Baitshepi ba Boammaaruri Ba ka Go Thusa Jang?

LEFOKO la Segerika le le ranotsweng go twe “moitshepi” mo Dikwalong le ne le lebisitse kwa go mang? An Expository Dictionary of New Testament Words, e bolela jaana: “Fa le dirisiwa mo bontsing, jaaka fa go buiwa ka badumedi, le a bo le bua ka bone botlhe mme le sa bue fela ka batho ba ba boitshepo ka tsela e e sa tlwaelegang kgotsa ba e rileng ba sena go swa ba itsiwe ka ditiro tse di sa tlwaelegang tsa boitshepo.”

Ka jalo moaposetoloi Paulo o ne a bitsa Bakeresete botlhe ba bogologolo a re ke baitshepi ba boammaaruri. Ka sekai, mo lekgolong la ntlha la dingwaga C.E. o ne a kwalela “phuthego ya Modimo e e kwa Korintha, mmogo le baitshepi botlhe ba ba mo [porofenseng ya Roma ya] Akaia yotlhe.” (2 Bakorintha 1:1) Moragonyana, Paulo o ne a kwalela “botlhe ba ba mo Roma ba e leng baratwa ba Modimo, ba ba biditsweng gore ba nne baitshepi.” (Baroma 1:7) Go bonala sentle gore baitshepi bano ba ne ba ise ba swe, le gone ba ne ba sa tlhaolwa mo gare ga badumedi ba bangwe ka ntlha ya bomolemo jo bo tlhomologileng. Ba ne ba tlhaolwa e le baitshepi ka mabaka afe?

Ba Itshepisitswe ke Modimo

Lefoko la Modimo le bontsha gore motho ga a dirwe moitshepi ke batho kgotsa mokgatlho mongwe. Dikwalo tsa re: “[Modimo] o ne wa re boloka wa ba wa re bitsa ka pitso e e boitshepo, e seng ka ntlha ya ditiro tsa rona, mme ka ntlha ya boikaelelo jwa one le bopelonomi jo bo sa re tshwanelang.” (2 Timotheo 1:9) Moitshepi o itshepisiwa ka ntlha ya pitso ya ga Jehofa, go ya ka bopelonomi jo bo sa re tshwanelang jwa Modimo le go dumalana le boikaelelo jwa Gagwe.

Baitshepi ba phuthego ya Bokeresete ba mo ‘kgolaganong e ntšha.’ Madi a ga Jesu Keresete a a tsholotsweng a tlhomamisa kgolagano eno e bile a itshepisa batho ba ba mo go yone. (Bahebera 9:15; 10:29; 13:20, 24) E re ka ba ntlafaditswe mo matlhong a Modimo, ke ‘boperesiti jo bo boitshepo, mme ba isa ditlhabelo tsa semoya tse di amogelesegang mo Modimong ka Jesu Keresete.’—1 Petere 2:5, 9.

Go Kopa Thuso ya Baitshepi le go Buelelwa ke Bone

E re ka batho ba le dimilionemilione ba dumela gore “baitshepi” ba ka naya badumedi maatla a a kgethegileng, ba ba sisimoga ka go dirisa dilwana tsa bone kgotsa ka go ba kopa gore ba ba buelele. A Baebele e ruta jalo? Mo Therong ya ga Jesu ya mo Thabeng, o ne a ruta balatedi ba gagwe go rapela Modimo, a re: “Lo rapele ka tsela eno: ‘Rraarona yo o kwa magodimong,  a leina la gago le itshepisiwe.’” (Mathaio 6:9) Dithapelo di tshwanetse go lebisiwa kwa go Jehofa Modimo fela.

Baithutabodumedi bangwe ba leka go tshegetsa tumelo ya gore “baitshepi” ba buelela batho ka go umaka Baroma 15:30 e e reng: “Ke a lo rotloetsa, bakaulengwe, ka Morena wa rona Jesu Keresete le ka lorato lwa moya, gore lo tlhoafale le nna mo go nthapeleleng mo Modimong.” A Paulo o ne a kgothaletsa badumedi bao gore ba mo rapele kgotsa ba dirise leina la gagwe fa ba rapela Modimo? Nnyaa. Le fa Baebele e kgothaletsa gore baitshepi ba boammaaruri ba rapelelwe, ga go na gope fa Modimo a re laelang gore re rapele baitshepi bao kgotsa re rapele ka bone.—Bafilipi 1:1, 3, 4. 

Le fa go ntse jalo, Modimo o tlhomile Mmueledi wa dithapelo tsa rona. Jesu Keresete o ne a re: “Ke nna tsela le boammaaruri le botshelo. Ga go na ope yo o tlang kwa go Rara fa e se ka nna.” Gape Jesu o ne a re: “Le fa e le eng se lo se kopang ka leina la me, ke tla se dira, gore Rara a tle a galalediwe ka ga Morwa. Fa lo kopa sengwe ka leina la me, ke tla se dira.” (Johane 14:6, 13, 14) Re ka tshepa gore Jehofa o iketleeditse go utlwa dithapelo tse di rapelwang mo leineng la ga Jesu. Baebele e bolela jaana malebana le Jesu: “[O kgona] go boloka ka botlalo ba ba atamelang Modimo ka ene, ka gonne ka metlha o a tshela gore a tle a ba rapelele.”—Bahebera 7:25.

