“Lo se Ka Lwa Boifa Kgotsa Lwa Tshoga”
“Lo se Ka Lwa Boifa Kgotsa Lwa Tshoga”
“Lo se ka lwa boifa kgotsa lwa tshoga. . . . Jehofa o tla nna le lona.”—2 DITIRAGALO 20:17.
1. Borukhutlhi bo ama batho jang, mme ke ka ntlha yang fa go utlwala go bo ba boifa?
BORUKHUTLHI! Lefoko leno ka bolone fela le a boifisa, le dira gore motho a ikutlwe a sa babalesega e bile a kgobegile marapo. Le dira gore motho a nne le maikutlo a a tlhakatlhakaneng a poifo, bohutsana le kgalefo. Ke lefoko le le tlhalosang se ba le bantsi ba boifang gore se tla tshwenya batho ka dingwaga di le dintsi tse di tlang. E re ka dinaga dingwe di ntse di lwantsha borukhutlhi ka mefuta ya jone e e farologaneng ka dingwagangwaga mme di sa atlege, go a utlwala go bo batho ba na le poifo e e ntseng jalo.
2. Basupi ba ga Jehofa ba ikutlwa jang malebana le bothata jwa borukhutlhi, mme seo se dira gore go bodiwe dipotso dife?
2 Le fa go ntse jalo, go na le lebaka la mmatota la go nna le tsholofelo. Basupi ba ga Jehofa, ba ba rerang ka tlhoafalo mo dinageng le mo mafelong a le 234 a lefatshe, ba na le tsholofelo e e nonofileng ya gore dilo di tla tokafala. Mo boemong jwa gore ba boife gore borukhutlhi bo ka se tsamaye bo fedisiwa, ba tlhomamisegile gore bo tla fedisiwa mme e bile ka bonako. A go a utlwala go nna le tsholofelo e e nonofileng ya gore dilo di tla tokafala jaaka bone? Ke mang yo o ka tsamayang a atlega go fedisa sebetso seno mo lefatsheng, mme go ka direga jang? E re ka rotlhe re ka tswa re kile ra amiwa ke thubakanyo ya mofuta mongwe, go a tshwanela gore re sekaseke lebaka la go nna le tsholofelo e e nonofileng jalo ya gore dilo di tla tokafala.
3. Ke dilo dife tse di bakang poifo, mme ke eng se se bolelelwang pele ka motlha wa rona?
3 Gompieno, batho ba boifa e bile ba tshoga ka ntlha ya mabaka a a farologaneng. Akanya ka batho ba bantsintsi ba ba sa tlholeng ba kgona go itlhokomela ka ntlha ya botsofe, ba ba nnelang go koafala ka ntlha ya malwetse a a sa alafegeng le malapa a a gogang bokete mo go tsa itsholelo. Tota e bile, akanya kafa botshelo ka bojone bo sa tlhomamang ka teng! Go lebega re aparetswe ke loso lo lo ka tlang ka tshoganyetso ka ntlha ya kotsi kgotsa masetlapelo, lo nako nngwe le nngwe lo ka fedisang sotlhe se re se ratang. Poifo le tlhobaelo e e ntseng jalo, le mathata a mantsi a re lebanang le one le go kgobega marapo, di dirile gore motlha wa rona o tshwanele sentle se moaposetoloi Paulo a neng a se tlhalosa a re: “Itse seno, gore mo metlheng ya bofelo go tla nna le dinako tsa mathata tse go leng boima go lebana le tsone. Gonne batho ba tla nna baithati, . . . ba ba se nang lorato lwa tlholego, ba ba sa batleng go tsena mo tumalanong epe, ba ba senyang batho maina, ba ba se nang boikgapo, ba ba bogale jo bo tshabegang, ba ba sa rateng se se molemo.”—2 Timotheo 3:1-3.
