Re ka Dira Jang Gore Jehofa a Amogele Malatsi a Botshelo Jwa Rona?

“Nako nngwe maabane morago ga tlhabo ya letsatsi le pele ga phirimo ya letsatsi, go letse go latlhegile diura di le pedi tse di tlhwatlhwakgolo, nngwe le nngwe ya tsone e na le metsotso e e botlhokwa e le masomeamarataro. Ga go na tuelo epe e e solofediwang motho yo o ka di bonang ka gonne di etse ruri!”—Lydia H. Sigourney, mokwadi mongwe wa Moamerika (1791-1865).

GO LEBEGA malatsi a botshelo jwa rona a le mmalwa fela e bile a feta ka bonako. Mopesalema Dafide o ne a akanya ka tsela e botshelo bo leng bokhutshwane ka yone mme a tlhotlheletsega go rapela jaana: “Ntire gore ke itse bofelelo jwa me, tlhe Jehofa, le selekanyo sa malatsi a me—gore ke eng, ke tle ke itse gore ke feta ka bonako go le kana kang. Bona! O dirile malatsi a me mmalwa fela; le lobaka lwa botshelo jwa me lo ntse jaaka lo e seng sepe fa pele ga gago.” Dafide o ne a amegile ka gore a tshele ka tsela e e itumedisang Modimo, a dira jalo ka se a se buang le ka se a se dirang. O ne a bolela kafa a ikaegileng ka Modimo ka teng fa a re: “Tebelelo ya me e mo go wena.” (Pesalema 39:4, 5, 7) Jehofa o ne a mo reetsa. Ruri o ne a lekanya ditiro tsa ga Dafide mme a mo duela go ya ka tsone.

Go motlhofo gore re nne re tshwaregile motsotso mongwe le mongwe mme re iphitlhele re tshelela mo lobelong e bile re na le ditiro tse dintsintsi. Seno se ka re tlhobaetsa thata, bogolo jang ka re na le dilo di le dintsi go di dira mme re na le nako e khutshwane fela e re ka di dirang ka yone. A re amega ka se Dafide a neng a amegile ka sone—gore re tshele ka tsela e Modimo a e amogelang? Eleruri Jehofa o ela mongwe le mongwe wa rona tlhoko e bile o re tlhatlhoba ka kelotlhoko. Dingwaga di ka nna 3 600 tse di fetileng, monna mongwe yo o neng a boifa Modimo e bong Jobe o ne a bolela gore Jehofa o ne a bone ditsela tsa gagwe a bo a tlhatlhoba dikgato tsa gagwe tsotlhe. Jobe o ne a ipotsa jaana: “Fa a batla gore go ikarabelwe, ke tla mo araba ke reng?” (Jobe 31:4-6, 14) Re ka kgona go dira gore malatsi a botshelo jwa rona a nne le bokao mo Modimong ka go dira gore dilo tsa semoya di tle pele mo botshelong, go ikobela ditaolo tsa gagwe le go dirisa nako ya rona ka botlhale. A re tlhatlhobeng dintlha tseno ka kelotlhoko.

Re Tshwanetse go Amega Thata ka Dilo Tsa Semoya

Go a tshwanela go bo Dikwalo tse di tlhotlheleditsweng di re rotloetsa go baya dilo tsa semoya kwa pele mo botshelong fa di re: “Lo tlhomamise dilo tse di botlhokwa thata.” Dilo tseno tse di botlhokwa ke eng? Karabo e akaretsa “kitso ya boammaaruri le temogo e e tletseng.” (Bafilipi 1:9, 10) Re tshwanetse go dirisa nako ya rona ka tsela e e botlhale gore re nne le kitso ka ga boikaelelo jwa ga Jehofa. Le fa go ntse jalo, go amega thata ka dilo tsa semoya go tla dira gore re nne le botshelo jo bo itumedisang le jo bo kgotsofatsang.