Fa e le gore Jesu o iketleeditse go re buelela, ke ka ntlha yang fa gantsi baobamedi ba Labokeresete ba dirisa maina a “baitshepi” fa ba rapela? Mokwalahisitori Will Durant o bontsha kwa mokgwa ono o simologileng teng mo bukeng ya gagwe ya The Age of Faith. Le fa Durant a bontsha gore Modimo Mothatayotlhe o ne a boifiwa mme go ne go lebega go le motlhofo go bua le Jesu, o bolela jaana: “Motho o ne a se ke a nna le sebete sa go bua le [Jesu] ka tlhamalalo mme a tlhokomologile gotlhelele Dithuto Tsa Gagwe Tsa Kwa Thabeng. Go ne go lebega go le molemo bogolo gore motho a rapele moitshepi yo go neng go tlhomamisega gore o kwa legodimong ka go bo a tlhomilwe go nna moitshepi, le go mo rapela gore a mmuelele mo go Keresete.” A go tshwenyega jalo ga batho go a utlwala?

Baebele e re ruta gore ka Jesu re ka nna le ‘kgololesego ya go bua le go atamela ka tshepo’ fa re rapela Modimo. (Baefeso 3:11, 12) Modimo Mothatayotlhe ga a kgakala thata le batho gore a ka utlwa dithapelo tsa rona. Mopesalema Dafide o  ne a rapela jaana ka tshepo: “Wena Moutlwi wa thapelo, batho ba nama yotlhe ba tla tla kwa go wena.” (Pesalema 65:2) Jehofa ga a neye maatla ka dilwana tsa “baitshepi” ba ba suleng, go na le moo o tshololela moya wa gagwe o o boitshepo mo bathong ba ba mo o kopang ka tumelo. Jesu o ne a baya mabaka jaana: “Fa lona, le mororo lo le boikepo, lo itse kafa lo ka nayang bana ba lona dimpho tse di molemo ka gone, a bo Rara yo o kwa legodimong bogolo jang a tla naya moya o o boitshepo ba ba mo kopang!”—Luke 11:13.

Seabe sa Baitshepi

Baitshepi ba Paulo a neng a ba kwalela makwalo ba ne ba swa makgolo a le mantsi a dingwaga a a fetileng mme moragonyana ba ne ba tla amogela “serwalo sa botshelo,” e leng go tsosediwa kwa legodimong. (Tshenolo 2:10) Baobamedi ba ga Jehofa Modimo ba lemoga gore go sisimoga baitshepi bano ba boammaaruri ga se ga Dikwalo e bile ga go ka ke ga sireletsa motho mo bolwetseng, mo masetlapelong a tlholego, mo mathateng a itsholelo, mo botsofeng kgotsa mo losong. Ka gone, o ka nna wa ipotsa gore, ‘A tota baitshepi ba Modimo ba amega ka rona? A re tshwanetse go lebelela gore ba re direle dilo dingwe?’

Baitshepi ba ne ba tlhagelela thata mo boporofeting jo bo neng bo kwadilwe ke Daniele. Mo lekgolong la borataro la dingwaga B.C.E., o ne a bona ponatshegelo e e amang maikutlo, e tiragatso ya yone e fitlhang le mo motlheng wa rona. Go ne ga tswa dibatana di le nnè tse di boifisang mo lewatleng, di tshwantshetsa dipuso tsa batho tse di sa kgoneng go naya batho dilo tse ba di tlhokang. Go tswa foo Daniele o ne a porofeta jaana: “Mme baitshepi ba Mogodimodimo ba tla amogela bogosi, mme ba tla rua bogosi ka bosakhutleng, le eleng ka bosakhutleng mo godimo ga metlha ya bosakhutleng.”—Daniele 7:17, 18.