4. Ke tsholofelo efe e e leng teng malebana le maemo a a sa itumediseng a a umakiwang mo go 2 Timotheo 3:1-3?
4 Le fa temana eno e bua ka dilo tse di sa itumediseng, mme gone e bontsha gore go na le tsholofelo. Ela tlhoko gore dinako tsa mathata di tla nna mo “metlheng ya bofelo” ya tsamaiso e e boikepo eno ya dilo ya ga Satane. Se se kaya gore go setse go le gaufi gore re gololwe mme tsamaiso e e boikepo ya lefatshe e tla tloga e emisediwa ka puso e e itekanetseng ya Bogosi Jwa Modimo, jo Jesu a neng a ruta balatedi ba gagwe gore ba bo rapelele. (Mathaio 6:9, 10) Bogosi joo ke puso ya Modimo ya kwa legodimong, ‘e e se kitlang e senngwa le ka motlha,’ mme jaaka moporofeti Daniele a bolela ‘e tla thubaganya e bo e fedisa magosi ano otlhe a batho, mme e tla ema ka bosakhutleng.’—Daniele 2:44.
Boitlhaodi Jwa Bokeresete mo Boemong Jwa Borukhutlhi
5. Bosheng jaana ditšhaba di tsere kgato efe malebana le matshosetsi a borukhutlhi?
5 Ka masome a dingwaga, batho ba le diketekete ba ile ba swa ka ntlha ya borukhutlhi. Morago ga ditlhaselo tsa kwa New York City le Washington, D.C., ka September 11, 2001, batho ba ba oketsegileng mo lefatsheng lotlhe ba ile ba simolola go bona kafa borukhutlhi bo leng kotsi ka teng. Ka ntlha ya borukhutlhi jo bogolo le jo bo anameng mo lefatsheng lotlhe, ditšhaba go ralala lefatshe di ile tsa nna seoposengwe ka bonako go bo lwantsha. Ka sekai, ka December 4, 2001, go ya ka dipego tsa metswedi ya tshedimosetso, “ditona tsa dinaga di sele go tswa kwa dinageng di le 55 tsa kwa Yuropa, Amerika Bokone le Asia Bogare ba ne ba dira thulaganyo” e e neng e tla kopanya maiteko a ba neng ba tla a dira. Modiredimogolo wa United States o ne a ba akgola go bo ba tsere kgato eno a re e “tla thusa thata” go lwantsha borukhutlhi. Ka tshoganyetso fela batho ba le dimilione di le makgolokgolo ba ne ba amiwa thata ke se The New York Times Magazine e se bitsang “tshimologo ya ntwa e kgologadi.” Go sa ntse go tla bonala mo isagweng gore maiteko ao a tla atlega go le kana kang. Le fa go ntse jalo, ditlamorago tsa ntwa e e ntseng jalo ya go lwantsha borukhutlhi di ile tsa dira gore batho ba le bantsi ba ikutlwe ba boifa e bile ba tlhobaetse, mme ba ba ikanyang Jehofa bone ga ba a ka ba nna le poifo eo.
6. (a) Ke ka ntlha yang fa ka dinako tse dingwe batho ba bangwe ba fitlhela go le thata go dumalana le boemo jwa Bokeresete jwa boitlhaodi jo bo tsewang ke Basupi ba ga Jehofa? (b) Jesu o ne a tlhomela balatedi ba gagwe sekao sefe malebana le ditiro tsa bopolotiki?
6 Basupi ba ga Jehofa ba itsege e le batho ba ba itlhaolang mo go tsa bopolotiki. Le fa batho ba bantsi ba dumalana le boitlhaodi jwa bone fa go na le kagiso, ga ba dumalane le jone fa maemo a nna thata. Gantsi, poifo le tlhobaelo tse di bakwang ke ntwa di dira gore batho ba nne le maikutlo a a tseneletseng a bosetšhaba. Seno se ka nna sa dira gore bangwe ba thatafalelwe ke go tlhaloganya gore ke ka ntlha yang fa motho a ka se rate go ema nokeng maiteko a a dirwang ke matsholo a a tumileng a setšhaba. Bakeresete ba boammaaruri bone ba itse gore ba tshwanetse go utlwa taelo ya ga Jesu ya gore ba se ka ba nna “karolo ya lefatshe.” (Johane 15:19; 17:14-16; 18:36; Jakobe 4:4) Seno se raya gore ga ba tseye letlhakore mo dikgannyeng tsa bopolotiki kgotsa tsa setšhaba. Jesu ka boene o ne a tlhoma sekao se se tshwanetseng. Ka gonne a ne a le botlhale e bile a na le bokgoni jo bo tlhomologileng, o ne a ka thusa thata mo dikgannyeng tsa batho mo motlheng wa gagwe. Le fa go ntse jalo, o ne a gana go nna le seabe mo go tsa bopolotiki. Kwa tshimologong ya bodiredi jwa gagwe, o ne a gana a tlhomame fa Satane a ne a re o tla mo dira mmusi wa magosi otlhe a lefatshe. Moragonyana, o ne a gana gotlhelele go newa maemo mo go tsa bopolotiki.—Mathaio 4:8-10; Johane 6:14, 15.
