A o Tshwanetse go Tsaya Botshelo Motlhofo?

BATHO ba le bantsi ba kgatlhwa ke go bo ba tsewa e le batho ba ba tsayang botshelo motlhofo, ba ba ritibetseng go se letsapa lepe le le ba fisang pelo. Le fa go ntse jalo, go na le mofuta o mongwe wa go tsaya botshelo motlhofo. Baebele ya re: “Go tsaya botshelo motlhofo ga dimatla ke gone mo go tla ba senyang.” (Diane 1:32) Seo se bolelang?

Dithanolo tse dingwe tsa Baebele di ranola lefoko la ntlha la Sehebera ka mafoko a a reng “go sa kgathale” (American Standard Version) “go itshepa” (The New American Bible), le “go tsaya dilo motlhofo.” (The New English Bible) Go ya ka tsela e mafoko ano a tlhaloganngwang ka yone, go tsaya botshelo motlhofo go amanngwa le go nna bobodu le go sa kgathale mme gape go amanngwa le boeleele kgotsa bomatla.

Mo lekgolong la ntlha la dingwaga, Bakeresete ba phuthego ya kwa Laodikia ba ne gotlhelele ba sa lemoge makoa a bone a semoya kgotsa ba ne ba a tsaya motlhofo fela. Ba ne ba itshepile, ba ikgantsha ka gore ba ne “ba sa tlhoke sepe gotlhelele.” Jesu Keresete o ne a ba bontsha phoso ya bone a ba kopa gore ba tsosolose tlhoafalo ya bone ya Bokeresete.—Tshenolo 3:14-19.

Batho ba motlha wa ga Noa le bone ba ne ba tsaya botshelo motlhofo. Ba ne ba tshwaregile thata ka dilo tsa botshelo tsa lefatshe, “baa ja e bile baa nwa, banna ba nyala le basadi ba neelwa nyalong . . . , mme ba se ka ba tsaya tsia go fitlha morwalela o tla o bo o ba gogola botlhe.” Morago ga moo, Jesu o ne a oketsa jaana: “Go nna gone ga Morwa motho go tla nna jalo.”—Mathaio 24:37-39.

Boporofeti jo bo diragaditsweng jwa Baebele bo supa gore re tshela mo nakong ya “go nna gone ga Morwa motho,” e bong Jesu Keresete. E kete le ka motlha re ka se ka ra tsaya dilo motlhofo re sa kgathale kana go itshepa—e leng go tsaya dilo motlhofo ka tsela e e sa siamang.—Luke 21:29-36.