ka ditlamorago. Molaetsa ke gore, ‘O se tlhoka gone jaanong,’ kgotsa, ‘Se dire fela!’

Fa Jesu a ka bo a ile a fedisa tlala e e neng e mo tshwere a sa akanyetse ditlamorago, Satane o ka bo a kgonne go dira gore Jesu a tlogele bothokgami jwa gagwe. Jesu o ne a leba dilo ka tsela ya semoya, mme a araba jaana a sa okaoke: “Go kwadilwe ga twe, ‘Motho ga a a tshwanela go tshela ka senkgwe se le sosi.’”—Luke 4:4; Mathaio 4:4.

Go tswa foo Satane o ne a fetola maano a gagwe. Diabolo o ne a sokamisa Dikwalo tse Jesu a neng a ntse a nopola mo go tsone, mme a mo kgothaletsa gore a itige a le mo setlhoeng sa tempele. Satane o ne a re, ‘Moengele mongwe o tla tshwanelwa ke go go sireletsa.’ Jesu o ne a sa ikaelela go batla gore Rraagwe a mo sireletse ka kgakgamatso, fela gore a tlhagelele. Jesu o ne a re: “O se ka wa leka Jehofa Modimo wa gago.”—Mathaio 4:5-7; Luke 4:9-12.

Leano la bofelo le Satane a neng a le dirisa le ne le sa kekologe. O ne a leka go dira tumalano le Jesu ka go re o tla mo naya lefatshe lotlhe le kgalalelo ya lone fa ene a ka mo direla tiro e le nngwe fela ya kobamelo. E ne e batlile e le gone gotlhe mo Satane  a neng a ka go mo naya. Mme Jesu o ne a ka dira jang tiro ya kobamelo fa pele ga mmaba yo mogolo wa ga Rraagwe? Ruri o ne a ka se ka a e dira! Jesu o ne a araba jaana: “Jehofa Modimo wa gago ke ene yo o tshwanetseng go mo obamela, e bile ke ene a le esi yo o tshwanetseng go mo direla tirelo e e boitshepo.”—Mathaio 4:8-11; Luke 4:5-8.

Fa Satane a sena go palelwa ka makgetlho ao a mararo, o ne ‘a boa ka morago a tswa mo go Jesu go fitlha ka nako e nngwe e e mo siametseng.’ (Luke 4:13) Seno se kaya gore ka dinako tsotlhe Satane o ne a batla sebaka sa go leka bothokgami jwa ga Jesu. Nako e e mo siametseng e ne ya nna dingwaga di ka nna pedi le sephatlo moragonyana fa Jesu a ne a simolola go thusa barutwa ba gagwe go ipaakanyetsa loso lwa gagwe lo lo neng lo le gaufi. Moaposetoloi Petere o ne a re: “Ikutlwele botlhoko, Morena; ga o na go nna le phelelo eno ka gope.”—Mathaio 16:21, 22.

A go ka direga gore kgakololo eno e e neng e newa ka maitlhomo a mantle mme e sa siama e ne e ka utlwala e siame mo go Jesu, e re ka e ne e tswa mo go mongwe wa barutwa ba gagwe? Ka yone nako eo Jesu o ne a lemoga gore mafoko ao a ne a bontsha se Satane a se batlang, e seng Jehofa. Keresete o ne a araba jaana a sa okaoke: “Mpota kafa morago, Satane! O sekgopi mo go nna, ka gonne ga o akanye dikakanyo tsa Modimo, mme tsa batho.”—Mathaio 16:23.

E re ka Jesu a rata Jehofa ka lorato lo lo nnelang ruri, Satane ga a ka a kgona go fedisa bothokgami jwa gagwe. Go ne go se na sepe se Diabolo a neng a ka se mo fa, kgotsa a mo leka ka sone, le fa se ne se ka nna botlhoko jang, se se neng se ka koafatsa boikanyegi jwa ga Jesu mo go Rraagwe wa selegodimo. A le rona re tla ititaya sehuba fela jalo fa maemo a dira gore go nne thata go boloka bothokgami jwa rona? Sekai sa ga Jobe se tla re thusa gore re tlhaloganye botoka dikgwetlho tse re ka lebanang le tsone.

Go Ikanyega Fa re Le mo Mathateng

Jaaka Jobe a ile a lemoga, re ka welwa ke mathata nako nngwe le nngwe. E ne e le monna yo o nang le lenyalo le le itumetseng le bana ba le lesome e bile a na le thulaganyo e e siameng ya ditiro tsa semoya. (Jobe 1:5) Le fa Jobe a ne a sa itse, bothokgami jwa gagwe mo Modimong bo ne jwa nna kgang ya moruthutha kwa legodimong, mme Satane o ne a ikemisetsa go fedisa bothokgami jwa gagwe ka tsela epe fela e a neng a ka e dirisa.

