“O Nne Botlhale mo Isagweng ya Gago”

“Tsela e bontsi jwa batho ba dirisang dingwaga tsa ntlha tsa botshelo jwa bone ka yone e dira gore tsa bofelo e nne matlhotlhapelo fela.” Go ne ga rialo mokwadi mongwe wa ditlhamo wa lekgolo la bo17 la dingwaga wa Mofora e bong Jean de La Bruyère. Ee ruri, mosha yo o sa kgoneng go dira ditshwetso a ka nna a se ka a itse gore a tlhophe eng, mme a ka ikutlwa a sa kgotsofala e bile a sa itumela. Ka fa letlhakoreng le lengwe, mosha yo o tlhogoethata a ka nna a tatalala mo tseleng e e seng botlhale, e e tla dirang gore moragonyana mo botshelong a se ka a itumela. Le fa seemo e ka tswa e le sefe, motho fa a leofa ka gonne a sa dira sengwe se se siameng kgotsa ka gonne a dirile sengwe se se sa siamang, seno se ka felela ka bohutsana jo bogolo.

Phelelo eno e ka tilwa jang? Lefoko la Modimo fa le tlhagisa malebana le kotsi ya go se kgone go dira ditshwetso ga basha le ba gakolola jaana: “Gakologelwa Mmopi wa gago yo Mogolo mo malatsing a bokau jwa gago, pele ga malatsi a masetlapelo a goroga, kgotsa dingwaga di goroga tsa fa o tla bo o re: ‘Ga ke na kgatlhego mo go tsone.’” (Moreri 12:1) Fa o le mosha, tsaya dikgato o ikemiseditse gore o ithute ka “Mmopi wa gago yo Mogolo” mo bosheng jwa gago.

Ka jalo Baebele e thusa basha jang gore ba se dire dilo ka go tlhoka tlhaloganyo? E bolela jaana: “Reetsa kgakololo mme o amogele kotlhao, gore o tle o nne botlhale mo isagweng ya gago.” (Diane 19:20) Gape Baebele e bontsha sentle gore go gana botlhale jwa Modimo ka ntlha ya go bo tlhokomologa kgotsa ka ntlha ya botsuolodi jwa motho e sa le mosha kgotsa a godile go na le matswela a a botlhoko. (Diane 13:18) Ka fa letlhakoreng le lengwe, go utlwa melao ya Modimo go felela ka “boleele jwa malatsi le dingwaga tsa botshelo le kagiso,” botshelo jo bo kgotsofatsang tota.—Diane 3:2.