7, 8. (a) Ke eng se go sa tseye letlhakore ga Basupi ba ga Jehofa mo go tsa bopolotiki go sa se kayeng, mme ka ntlha yang? (b) Baroma 13:1, 2 e bontsha jang gore ga go a tshwanela gore go dirwe ditiro tsa thubakanyo kgatlhanong le dipuso?
7 Boemo jo bo tsewang ke Basupi ba ga Jehofa jwa boitlhaodi ga bo a tshwanela go tsewa e le go ema nokeng kgotsa go itlhokomolosa ditiro tsa thubakanyo. Fa ba ne ba ka dira jalo, ba ne ba tla bo ba sa dumalane le se ba se buang fa ba ipolela gore ke batlhanka ba “Modimo wa lorato le wa kagiso.” (2 Bakorintha 13:11) Ba ithutile kafa Jehofa a ikutlwang ka teng ka thubakanyo. Mopesalema o ne a kwala jaana: “Jehofa ka boene o tlhatlhoba mosiami le moikepi, mme moya wa Gagwe o tlhoile ope fela yo o ratang thubakanyo.” (Pesalema 11:5) Gape ba itse se Jesu a neng a se raya moaposetoloi Petere: “Busetsa tšhaka ya gago mo lefelong la yone, gonne botlhe ba ba tsayang tšhaka ba tla nyelela ka tšhaka.”—Mathaio 26:52.
8 Le fa hisitori e bontsha sentle gore Bakeresete ba maaka gantsi ba ne ba dirisa “tšhaka,” Basupi ba ga Jehofa bone ga ba dire jalo. Ga ba tseye letlhakore mo ditirong tsotlhe tse di ntseng jalo. Ka boikanyego, Basupi ba utlwa taelo e e mo go Baroma 13:1, 2: “A moya mongwe le mongwe o nne mo taolong ya balaodi ba bagolo [babusi], gonne ga go na taolo epe fa e se ka Modimo; balaodi ba ba leng gone ba eme ba tlhomilwe ke Modimo mo maemong a bone a a lekanyeditsweng. Jalo yo o ganetsang taolo o ganetsana le thulaganyo ya Modimo; ba ba ganetsanang le yone ba tla ikamogelela katlholo.”
9. Basupi ba ga Jehofa ba lwantsha borukhutlhi ka ditsela dife tse pedi?
9 Le fa go ntse jalo, e re ka borukhutlhi bo le maswe thata, a Basupi ba ga Jehofa ga ba a tshwanela go dira sengwe go thusa go bo lwantsha? Ee ba tshwanetse, e bile ba dira sengwe. Sa ntlha, bone ka bobone ga ba dire dipe tsa ditiro tse di ntseng jalo. Sa bobedi, ba ruta batho melaometheo ya Bokeresete e e reng fa ba e dirisa thubakanyo ya mefuta yotlhe e fele. * Mo ngwageng o o fetileng Basupi ba dirisitse diura di le 1 202 381 302 ba thusa batho go ithuta tsela eno ya Bokeresete ya botshelo. Nako eno ga e a dirisediwa lefela ka gonne ka ntlha ya tiro e ba e dirileng go ne ga kolobediwa batho ba le 265 469 go nna Basupi ba ga Jehofa, mme ka go dira jalo ba bontsha phatlalatsa gore ga ba dumalane gotlhelele le thubakanyo.
