A e Ne e Le Lekgolo la Dingwaga le le Laolwang ke Satane?

“FA RE akanya ka tsela e lekgolo leno la dingwaga le neng le tletse bosula ka yone, go ka tshwanela gore go twe le ne le laolwa ke Satane. Ga go na motlha ope o o fetileng o mo go one batho ba ileng ba nna le keletso e kgolo thata jaana ya go bolaya batho ba bangwe ba ba dimilione di le dintsi ka ntlha ya lotso, bodumedi kgotsa maemo.”

Ngwaga wa bo50 wa fa go ne go gopolwa go gololwa ga batho ba ba se nang molato ba ba neng ba golegilwe kwa dikampeng tsa polaelo tsa Banasi o ne wa dira gore mafoko a a fa godimo a kwalwe mo dikakgelong tsa bagatisi ba lokwalodikgang lwa The New York Times lwa January 26, 1995. Ka nako ya Go Gailwa ga Batho ke Banasi—nngwe ya dipolao tsa batho ba bantsi tse di itsegeng thata mo hisitoring—go ne ga ganyaolwa Bajuda ba ka nna dimilione di le thataro. Baagi ba Ba-Poland ba ka nna dimilione di le tharo ba e seng Bajuda ba ne ba bolawa mo go se go ileng ga twe ke “Go Gailwa ga Batho ke Banasi go go Lebetsweng.”

Jonathan Glover o bolela jaana mo bukeng ya gagwe ya Humanity—A Moral History of the Twentieth

Century: “Go fopholediwa gore batho ba ba suleng mo dintweng go tloga ka 1900 go fitlha ka 1989 ke batho ba ka nna dimilione di le 86.” O oketsa jaana: “Selekanyo se batho ba suleng ka sone mo dintweng tsa lekgolo la bomasomeamabedi la dingwaga se segolo thata gore motho a ka se tlhaloganya. Go tlhalosa palo ya dintsho ka go dira palogare ya tsone ga go dumalane le se tota se diragetseng, e re ka go sule batho ba ba fetang halofo ya palo eo (dimilione di le 58) mo dintweng tse pedi tsa lefatshe. Mme, fa batho ba ka bo ba sule ka palo e e lekanang letsatsi le letsatsi mo lobakeng loo, ntwa e ka bo e bolaile batho ba ka nna 2 500 ka letsatsi, Ke gore batho ba feta 100 ura nngwe le nngwe mo lobakeng lwa dingwaga di le masomearobongwe.”

Ka jalo, lekgolo la bo20 la dingwaga le ile la bolelwa e le lekgolo la dingwaga le go tsholotsweng madi thata mo go lone go gaisa lepe le batho ba kileng ba le bona. Nadezhda Mandelstam o kwadile jaana mo bukeng ya Hope Against Hope: “Re bone kafa bosula bo fentseng ka gone fa mekgwa e mentle ya batho e sena go senngwa le go gatakwa.” A ruri bosula bo fentse mo ntweng ya jone le bomolemo?

 [Motswedi wa Setshwantsho mo go tsebe 2]

COVER: Mother and daughter: J.R. Ripper/SocialPhotos

[Motswedi wa Setshwantsho mo go tsebe 3]

U.S. Department of Energy photograph