Go ise go ye kae, Jobe o ne a felelwa ke khumo ya gagwe. (Jobe 1:14-17) Le fa go ntse jalo, bothokgami jwa ga Jobe bo ne jwa fenya teko eno ka gonne o ne a ise a ke a ikanye madi. Jobe o ne a bolela jaana, a gopola nako ya fa a ne a sa ntse a humile: “Fa ke beile gouta jaaka tshepo ya me, . . . fa ke ne ke tle ke ipele ka gonne dithoto tsa me di le dintsi, . . . seo le sone e ne e tla nna tlolo . . . , gonne ke ne ke tla bo ke itatotse Modimo wa boammaaruri yo o kwa godimo.”—Jobe 31:24, 25, 28.

Le gompieno go ka direga gore ka ponyo ya leitlho re latlhegelwe ke mo e batlileng e nna sengwe le sengwe se re nang le sone. Rakgwebo mongwe yo e leng Mosupi wa ga Jehofa o ne a amogwa madi a mantsi thata ka boferefere, mme a batla a sala a iphotlhere. O dumela jaana a sa fitlhe: “Ke ile ka batla ke bolawa ke pelo. E bile tota, ke akanya gore e ka bo e mpolaile fa e ka bo e se ka kamano e ke nang le yone le Modimo. Le fa go ntse jalo, tiragalo eno e ne ya mpontsha gore dilo tsa semoya di ne di sa tle pele mo botshelong jwa me. Monate wa go dira madi o ne o batla o fekeetsa sengwe le sengwe.” Fa e sa le ka nako eo, Mosupi yono ga a tlhole a tseneletse thata mo kgwebong, mme ka metlha o direla jaaka mmulatsela yo o thusang, a dirisa diura di le 50 ka kgwedi kgotsa go feta mo bodireding jwa Bokeresete. Le fa go ntse jalo, mathata a mangwe a ka nna botlhoko thata go feta go latlhegelwa ke dithoto.

E rile fela Jobe a fetsa go utlwa dikgang tsa gore o latlhegetswe ke dithoto tsa gagwe a bolelelwa gore bana ba gagwe ba ba lesome ba ne ba sule. O ne a ema ka la gore: “A leina la ga Jehofa le nne le bakwe.” (Jobe 1:18-21) A re ne re tla nna re bolokile bothokgami jwa rona fa re ne re ka swelwa ka tshoganetso ke maloko a le mmalwa a lelapa la rona? Francisco, molebedi mongwe wa Mokeresete kwa Spain, o ne a swelwa ke bana ba gagwe ba babedi mo kotsing e e maswe ya bese. O ne a ikgomotsa ka go atamalana le Jehofa le go oketsa bodiredi jwa gagwe jwa Bokeresete.

Tota le morago ga gore Jobe a swelwe ke bana ka tshoganetso jalo, mathata a gagwe a ne a ise a fele. Satane o ne a mo itaya ka bolwetse jo bo ferosang sebete, jo bo botlhoko. Ka nako eo, mosadi wa ga  Jobe o ne a mo naya kgakololo e e sa siamang. O ne a mo emelela jaana: “Tlhapatsa Modimo mme o swe!” Jobe o ne a itlhokomolosa kgakololo ya gagwe, mme ga a ka a “leofa ka dipounama tsa gagwe.” (Jobe 2:9, 10) Bothokgami jwa gagwe bo ne bo ikaegile ka kamano ya gagwe le Jehofa e seng ka tshegetso ya ba lelapa la gagwe.

Flora, yo monna wa gagwe le morwawe yo mogolo ba neng ba tlogetse tsela ya Bokeresete dingwaga di feta di le lesome tse di fetileng, o tlhaloganya tsela e Jobe a ka tswang a ne a ikutlwa ka yone. O bolela jaana: “Go utlwisa botlhoko thata fa ka tshoganetso fela ba lelapa la gago ba kgaotsa go go ema nokeng. Mme ke ne ke itse gore ke ne nka se bone boitumelo fa ke le kwa ntle ga phuthego ya ga Jehofa. Ka jalo, ke ne ka ema ke nitame ke bo ke dira gore Jehofa a tle pele fa ke ntse ke leka go tswelela pele ke le mosadi yo o molemo le mmè yo o molemo. Ke ne ka rapela ka metlha, mme Jehofa o ne a nnonotsha. Ke nna ke itumetse ka gonne, le fa monna wa me a nkganetsa thata, ke ithutile go ikaega gotlhelele ka Jehofa.”