10. A go ka kgonega gore thubakanyo e fedisiwe mo lefatsheng gompieno?
10 Mo godimo ga moo, Basupi ba ga Jehofa ba itse gore ba ka se kgone go fedisa bosula mo lefatsheng ba le nosi. Ke lone lebaka le le dirang gore ba beye tshepo ya bone yotlhe mo go yo o ka kgonang go dira jalo, e bong Jehofa Modimo. (Pesalema 83:18) Le fa batho ba dira maiteko ka bopeloephepa, ba ka se kgone go fedisa thubakanyo. Mokwadi yo o tlhotlheleditsweng wa Baebele o re tlhagisa jaana malebana le nako e re tshelang mo go yone, ‘metlha ya bofelo’: “Batho ba ba boikepo le maferefere ba tla tswelela ba sulafalela pele, ba tsietsa e bile ba tsiediwa.” (2 Timotheo 3:1, 13) Fa kgang eno e lejwa go ya ka se se buiwang mo temaneng eno, go raya gore go ka se direge gore batho ba kgone go fedisa thubakanyo. Gape, re ka tshepa gore Jehofa o tla fedisa thubakanyo gotlhelele e bile a e fedisetsa ruri.—Pesalema 37:1, 2, 9-11; Diane 24:19, 20; Isaia 60:18.
Go sa Boife Le fa Go na Le Tlhaselo e e Tshosetsang
11. Jehofa o setse a tsere dikgato dife go fedisa thubakanyo?
11 E re ka Modimo wa kagiso a ila thubakanyo, re ka tlhaloganya lebaka la go bo a setse a simolotse go tsaya dikgato go fedisa mosimolodi wa yone, e bong Satane Diabolo. Tota e bile, o setse a dirile gore Satane a fenngwe ka tsela e e tlhabisang ditlhong ke moengele yo mogolo Mikaele, e bong Keresete Jesu, yo e leng Kgosi e Modimo a sa tswang go e tlhoma. Baebele e tlhalosa tiragalo eo jaana: “Ga tsoga ntwa kwa legodimong: Mikaele le baengele ba gagwe ba tlhabana le kgogela, le kgogela le baengele ba yone ba tlhabana mme ya se ka ya fenya, le gone ba se ka ba tlhola ba bonelwa bonno kwa legodimong. Jalo kgogela e kgolo ya piriganyediwa kwa tlase, noga ya kwa tshimologong, e e bidiwang Diabolo le Satane, yo o tsietsang lefatshe lotlhe le le nang le banni; ya piriganyediwa kwa tlase kwa lefatsheng, le baengele ba yone ba piriganyediwa kwa tlase le yone.”—Tshenolo 12:7-9.
12, 13. (a) Ke eng se se botlhokwa ka ngwaga wa 1914? (b) Ke eng se boporofeti jwa ga Esekiele bo se bolelelang pele ka batho ba ba emang Bogosi Jwa Modimo nokeng?
12 Tatelano ya ditiragalo tsa Baebele le ditiragalo tsa lefatshe di a dumalana fa di supa ngwaga wa 1914 e le one o go neng ga nna ntwa kwa legodimong ka one. Fa e sale go tloga ka nako eo, maemo a lefatshe a ntse a senyegela pele. Tshenolo 12:12 e tlhalosa lebaka la seo, fa e re: “Ka lebaka leno itumeleng, lona magodimo le lona ba lo agileng mo go one! A bo go latlhega lefatshe le lewatle, ka gonne Diabolo o fologetse kwa go lona, a le bogale jo bogolo, ka a itse gore o na le lobaka lo lokhutshwane lwa nako.”
13 Go a utlwala go bo Diabolo a galefetse thata baobamedi ba Modimo ba ba tloditsweng le balekane ba bone ba “dinku tse dingwe.” (Johane 10:16; Tshenolo 12:17) Go ise go ye kae, kganetso eno e tla gakala le go feta fa Diabolo a tlhasela setlhogo botlhe ba ba emeng nokeng Bogosi Jwa Modimo jo bo tlhomilweng le ba ba bo ikanyang. Mo go Esekiele kgaolo 38, tlhaselo eno e e mabifi e bidiwa go twe ke tlhaselo ya ga “Gogo wa lefatshe la Magogo.”
