“Ke Bone Sotlhe se ke Neng ke se Tlhoka”

GO YA ka pego nngwe ya World Health Organization, go fopholediwa gore bosheng jaana go tshwenyega thata mo maikutlong go ama batho ba ba fetang dimilione di le 120 mo lefatsheng lotlhe. Batho ba le milione ba a ipolaya ngwaga le ngwaga, mme ba ba fa gare ga dimilione di le 10 le 20 ba leka go ipolaya. Batho ba ba tshwenyegileng thata mo maikutlong ba ka thusiwa jang? Kalafi e ka fokotsa bothata jono, mme selo sa botlhokwa thata ke go gomodiwa. Mo godimo ga moo, bangwe ba ba nang le maikutlo a a ntseng jalo ba ile ba bona thuso mo dikgatisong tse di mosola tsa Baebele tsa Basupi ba ga Jehofa, jaaka fa lekwalo le le latelang le le tswang kwa Fora le bontsha.

“Ga se kgale go le kalo fa ke ne ke ikutlwa ke se na lebaka la gore ke tswelele pele ke tshela. Ke ne ka rapela Modimo gore ke swe. Go ne go ntse jaaka e kete ke ne ke sule mo maikutlong. Ke ne ka rapela Jehofa fela thata gore a nkaele. Gape ke ne ka ikaelela go bala 2002 Yearbook of Jehovah’s Witnesses mme ke ne ka e bala yotlhe ka malatsi a le mararo. Nka bolela ka re e nkgothaditse fela thata le go nonotsha tumelo ya me.”

“Ke ne ka dira dipatlisiso mo dimakasineng tsa Tora ya Tebelo le Tsogang!, mme ke ne ka gakgamala tota! Ke badile dimakasine tseno ka metlha ka dingwaga tse di fetang 15, mme ga ke a ka ka lemoga kafa di kgothatsang le go nonotsha ka gone. Di kwadilwe ka tsela e e bontshang lorato—e leng nonofo e e tlhaelang thata mo malatsing ano. Ke bone sotlhe se ke neng ke se tlhoka.”

Baebele ya re: “Jehofa o gaufi le ba ba pelo e phatlogileng; mme o boloka ba ba moya o pitlaganeng.” (Pesalema 34:18) Kwantle ga pelaelo, botlhe ba ba “pelo e phatlogileng” kana “ba ba moya o pitlaganeng,” Baebele e ka ba kgothatsa le go ba naya tsholofelo ka isagwe. Basupi ba ga Jehofa ba anamisa dikgatiso tsa Baebele go thusa ba ba di tlhokang go solegelwa molemo ke buka eno e e tlhotlheleditsweng ke Modimo e bile e gomotsa.