“O Nkgogela Kafa Metsing a a Didimetseng”

MO TLELAEMETENG e e fisang ya dinaga tsa Baebele, dinku di tshwanetse go nwa metsi letsatsi le letsatsi. Ka jalo, tiro ya botlhokwa ya modisa wa dinku ke gore a neye letsomane la gagwe metsi. Ka dinako tse dingwe badisa ba gela matsomane a bone metsi mo sedibeng, ba bo ba a tshela mo megopong gore dinku di nwe. (Genesise 29:1-3) Le fa go ntse jalo, fa dipula di na, mafelo a a gaufi le melatswana le dinoka e nna ‘mafelo a a ritibetseng a boikhutso a a nang le metsi a mantsi.’—Pesalema 23:2.

Modisa yo o molemo o tshwanetse go itse gore o ka bona kae metsi le mafulo a a siametseng letsomane la gagwe. Dinku tsa gagwe di tla tshela fa a itse lefelo sentle. Dafide, yo o neng a fetsa dingwaga di le dintsi a disa dinku mo dithabeng tsa Judea, o ne a tshwantsha kaelo ya Modimo ya semoya le ya modisa yo o isang dinku tsa gagwe kwa mafulong a mantle le kwa metsing a a nayang botshelo. Go ya ka thanolo nngwe ya Baebele, Dafide o ne a re: “O nkgogela kafa metsing a a didimetseng.”—Pesalema 23:1-3, New International Version.

Dingwaga tse dintsi morago ga moo, Jehofa o ne a dirisa setshwantsho se se tshwanang, a dirisa moporofeti Esekiele. O ne a solofetsa gore o ne a tla phutha batho ba gagwe mo dinageng tse ba neng ba gasametse kwa go tsone, jaaka modisa a phutha dinku tsa gagwe. O ne a ba tlhomamisetsa jaana: “Ke tla di . . . tlisa mo lefatsheng la tsone ke bo ke di fepa mo dithabeng tsa Iseraele, fa melatswaneng.”—Esekiele 34:13.

Jehofa Modimo le ene o tshwenyegile thata ka go naya batho metsi a semoya. Buka ya Tshenolo e tlhalosa “noka ya metsi a botshelo” e e elelang e tswa mo setulong sa bogosi sa Modimo. (Tshenolo 22:1) Batho botlhe ba lalediwa go nwa mo nokeng eno. “Le fa e le mang yo o eletsang, a [ka tsaya] metsi a botshelo mahala.”—Tshenolo 22:17.

Metsi ano a botshelo a tshwantshetso a emela dithulaganyo tsa Modimo tsa botshelo jo bo sa khutleng. Mongwe le mongwe a ka simolola go nwa metsi ano ka go ‘tsenya kitso ka ga Modimo yo o esi wa boammaaruri le yo a mo romileng, e bong Jesu Keresete.’—Johane 17:3.