‘Itshwarelaneng lo Gololesegile’

A O DUMELA gore Modimo o go itshwaretse maleo? Kwa United States, go bonala bontsi jwa bagolo ba dumela jalo. Dr. Loren Toussaint, yo o neng a eteletse pele patlisiso e e neng ya dirwa kwa Setheong sa Dipatlisiso ka Tsa Loago sa Yunibesithi ya Michigan, o bega gore mo Baamerikeng ba le 1 423 ba ba botsoloditsweng, mo e ka nnang diperesente di ka nna 80 tsa batho ba ba godileng ba ba fetileng dingwaga tse 45 ba ne ba bolela gore Modimo o ba itshwaretse maleo.

Le fa go ntse jalo, go a kgatlha gore ke diperesente di le 57 fela tsa batho ba ba botsoloditsweng ba ba neng ba bolela gore bone ba itshwarela ba bangwe. Dipalo tseo di re gakolola mafoko a ga Jesu a mo Therong ya Kwa Thabeng fa a ne a re: “Fa lo itshwarela batho ditlolo tsa bone, Rraalona wa selegodimo le ene o tla lo itshwarela; mme fa lo sa itshwarele batho ditlolo tsa bone, le Rraalona ga a na go itshwarela ditlolo tsa lona.” (Mathaio 6:14, 15) Ee, gore Modimo a re itshwarele maleo, go ya bokgakaleng jo bo rileng, go ikaegile ka gore rona re iketleeditse go le kana kang go itshwarela ba bangwe.

Moaposetoloi Paulo o ne a gakolola Bakeresete ba kwa Kolosa ka molaomotheo ono. O ne a ba kgothatsa jaana: “Tswelelang lo iphapaanyelana e bile lo itshwarelana lo gololesegile fa ope a na le lebaka la go ngongorega ka yo mongwe. Le eleng jaaka Jehofa a ne a lo itshwarela a gololesegile, jalo le lona dirang jalo.” (Bakolosa 3:13) Gone ke boammaaruri gore ga go motlhofo ka metlha go dira seno. Ka sekai, fa e le gore ke wena o sa tshwarwang sentle kana o tewang mafoko a a seng monate, go ka nna thata gore o itlhokomolose seo.

Le fa go ntse jalo, melemo ya go itshwarela ba bangwe e mentsi. Dr. David R. Williams, yo e leng moithutaloago, o ne a bolela jaana malebana le patlisiso e a e dirileng: “Re fitlhetse gore mo gare ga Baamerika ba dingwaga tsa bogareng le ba ba godileng go feta moo, ba ba itshwarelang ba bangwe ba na le botsogo jo bontle jwa tlhaloganyo go feta ba ba sa itshwareleng ba bangwe.” Seo se dumelana le mafoko a ga Kgosi Solomone yo o botlhale, yo o neng a kwala jaana dingwaga di ka nna 3 000 tse di fetileng: “Pelo e e ritibetseng ke botshelo jwa setshedi sa senama.” (Diane 14:30) E re ka go nna le moya wa go rata go itshwarela ba bangwe go dira gore re nne le kamano e ntle le Modimo le baagelani ba rona, re na le lebaka le le utlwalang la go batla go itshwarelana ka kgololesego go tswa pelong.—Mathaio 18:35.