Dipotso Tse di Tswang Kwa Babading

A go phoso go bolaya seruiwa sa mo gae fa se lwala thata kgotsa se tsofetse?

Batho ba le bantsi ba kgatlhiwa ke diphologolo tse di farologaneng e bile di a ba itumedisa. Diruiwa dingwe tsa mo gae di fetoga ditsala tsa beng ba tsone. Ka sekai, go a itsege gore dintša di kgona go nna kutlo tota mo go beng ba tsone di bo di ba rate thata. Ka jalo, go a utlwala gore batho ba bo ba ka rata seruiwa se se ntseng jalo, bogolo jang fa ba sa bolo go nna le sone dingwaga di le dintsi.

Le fa go ntse jalo, diruiwa di le dintsi tsa mo gae ga di tshele lobaka lo loleele. Dintša di ka tshela dingwaga di le 10 go ya go di le 15, le tsone dikatse, go ya ka gore ke tsa mofuta ofe. Fa diruiwa tsa mo gae di tsofala, di ka nna le malwetse le bogole jo bo ka hutsafatsang beng ba tsone fa ba gopola kafa di neng di le matlhagatlhaga ka teng di sa le dinnye. A go tla bo go le phoso go namola diphologolo tse di ntseng jalo mo botlhokong ka go di bolaya?

Mokeresete a ka rata go tsamaisana le thato ya Modimo mo go se a se dirang ka diphologolo. Go nna setlhogo mo go tsone ruri go kgatlhanong le thato ya Modimo, ka gonne Lefoko la gagwe la re: “Mosiami o tlhokomela moya wa seruiwa sa gagwe.” (Diane 12:10) Le fa go ntse jalo, seno ga se reye gore tsela e Modimo a lebang diphologolo ka yone e tshwana le e a lebang batho ka yone. Fa Modimo a ne a bopa batho, o ne a bontsha gore ba farologane thata le diphologolo. Ka sekai, o ne a naya batho tsholofelo ya go tshelela ruri, mme diphologolo tsone ga a ise a ko a di neye tsholofelo e e ntseng jalo. (Baroma 6:23; 2 Petere 2:12) E re ka e le ene Mmopi, o na le tshwanelo ya go kaya kamano e e tshwanetseng ya nna teng fa gare ga batho le diphologolo.

Genesise 1:28 e re bolelela gore kamano eo ke efe. Modimo o ne a raya batho ba ntlha a re: “Lo laole ditlhapi tsa lewatle le dibopiwa tse di fofang tsa magodimo le sebopiwa sengwe le sengwe se se tshelang se se tsamayang mo lefatsheng.” Pesalema 8:6-8 le yone ya re: “[Modimo] o beile sengwe le sengwe kafa tlase ga dinao tsa [motho]. Dihutshane le dipoo, tsotlhe fela, le dibatana tsa naga e e bulegileng, dinonyane tsa legodimo le ditlhapi tsa lewatle.”

Modimo o ne a tlhalosa sentle gore batho ba ka dirisa diphologolo ka tsela e e tshwanetseng le go di bolaya. Ka sekai, ba ne ba ka dira diaparo ka matlalo a tsone. Gape Modimo o ne a naya batho tetla ya gore ba ka ja nama ya diphologolo morago ga Morwalela wa motlha wa ga Noa, go oketsa merogo e ba neng ba setse ba e neilwe gore ba ka e ja.—Genesise 3:21; 4:4; 9:3.

Seno ga se reye gore go siame go ganyaola diphologolo e le motshameko fela. Mo go Genesise 10:9, Baebele e tlhalosa Nimerode e re ke “motsomi yo o thata.” Mme yone temana eo ya re seno se ne se dira gore a nne “kgatlhanong le Jehofa.”

Ka jalo, le fa motho a neilwe gore a laole diphologolo, ga a tshwanela go dirisa taolo eo ka tsela e e sa siamang mme o tshwanetse a e dirisa go dumalana le melaometheo ya Lefoko la Modimo. Seno se ka akaretsa go se letle seruiwa sa mo gae se boga go sa tlhokege ka gonne se tsofetse thata, se gobetse thata kgotsa se tshwerwe ke bolwetse bongwe jo bo ka se foleng. Fa go ntse jalo, Mokeresete o tshwanetse a itirela tshwetso ya gore a direng. Fa a swetsa ka gore e tla bo e se bopelotlhomogi go tlogela seruiwa sa mo gae se tswelela pele se boga mme go se na tsholofelo ya gore se tla fola, a ka nna a letla gore se bolawe.