Moaposetoloi Paulo o re gakolola gore re ‘nne re tlhomamise se se amogelesegang mo Moreneng.’ Go tlhomamisa ga rona go tshwanetse ga akaretsa go tlhatlhoba maitlhomo a rona le dikeletso tsa pelo ya rona. Moaposetoloi o tswelela pele jaana: “Tswelelang lo lemoga se e leng thato ya ga Jehofa.” (Baefeso 5:10, 17) Ka jalo, ke eng se Jehofa a se amogelang? Seane sengwe sa Baebele sa re: “Botlhale ke selo se segolo mo go tsotlhe. Bapala botlhale; mme mmogo le sotlhe se o se bapalang, o bapale tlhaloganyo. Bo tseele kwa godimo, mme bo tla go godisa.” (Diane 4:7, 8) Jehofa o itumelela  motho yo o bapalang botlhale jwa bomodimo a bo a tshela tumalanong le jone. (Diane 23:15) Selo se se itumedisang ka botlhale joo ke gore ga go sepe se se ka re amogang jone kgotsa sa bo senya. E bile tota, bo re dibela le go re sireletsa ‘mo tseleng e e bosula le mo bathong ba ba buang dilo tse di sokameng.’—Diane 2:10-15.

Ka jalo a bo go le botlhale jang ne go gana tshekamelo epe ya go tsaya dilo tsa semoya motlhofo! Re tshwanetse go tlhagolela boikutlo jwa go anaanela mafoko a ga Jehofa le go mmoifa ka tsela e e siameng. (Diane 23:17, 18) Le fa gone motho a ka nna le boikutlo jono nako nngwe le nngwe mo botshelong, go molemo gore re nne le mokgwa ono o o siameng re sa le basha re bo re dira gore botho jwa rona bo dumalane le melaometheo ya Baebele. Kgosi Solomone yo o botlhale a re: “Jaanong, gakologelwa Mmopi wa gago yo Mogolo mo malatsing a bokau jwa gago.”—Moreri 12:1.

Tsela e e botlhokwa go gaisa tsotlhe ya go tlhagolela boikutlo jwa go anaanela Jehofa ke go mo rapela o le esi letsatsi le letsatsi. Dafide o ne a lemoga botlhokwa jwa go tshololela Jehofa sehuba ka gonne o ne a ikuela jaana: “A ko o utlwe thapelo ya me, tlhe Jehofa, a ko o sekegele go goa ga me ke kopa thuso tsebe. O se ka wa didimalela dikeledi tsa me.” (Pesalema 39:12) A kamano ya rona e e gaufi le Modimo e a tle e re ame thata jaana mo re felelang re tsholola dikeledi? Ee ruri, fa re nna re buisana le Jehofa ka dikgang tse di re amang thata le go tlhatlhanya ka Lefoko la gagwe, o nna gaufi le rona.—Jakobe 4:8.

Ithute go Nna Kutlo

Moshe le ene e ne e le monna wa tumelo yo o neng a lemoga gore o tshwanetse go ikaega ka Modimo. Fela jaaka Dafide, Moshe o ne a bona gore botshelo bo tletse matshwenyego. Ka jalo o ne a kopa Modimo gore a mmontshe gore ‘a bale malatsi a gagwe jang ka tsela e ka yone a tla nnang le pelo e e botlhale.’ (Pesalema 90:10-12) Motho a ka nna le pelo e e botlhale fela ka go ithuta melao le melaometheo ya ga Jehofa le go tshela tumalanong le yone. Moshe o ne a itse seno mme ka gone a leka go gatelela boammaaruri joo jo bo botlhokwa mo setšhabeng sa Iseraele ka go ba bolelela melao le ditao tsa Modimo gape pele ba gapa Naga e e Solofeditsweng. Motho ope yo Jehofa a neng a tla mo tlhopha moragonyana go nna kgosi e e busang Iseraele o ne a tshwanetse go ikwalela khopi ya Molao le go o bala ka malatsi otlhe a botshelo jwa gagwe. Ka ntlha yang? Gore a tle a ithute go boifa Modimo. Seno se ne se tla leka kgosi eo gore e kutlo go le kana kang. Se ne se tla mo sireletsa gore a se ka a ikgodisetsa bomorwarraagwe le gore a lelefatse malatsi a gagwe mo bogosing jwa gagwe. (Duteronome 17:18-20) Tsholofetso eno e ne ya bolelwa gape fa Jehofa a ne a raya Solomone morwa Dafide a re: “Fa e le gore o tla tsamaya mo ditseleng tsa me ka go boloka melao ya me le ditaolo tsa me, fela jaaka Dafide rrago a ne a tsamaya, gape ke tla lelefatsa malatsi a gago.”—1 Dikgosi 3:10-14.

