Basupi ba ga Jehofa ba ba Bolailweng ba a Gopolwa

KA March 7, 2002, go ne ga bulwa leje la segopotso kwa toropong ya Körmend kwa bophirima jwa Hungary. Le ne le gopotsa batho ka loso lwa Basupi ba le bararo ba ga Jehofa ba ba neng ba bolawa ke Banasi ka 1945.

Leje leno le kgomareditswe mo loboteng lwa ntlokgolo ya gompieno ya lephata la ditimamolelo kwa Hunyadi Road, koo ba bolaetsweng gone phatlalatsa. Leje leno le ne le diretswe go gopola ‘Bakeresete ba ba neng ba bolawa ka March 1945 ka ntlha ya go gana go dira dilo tse segakolodi sa bone se neng se sa ba letle go di dira. Antal Hőnisch (1911-1945), Bertalan Szabó (1921-1945), János Zsondor (1923-1945), 2002, Basupi ba ga Jehofa.’

Basupi bano ba ne ba bolawa dikgwedi di le pedi fela pele ga Ntwa ya Lefatshe II e fela. Ke ka ntlha yang fa Bakeresete bano ba ne ba bolawa? Lokwalodikgang lwa kwa Hungary lwa Vas Népe lo tlhalosa jaana: “Fa Hitler a sena go tsaya marapo kwa Jeremane, batho ba ba neng ba bogisiwa le go tlhokofadiwa, ba isiwa kwa dikampeng tsa pogisetso le go bolawa fa ba sa itatole bodumedi jwa bone e ne e se Bajuda fela mme gape le Basupi ba ga Jehofa ba ba ikanyegang. . . . Ka March 1945, go ne go tletse ditiro tsa thubakanyo kwa bophirima jwa Hungary. . . . Dingwe tsa tsone e ne e le go isa maloko a Basupi ba ga Jehofa botshwarwa le go ba bolaya.”

Thulaganyo ya go bula leje e ne e na le dikarolo tse pedi. Ya ntlha e ne e le kwa lefelong la bobogelo jwa metshameko la Batthyány Castle, kwa dingwe tsa dibui e neng e le Porofesa Szabolcs Szita, tlhogo ya Holocaust Documentation Center kwa Budapest; László Donáth, leloko la Parliament’s Committee for Human Rights, Minority and Religious Affairs; le Kálmán Komjáthy mongwe yo o boneng ka matlho fa batho bano ba bolawa mme jaanong e le rahisitori wa toropo. Batho ba ba fetang 500 ba ba neng ba le teng foo ba ne ba tsamaya go ralala toropo ba ya kwa karolong ya bobedi ya thulaganyo—go bulwa ga leje ke Ratoropo József Honfi wa kwa Körmend.

Fa Ján Žondor (János Zsondor) a ne a kwala lokwalo lwa go laela, o ne a kgothatsa bakaulengwe le bokgaitsadi ba gagwe ba Bakeresete gore ba se ka ba hutsafala. O ne a kwala jaana: “Ke sa ntse ke gopola mafoko a ga Johane a a mo go Tshenolo 2:10: ‘Itshupe o ikanyega go ya losong.‘ . . . Bolelelang ba ba kwa gae gore ba se ka ba hutsafala, ka gonne ke swela boammaaruri ga ke swe ke le sekebekwa.”

[Setshwantsho mo go tsebe 32]

Bertalan Szabó

[Setshwantsho mo go tsebe 32]

Antal Hőnisch

[Setshwantsho mo go tsebe 32]

Ján Žondor