Ke Eng fa go Kopa Maitshwarelo go le Thata Jaana?

KA July 2000, Lekgotla le le Tlhomang Melao la Naga ya California kwa United States le ne la tlhoma molao o boikaelelo jwa one e neng e le go dira gore batho ba se ka ba bonwa molato fa ba utlwela botlhoko motho yo o gobetseng mo kotsing e ba neng ba amega mo go yone. Ke eng fa go ne go tlhomiwa molao oo? Go ne ga lemogiwa gore fa mongwe a gobala kgotsa go senyega sengwe mo kotsing, gantsi batho ba okaoka go kopa maitshwarelo e re ka ba boifa gore kwa kgotlatshekelong seo se ka tsewa e le go dumela molato. Ka fa letlhakoreng le lengwe, ba ba akanyang gore ba tshwanetse ba kopiwa maitshwarelo ka bonako ba ka kgopisega, mme kotsi e e seng ya sepe e ka fetoga kgotlhang e kgolo.

Gone ke boammaaruri gore ga o tlhoke go kopa maitshwarelo ka ntlha ya kotsi e e sa bakiwang ke wena. Mme ka dinako tse dingwe go ka nna botlhale gore o ele tlhoko se o se buang. Seane sengwe sa bogologolo sa re: “Ga go nke go tlhokega tlolo mo mafokong a mantsi, mme yo o thibang dipounama tsa gagwe o dira ka botlhale.” (Diane 10:19; 27:12) Le fa go ntse jalo, o ka nna le maitseo mme wa thusa.

A mme ga go boammaaruri gore batho ba le bantsi ga ba tlhole ba kopa maitshwarelo,  tota le fa e le kgang e e sa ameng kgotlatshekelo? Kwa gae mosadi a ka bolela jaana ka khutsafalo, ‘Le ka motlha monna wa me ga a ke a kopa maitshwarelo.’ Kwa tirong foromane e ka ngongorega ka gore, ‘Batho ba ke ba thapileng ga ba ke ba dumela gore ba dirile diphoso, mme ke ka sewelo fela ba kopang maitshwarelo.’ Kwa sekolong morutabana a ka re, ‘Bana ga ba rutiwe gore ba re intshwarele.’

Lebaka lengwe la go bo motho a okaoka go kopa maitshwarelo e ka nna ya bo e le gore o tshaba go se amogelwe. E re ka a boifa go kgaphelwa kwa thoko, a ka nna a se ka a bontsha kafa tota a ikutlwang ka teng. Aitsane, motho yo o utlwisitsweng botlhoko a ka tila gotlhelele go kopana le motho yo o mo utlwisitseng botlhoko, a dira gore go nne thata gore ba agisane.

Lebaka le lengwe le le dirang gore bangwe ba okaoke go kopa maitshwarelo e ka nna gore ga ba amege ka maikutlo a batho ba bangwe. Ba ka nna ba akanya jaana, ‘Go kopa maitshwarelo ga go kitla go dirolola phoso e ke setseng ke e dirile.’ Ba bangwe bone ba okaoka go kopa maitshwarelo ka ntlha ya ditlamorago tse di ka nnang teng. Ba ipotsa jaana, ‘A ke tla pegwa molato ke bo ke kopiwa gore ke o duelele?’ Le fa go ntse jalo, selo se segolo se se kgoreletsang motho go dumela gore o dirile phoso ke boikgodiso. Motho yo o boikgodiso thata mo a sa kgoneng go re “Intshwarele” a ka tswa tota a re, ‘Ga ke batle go itlontlolola ka go dumela gore ke dirile phoso. Seo se ka nkisa kwa tlase.’

Le fa lebaka e ka tswa e le lefe, batho ba le bantsi ba fitlhela go le thata go kopa maitshwarelo. A mme tota go a tlhokega gore motho a kope maitshwarelo? Go kopa maitshwarelo go na le melemo efe?

[Setshwantsho mo go tsebe 3]

“Bana ga ba rutiwe gore ba re intshwarele”

[Setshwantsho mo go tsebe 3]

“Batho ba ke ba thapileng ga ba ke ba dumela gore ba dirile diphoso”

[Setshwantsho mo go tsebe 3]

“Le ka motlha monna wa me ga a ke a kopa maitshwarelo”