Go nna kutlo ke kgang e e masisi mo Modimong. Fa re ne re ka tsaya motlhofo dilo dingwe tse Jehofa a di batlang mo go rona le melao ya gagwe jaaka e kete ga di botlhokwa, ruri o ne a tla lemoga boikutlo joo. (Diane 15:3) Go itse seno go tshwanetse ga re tlhotlheletsa go tseela dikaelo tsa ga Jehofa tsotlhe kwa godimo, le fa go ka se nne motlhofo go dira jalo ka dinako tsotlhe. Satane o dira sotlhe se a ka se kgonang go “ema tselana ya rona pele” fa re ntse re leka go latela melao le ditaelo tsa Modimo.—1 Bathesalonika 2:18.

Go botlhokwa thata gore re latele kgakololo ya Dikwalo ya gore re kopane mmogo go tla go obamela le go itumelela botsala. (Duteronome 31:12, 13; Bahebera 10:24, 25) Ka jalo re tshwanetse ra ipotsa jaana: ‘A nka kgona go ititaya sehuba le go itshoka gore ke dire se tota se leng mosola?’ Fa re tlhokomologa botsala le thuto e re e newang kwa dipokanong tsa Bokeresete fela ka gonne re leka go ema sentle mo go tsa madi seno se ka koafatsa  kamano ya rona le Jehofa. Moaposetoloi Paulo o ne a kwala jaana: “A mokgwa wa lona wa botshelo e se ka ya nna wa go rata madi, lo ntse lo kgotsofetse ka dilo tsa jaanong. Gonne [Jehofa] o rile: ‘Ruri ga ke na ke go tlogela ka gope le fa e le go go latlha ka gope.’” (Bahebera 13:5) Go utlwa ditaelo tsa ga Jehofa ka go rata go bontsha gore re dumela re sa belaele gore o tla re tlhokomela.

Jesu o ne a ithuta go nna kutlo mme a solegelwa molemo. Le rona re ka dira jalo. (Bahebera 5:8) Fa re tlhagolela go nna kutlo, go tla nna motlhofo gore re nne kutlo tota le mo dilong tse dinnye. Ke boammaaruri gore re ka nna ra tshwanelwa ke go itshokela go se tshwarwe sentle gongwe le e leng go tshwarwa setlhogo ke ba bangwe ka ntlha ya boikanyegi jwa rona. Go ka nna jalo segolobogolo kwa tirong, kwa sekolong kgotsa mo lelapeng le le kgaoganeng ka bodumedi. Le fa go ntse jalo, re gomodiwa ke mafoko a a neng a bolelelwa Baiseraele a gore fa ba ne ba ka ‘rata Jehofa ka go reetsa lentswe la gagwe le ka go mo ngaparela o ne a tla nna botshelo jwa bone le boleele jwa malatsi a bone.’ (Duteronome 30:20) Le rona re solofediwa se se tshwanang.

Dirisa Nako ka Botlhale

Fa re dirisa nako ya rona ka botlhale gape re tla kgona go dira gore Jehofa a amogele malatsi a botshelo jwa rona. Madi a ka bolokwa, mme nako yone e tshwanetse ya dirisiwa, e seng jalo e tla latlhega. Ura nngwe le nngwe e e fetang e etse ruri. E re ka re nna re na le dilo tse re tshwanetseng go di dira tse dintsi go feta ka fa re ka kgonang ka teng, a re dirisa nako ya rona ka tsela e e tla re thusang go fitlhelela mekgele ya rona mo botshelong? Mokgele wa botlhokwa o Bakeresete botlhe ba tshwanetseng ba nna le one ke go nna le seabe ka metlha mo tirong ya go rera ka Bogosi le go dira barutwa.—Mathaio 24:14; 28:19, 20.

Re ka kgona go dirisa nako ya rona ka botlhale fela fa re setse re lemoga mosola wa yone sentle. Ke gone ka moo Baefeso 5:16 e re rotloetsang go ‘ithekela nako e e  re siametseng,’ mme seno se kaya go tlogela dilo tse di seng botlhokwa go le kalo. Go kaya go fokotsa ditiro tse di senyang nako. Go lebelela thelebishene thata kgotsa go fenyenkolola Internet, go bala tshedimosetso e e se nang mosola kgotsa go itlosa bodutu ka tsela e e feteletseng go ka re dira gore re lape. Mo godimo ga moo, go batla dikhumo ka tsela e e feteletseng go ka re jela nako e re e tlhokang go nna le pelo e e botlhale.