14. Basupi ba ga Jehofa ba ile ba sirelediwa jang mo nakong e e fetileng, mme a go tla tswelela go ntse jalo?
14 Fa e sale Satane a lelekiwa kwa legodimong, ka dinako tse dingwe batho ba Modimo ba ile ba sirelediwa mo ditlhaselong tsa ga Satane ke mebuso mengwe ya bopolotiki, e e tlhalosiwang ka puo ya tshwantshetso mo go Tshenolo 12:15, 16. Go farologana le seo, Baebele e bontsha gore mo tlhaselong ya bofelo ya ga Satane, ga go na mekgatlho epe ya batho e e tla sireletsang batho ba ba ikanyang Jehofa. A seno se tshwanetse go dira gore Bakeresete ba boife kgotsa ba tshoge? Le e seng!
15, 16. (a) Mafoko a Jehofa a neng a a raya batho ba gagwe a ba tlhomamisetsa mo metlheng ya ga Jehoshafate a thusa jang Bakeresete gompieno gore ba nne le tsholofelo? (b) Jehoshafate le batho ba gagwe ba tlhometse batlhanka ba Modimo sekao sefe gompieno?
15 Modimo o tla ema batho ba gagwe nokeng fela jaaka a ne a dira jalo ka setšhaba sa gagwe mo motlheng wa ga Kgosi Jehoshafate. Re bala jaana: “Tlhwayang tsebe, Juda yotlhe le lona banni ba Jerusalema le Kgosi Jehoshafate! Jehofa o lo reile a re, ‘Lo se ka lwa boifa kgotsa lwa tshoga ka ntlha ya boidiidi jo bogolo jono; gonne tlhabano ga se ya lona, mme ke ya Modimo. . . . Ga lo kitla lo tlhoka go lwa mo lekgetlong leno. Emang mo maemong a lona, emang fela mme lo bone poloko ya ga Jehofa mo boemong jwa lona. Wena Juda le Jerusalema, lo se ka lwa boifa kgotsa lwa tshoga. Ka moso lo ba tsogologele, mme Jehofa o tla nna le lona.’”—2 Ditiragalo 20:15-17.
16 Batho ba Juda ba ne ba tlhomamisediwa gore ba ne ba ka se tlhoke go lwa. Ka tsela e e tshwanang, fa batho ba Modimo ba tlhaselwa ke Gogo wa Magogo, ga ba kitla ba tsaya dibetsa ba iphemela. Go na le moo, ba tla ‘ema fela mme ba bone fa Jehofa a ba boloka.’ Mme gone, go ema fela ga go reye gore ba nne fela ba sa dire sepe gotlhelele, fela jaaka batho ba Modimo mo metlheng ya ga Jehoshafate ba ne ba sa nna fela. Re bala jaana: “Jehoshafate a akofa a ikoba sefatlhego sa gagwe se lebile fa fatshe, mme Juda yotlhe le banni ba Jerusalema ka bobone ba wela fa fatshe fa pele ga ga Jehofa gore ba ikobele Jehofa. . . . Mo godimo ga moo, [Jehoshafate] a gakololana le batho a ba a emisa ba ba opelelang Jehofa le ba ba isang pako ba le mo mokgabong o o boitshepo jaaka ba ne ba tswa ba le kwa pele ga banna ba ba tlhometseng, a re: ‘Bakang Jehofa, gonne bopelonomi jwa gagwe jwa lorato ke jwa bosakhutleng.’” (2 Ditiragalo 20:18-21) Le fa batho ba ne ba tlhasetswe ke mmaba, ba ne ba tswelela ba baka Jehofa ka tlhoafalo. Seno ke sekao se Basupi ba ga Jehofa ba tla se latelang fa Gogo a ba tlhasela.
17, 18. (a) Basupi ba ga Jehofa ba bontsha boikutlo bofe jo bo molemo gompieno malebana le tlhaselo ya ga Gogo? (b) Ke kgakololo efe e basha ba Bakeresete ba e neilweng bosheng?