Leano le le latelang la ga Satane la go leka go fedisa bothokgami jwa ga Jobe le amana le balekane ba gagwe ba bararo. (Jobe 2:11-13) Go tshwanetse ga bo go ne go utlwisa botlhoko fa ba ne ba simolola go mo tshwaya diphoso. Fa a ka bo a ile a dumela dipuo tsa bone, o ka bo a ile a felelwa ke tshepo mo go Jehofa Modimo. Kgakololo ya bone e e kgobang marapo e ka bo e ile ya mo nyemisa moko le go fedisa bothokgami jwa gagwe mme leano la ga Satane le ka bo le ile la atlega.

Mo boemong jwa go dira jalo, Jobe o ne a ema ka la gore: “Nka se tlose bothokgami jwa me mo go nna go fitlha ke swa!” (Jobe 27:5) Ga a ka a re, ‘Nka se letle gore lona banna ke lona lo fedise bothokgami jwa me!’ Jobe o ne a itse gore bothokgami jwa gagwe bo ne bo ikaegile ka ene le ka lorato lo a ratang Jehofa ka lone.

O Dirisa Leano la Bogologolo go Tshwara Batho Gompieno

Satane o sa ntse a dirisa kgakololo e e sa siamang kgotsa dipuo tse di tlhabang tsa ditsala le badumedi ka rona. Fa re kgobiwa marapo ke bangwe mo teng ga phuthego re ka nyema moko motlhofo go feta fa re bogisiwa ke batho ba ba kwa ntle ga phuthego. Mogolwane mongwe wa Mokeresete yo o kileng a bo a lwa kwa bosoleng o ne a bapisa seemo seo le botlhoko jo a neng a bo utlwa fa Bakeresete bangwe ba bua dilo tse di tlhabang kgotsa ba sa mo tshware sentle. Malebana le se se diregang mo phuthegong o ne a re: “Ga ke ise ke tsamaye ke utlwe botlhoko jo bo fetang joo.”

Ka fa letlhakoreng le lengwe, re ka kgopisiwa thata ke go sa itekanelang ga badumedi ka rona gore re bo re kgaotse go bua le bangwe ba bone kgotsa re kgaotse le go ya dipokanong tsa Bokeresete. Go okobatsa botlhoko jo re bo utlwileng go ka tswa go lebega e le sone selo sa botlhokwa thata. Mme go ne go ka utlwisa botlhoko tota go leba dilo ka tsela e e ntseng jalo ya go sa akanyetse dilo kwa teng re bo re letla kamano ya rona le Jehofa, e e leng tlhwatlhwakgolo thata mo go rona, e koafadiwa ke se batho ba bangwe ba se dirang kgotsa ba se buang. Fa re ka letla seo se direga, re tla bo re ipaya mo kotsing ya go tsiediwa ke maano a bogologolo a ga Satane.

Go a utlwala gore re bo re ka lebelela gore batho ba ba mo phuthegong ya Bokeresete ba itshware ka tsela e e molemo thata. Mme fa re lebelela go le gontsi thata mo badumeding ka rona, ba ba sa ntseng ba sa itekanela, re tla itaya se fololetse. Jehofa ene ga a lebelele gore batlhanka ba gagwe ba dire dilo tse ba ka se kang ba di kgona. Fa re etsa sekao sa gagwe, re tla kgona go itshokela go sa itekanelang ga bone. (Baefeso 4:2, 32) Moaposetoloi Paulo o ne a gakolola jaana: “Fa o galefile, o se ka wa letla kgalefo eo e go leofisa; letsatsi le se ka la phirima o ntse o galefile; se bulele diabolo phatlha.”—Baefeso 4:26, 27, The New English Bible.

Jaaka Baebele e bontsha sentle, Satane o dirisa maano a mantsi a a farologaneng go batla tsela e a ka fedisang bothokgami jwa Mokeresete ka yone—fa e le gore a ka kgona. Mangwe a maano a gagwe a raela batho go kgotsofatsa dikeletso tsa boleo, mme a mangwe a baka kutlobotlhoko. Go ya ka tlhaloso e e fa godimo, o ka kgona go bona gore ke ka ntlha yang fa le ka motlha o sa tshwanela go iphitlhela o tshoganyeditswe. E re ka o rata Modimo ka lorato lo lo tswang pelong, ititeye sehuba gore o tla supa fa Diabolo e le moaki mme o ipedise pelo ya ga Jehofa. (Diane 27:11; Johane 8:44) Gakologelwa gore le ka motlha ga re a tshwanela go tlogela bothokgami jwa boammaaruri jwa Bokeresete, le fa re ka lekwa jang.