Batho ba ba buelelang gore nako e dirisiwe ka kelotlhoko ba bolela jaana: “Motho ga a kitla a kgona go dirisa nako ya gagwe sentle fa a se na mekgele e e tlhomameng.” Ba akantsha gore mekgele e e tlhomiwang e fitlhelele dilo tseno tse tlhano: e nne e e tlhomameng, e kgone go lekanngwa, e kgone go fitlhelelwa, e nne ya mmatota mme e beelwe nako.

Mokgele mongwe o o mosola ke go tokafatsa mokgwa wa rona wa go bala Baebele. Kgato ya ntlha ke go dira gore mokgele wa rona e nne o o tlhomameng—go bala Baebele yotlhe. Kgato e e latelang ke go dira gore mokgele wa rona e nne o o kgonang go lekanngwa. Ka go dira jalo, re ka kgona go bona kgatelopele ya rona. Mekgele e tshwanetse go re kgothaletsa go dira ka natla le go gola. Gape e tshwanetse go nna e e ka fitlhelelwang e bile e le ya mmatota. Re tshwanetse go akanyetsa dilo tse re kgonang go di dira, botswerere jwa rona le nako e re nang le yone. Ba bangwe ba ka nna ba tlhoka nako e e oketsegileng go fitlhelela mokgele wa bone. Sa bofelo, mokgele wa rona o tshwanetse go beelwa nako. Fa o tlhoma letsatsi le o batlang go fitlhelela sengwe ka lone, seno se ka go rotloetsa gore o se fetse.

Batho botlhe ba e leng maloko a lelapa la Bethele la lefatshe lotlhe, ba ba direlang kwa ntlokgolong ya lefatshe lotlhe ya Basupi ba ga Jehofa kgotsa kwa go lengwe la makala a yone a a mo lefatsheng lotlhe, ba na le mokgele o o tlhomameng wa go bala Baebele yotlhe mo ngwageng wa bone wa ntlha kwa Bethele. Ba lemoga gore go bala Baebele ka tsela e e nang le matswela go ba thusa gore ba gole semoyeng le go nna le kamano e e gaufi le Jehofa, yo o ba rutang gore ba solegelwe molemo. (Isaia 48:17) A le rona re ka ipeela mokgele wa go bala Baebele ka metlha?

Melemo ya go Dira Gore Malatsi a Botshelo Jwa Rona a Amogelwe

Go amega thata ka dilo tsa semoya go tla dira gore re bone masego a se kana ka sepe. Lebaka lengwe ke gore seno se re thusa go nna le boikutlo jwa gore re fitlheletse sengwe le gore go na le sengwe se re se tshelelang. Go buisana le Jehofa ka metlha ka go rapela ka tlhoafalo go dira gore re atamalane le ene. Go rapela ka bogone fela go bontsha gore re a mo ikanya. Fa re bala Baebele letsatsi le letsatsi le dikgatiso tse di theilweng mo Baebeleng tse re di newang ke “motlhanka yo o boikanyego le yo o botlhale,” seno se bontsha gore re iketleeditse go reetsa Modimo fa a bua le rona. (Mathaio 24:45-47) Seno se re thusa go nna le pelo e e botlhale gore re dire ditshwetso tse di siameng le go tlhopha dilo tse di tshwanetseng mo botshelong.—Pesalema 1:1-3.

Re itumelela go ikobela ditaelo tsa ga Jehofa, ka gonne go dira jalo ga se mokgweleo. (1 Johane 5:3) Fa re ntse re dira gore Jehofa a amogele letsatsi lengwe le lengwe la botshelo jwa rona, re nonotsha kamano ya rona le ene. Mo godimo ga moo re naya Bakeresete ka rona thuso ya boammaaruri ya semoya. Go dira jalo go itumedisa Jehofa Modimo. (Diane 27:11) Mme ga go sepe se se itumedisang thata go feta go amogelwa ke Jehofa jaanong le ka bosakhutleng!

[Setshwantsho mo go tsebe 21]

Bakeresete ba tsaya dilo tsa semoya di le botlhokwa

[Ditshwantsho mo go tsebe 22]

A o dirisa nako ya gago ka botlhale?

[Setshwantsho mo go tsebe 23]

Re nonotsha kamano ya rona le Jehofa fa re ntse re dira gore a amogele letsatsi lengwe le lengwe la botshelo jwa rona