Paulo o ne a tlhomamisa ‘boswa jono jwa baitshepi,’ jwa go nna baruaboswa mmogo le Keresete kwa magodimong. (Baefeso 1:18-21) Madi a ga Jesu a ne a bulela baitshepi ba ba 144 000 tsela ya gore ba tsosediwe mo kgalalelong ya legodimo. Moaposetoloi Johane o ne a bolela jaana: “Go itumela e bile go boitshepo motho yo o nang le seabe mo tsogong ya ntlha; loso lwa bobedi ga lo na taolo mo go bone, mme ba tla nna baperesiti ba Modimo le ba ga Keresete, mme ba tla busa e le dikgosi le ene ka dingwaga di le sekete.” (Tshenolo 20:4, 6; 14:1, 3) Mo ponatshegelong Johane o ne a utlwa dibopiwa tse dintsi tsa kwa legodimong di opela jaana fa pele ga ga Jesu yo o galaleditsweng: “Ka madi a gago o ne wa rekela Modimo batho ba tswa mo lotsong longwe le longwe le teme le batho le setšhaba, mme wa ba dira gore ba nne bogosi le baperesiti ba Modimo wa rona, mme ba tla busa lefatshe e le dikgosi.” (Tshenolo 5:9, 10) A bo seo se kgothatsa jang ne! Jehofa Modimo ka boene o tlhophile banna le basadi bano ka kelotlhoko. Mo godimo ga moo, ba ntse ba direla ka boikanyegi mo lefatsheng, ba lebana le mo e ka nnang mathata otlhe a batho ba lebanang le one. (1 Bakorintha 10:13) Ka jalo re ka tshepa gore baitshepi bano ba ba tsositsweng e tla nna babusi ba ba pelotlhomogi le ba ba kutlwelobotlhoko, ba akanyetsa makoa le ditlhaelo tsa rona.

Masego a Puso ya Bogosi

Puso ya Bogosi e tla tloga e tsaya kgato go fedisa boikepo jotlhe le go boga gotlhe mo lefatsheng. Ka nako eo, batho ba tla atamalana le Modimo go feta le fa e le leng pele. Johane o ne a kwala jaana: “Morago ga moo ka utlwa lentswe le le kwa godimo le tswa mo setulong sa bogosi le re: ‘Bona! Mogope wa Modimo o mo bathong, mme o tla aga le bone, mme ba tla nna batho ba gagwe. Mme Modimo ka boene o tla nna le bone.’” Seno se tla tlisetsa batho masego a magolo ka gonne boporofeti bo tswelela jaana: “O tla phimola dikeledi tsotlhe mo matlhong a bone, mme loso lo tla bo lo seyo, le fa e le khutsafalo le  fa e le selelo le fa e le botlhoko di tla bo di sa tlhole di le gone. Dilo tsa pele di fetile.”—Tshenolo 21:3, 4.

A bo eo e tla nna nako e e itumedisang jang ne! Diphelelo tsa puso e e itekanetseng ya ga Keresete Jesu le baitshepi ba ba 144 000 di tlhalosiwa gape ka mafoko ano a a kwadilweng mo go Mika 4:3, 4: “Ruri [Jehofa] o tla atlhola mo gare ga ditšhaba di le dintsi, a ba a tlhamalatsa dilo malebana le ditšhaba tse di thata tse di kwa kgakala. Mme ba tla thula ditšhaka tsa bone ba di dira magale a megoma le marumo a bone ba a dira dikere tse di pomang. Setšhaba ga se kitla se tsholeletsa setšhaba se sengwe tšhaka, le gone ga ba kitla ba tlhola ba ithuta ntwa gape. Mme ruri ba tla nna, mongwe le mongwe kafa tlase ga mofine wa gagwe le kafa tlase ga setlhare sa gagwe sa mofeige, mme go tla bo go se na ope yo o ba boifisang; gonne molomo wa ga Jehofa wa masomosomo o go buile.”

Baitshepi ba laletsa batho gore ba amogele masego ao. Baitshepi ba boammaaruri ba tshwantshediwa ke monyadiwa mme ba ntse ba re: “Tla!” Temana e tswelela jaana: “Mme le fa e le mang yo o utlwang a a re: ‘Tla!’ Le fa e le mang yo o nyorilweng a a tle; le fa e le mang yo o eletsang, a a tseye metsi a botshelo mahala.” (Tshenolo 22:17) “Metsi a botshelo” a akaretsa eng? Sengwe se se akarediwang ke kitso e e tlhomameng ka maikaelelo a Modimo. Jesu o ne a rapela Modimo a re: “Seno se raya botshelo jo bo sa khutleng, go tsenya kitso ka ga gago, Modimo yo o esi wa boammaaruri, le ka ga yo o mo romileng, e bong Jesu Keresete.” (Johane 17:3) Re ka bona kitso eno ka go ithuta Baebele ka metlha. A bo go itumedisa jang ne go bo re kgona go dirisa Lefoko la Modimo go tlhaloganya gore tota baitshepi ke bomang le go ithuta gore o tla ba dirisa jang gore batho ba solegelwe molemo ka bosakhutleng!

[Setshwantsho mo go tsebe 4]

Paulo o ne a kwalela baitshepi ba boammaaruri makwalo a a tlhotlheleditsweng

[Setshwantsho mo go tsebe 4, 5]

Baaposetoloi ba ga Jesu ba ba ikanyegang ba ne ba nna baitshepi ba boammaaruri

[Setshwantsho mo go tsebe 6]

Re ka rapela Modimo ka Jesu Keresete re na le tshepo

[Setshwantsho mo go tsebe 7]

Baitshepi ba ba tsositsweng ba tla busa lefatshe ka bopelotlhomogi