‘Solomone O ne A sa Kgabe Jaaka Sengwe sa Tseno’

GO TLWAELEGILE go bona dithunya tsa naga tse di jaaka tse di mo tsebeng eno fa thoko ga ditsela tsa kwa borwa jwa Afrika. Di bidiwa di-cosmos mme di tlholega kwa dinageng tsa boboatsatsi tsa kwa Amerika. Dithunya tse dintle jaana di ka re gopotsa thuto nngwe e e neng ya rutiwa ke Jesu. Batho ba le bantsi ba ba neng ba mo reeditse ba ne ba humanegile, ka jalo ba ne ba tshwenyegile ka dilo tse ba di tlhokang, dijo le diaparo.

Jesu o ne a botsa jaana: “Mo kgannyeng ya diaparo, ke ka ntlha yang fa lo tlhobaela? Ithuteng mo dithunyeng tsa masoma tsa legola, kafa di golang ka gone; ga di dire ka natla, le gone ga di otlhe; mme ke lo raya ke re le eleng Solomone mo kgalalelong yotlhe ya gagwe o ne a sa kgabe jaaka sengwe sa tseno.”—Mathaio 6:28, 29.

Go dirilwe dikakantsho tse di farologaneng malebana le gore tota Jesu o ne a akantse ka mofuta ofe wa sethunya sa naga. Le fa go ntse jalo, gape Jesu o ne a se tshwantsha le dimela fela tse di tlwaelegileng, a re: “Jaanong, fa Modimo a apesa dimela tsa naga jalo, tse di leng gone gompieno mme ka moso di latlhelwa mo pesetsong, a go na le moo ga a na a apesa lona bogolo, lona ba lo nang le tumelo e potlana?”—Mathaio 6:30.

Le fa di-cosmos di sa tlholega kwa Iseraele, ruri di tshegetsa thuto e Jesu a neng a e ruta. Fa o di lebela kgakala kgotsa o di keleka di le fa gaufi, di dintle fela thata e bile batsayaditshwantsho le bataki ba rata go di tshwantsha. Ruri Jesu o ne a sa feteletse fa a ne a re, “le eleng Solomone mo kgalalelong yotlhe ya gagwe o ne a sa kgabe jaaka sengwe sa tseno.”

Seno se re rutang gompieno? Gore batho ba ba direlang Modimo ba ka tlhomamisega gore o tla ba thusa gore ba nne le dilo tse ba di tlhokang, tota le mo dinakong tse di thata. Jesu o ne a tlhalosa jaana: “Batlang bogosi jwa [Modimo] lo sa kgaotse, mme dilo tseno [tse di jaaka dijo le diaparo tse di tlhokegang] lo tla di okelediwa.” (Luke 12:31) Ee, go batla Bogosi Jwa Modimo go na le melemo ya mmatota. A mme o itse gore Bogosi Jwa Modimo ke eng le gore bo tla direla batho eng? Basupi ba ga Jehofa ba tla itumelela go go thusa go bona dikarabo tsa dipotso tseno mo Baebeleng.