17 Go fitlha nako eo e fitlha, le fa tlhaselo ya ga Gogo e sena go simologa, Basupi ba ga Jehofa ba tla tswelela ba ema nokeng Bogosi Jwa Modimo. Ba tla tswelela ba nonotshiwa e bile ba sirelediwa fa ba ntse ba kopanela le diphuthego tse di fetang 94 600 mo lefatsheng lotlhe. (Isaia 26:20) A bo eno e le nako e e tshwanelang ya go baka Jehofa ka bopelokgale! Eleruri, go nna ba lebeletse tlhaselo ya ga Gogo e e tshosetsang ga go dire gore ba kate ka morago ka ntlha ya go boifa. Mo boemong jwa moo, go ba rotloetsa gore ba dire mo go oketsegileng ka mo ba ka kgonang ka teng fa ba ntse ba ntsha setlhabelo sa bone sa pako.—Pesalema 146:2.
18 Diketekete tsa basha ba ba mo lefatsheng lotlhe ba ba simolotseng bodiredi jwa nako e e tletseng ba bontsha boikutlo jono jo bo molemo. Go ne ga gololwa pampitshana e e reng Basha—Lo Tla Dirang ka Botshelo Jwa Lona? kwa dikopanong tsa kgaolo tsa 2002 go bontsha botlhokwa jwa go tlhopha tsela e e ntseng jalo ya botshelo. Bakeresete, ba bannye le bagolo, ba itumelela go newa dikgakololo tse di ntseng jalo tse di mo nakong.—Pesalema 119:14, 24, 99, 119, 129, 146.
19, 20. (a) Ke ka ntlha yang fa Bakeresete ba sa tlhoke go boifa kgotsa go tshoga? (b) Setlhogo se se latelang se se ithutiwang se tla dira eng?
19 Go sa kgathalesege gore maemo a lefatshe a ntse jang, ga go tlhokege gore Bakeresete ba boife kgotsa ba tshoge. Ba itse gore mo bogautshwaneng Bogosi jwa ga Jehofa bo tla fedisa thubakanyo ya mefuta yotlhe gotlhelele. Gape ba gomodiwa ke go itse gore batho ba bantsi ba ba suleng ka ntlha ya thubakanyo ba tla tsosiwa ka tsogo ya baswi. Le fa tsogo e tla dira gore ba bangwe ba bone tshono ya go ithuta ka Jehofa e le la ntlha, e tla dira gore ba bangwe ba kgone go tswelela ba tshela botshelo jwa go ineela mo go ene.—Ditiro 24:15.
20 Jaaka Bakeresete ba boammaaruri, re tlhaloganya botlhokwa jwa go tswelela re bolokile boitlhaodi jwa Bokeresete mme re ikemiseditse go dira jalo. Re batla go nna re na le tsholofelo e e molemolemo ya gore re kgone go ‘ema fela mme re bone poloko ya ga Jehofa.’ Setlhogo se se latelang se tla nonotsha tumelo ya rona ka go re bolelela ka ditiragalo tsa motlha wa gompieno tse ka go latelana ga tsone di re senolelang go diragadiwa ga boporofeti jwa Baebele.
[Ntlha e e kwa tlase]
^ ser. 9 Go bona dikai tsa batho ba ba ileng ba tlogela matshelo a thubakanyo gore e nne Basupi, bona dimakasine tsa Tsogang! tsa March 22, 1990, tsebe 21 (ka Seesemane); August 8, 1991, tsebe 27; le dimakasine tsa Tora ya Tebelo tsa January 1, 1996, tsebe 5; August 1, 1998, tsebe 5.
A o Ka Tlhalosa?
• Ke ka ntlha yang fa batho ba le bantsi gompieno ba se na tsholofelo?
• Ke ka ntlha yang fa Basupi ba ga Jehofa ba na le tsholofelo ka isagwe?
•Ke eng se Jehofa a setseng a se dirile ka se se bakang thubakanyo yotlhe?
•Ke ka ntlha yang fa re sa tshwanela go boifa tlhaselo ya ga Gogo?
[Dipotso Tsa Thuto]
[Setshwantsho mo go tsebe 13]
Jesu o ne a tlhoma sekao se se tshwanetseng sa boitlhaodi jwa Bokeresete
[Ditshwantsho mo go tsebe 16]
Diketekete tsa basha ba Basupi ba tseneletse bodiredi jwa nako e e tletseng ka boitumelo
[Motswedi wa Setshwantsho mo go tsebe 12]
UN PHOTO 186226/M. Grafman