Se Dinonyane Di ka Se re Rutang

“LEPANG ka kelotlhoko dinonyane tsa legodimo, ka gonne ga di jale peo le gone ga di robe le gone ga di phuthele mo matlong a polokelo; le fa go ntse jalo Rraalona wa selegodimo o a di fepa. A ga lo botlhokwa go feta tsone?” (Mathaio 6:26) Jesu Keresete o ne a bua mafoko ao mo therong e e itsegeng e a neng a e rera kwa thabeng gaufi le Lewatle la Galalea. O ne a sa reediwa ke balatedi ba gagwe fela. Go ne go na le boidiidi jwa batho ba ba tswang kwa dikarolong tsotlhe tsa naga. Bontsi jwa bone e ne e le bahumanegi ba ba neng ba tlisitse balwetse ba bone gore Jesu a ba fodise.— Mathaio 4:23–5:2; Luke 6:17-20.

Fa Jesu a sena go fodisa ba ba lwalang, o ne a simolola go bua ka dilo tse di botlhokwa thata tse ba di tlhokang semoyeng. Nngwe ya dithuto tse a di rutileng ke e e umakilweng fa godimo.

Dinonyane tsa legodimo ga di bolo go nna teng. Dingwe tsa tsone di ja ditshenekegi, tse dingwe di ja maungo le dipeo. Fa Modimo a diretse dinonyane dijo tse dintsi jalo, ga go na pelaelo gore o kgona go thusa batlhanka ba gagwe go bona dijo tsa letsatsi. O ka dira seno ka go ba thusa go bona tiro gore ba tle ba kgone go bona madi a go reka dijo. Kgotsa o ka dira gore ba atlege fa ba itemela dijo. Fa go nna le seemo sa tshoganyetso, Modimo o ka dira gore dipelo tsa baagelani ba ba pelonomi le ditsala di tlhotlheletsege go abelana dijo tse ba nang le tsone le ba ba tlhokang.

Re ka ithuta dilo tse dingwe tse dintsi ka go ela tlhoko tsela e dinonyane di tshelang ka yone. Modimo o dirile dinonyane di na le nonofo ya tlholego ya gore di dire dintlhaga tse di ka godisetsang mamphorwana a tsone mo go tsone. Leba mefuta e mebedi ya dintlhaga. Setshwantsho se se kafa molemeng ke sentlhaga sa nonyane ya Afrika e e bidiwang peolwane. Se agiwa mo lefikeng kgotsa mo loboteng lwa ntlo. Marulelo a dintlhaga tseo ke lefika le le okameng, kgotsa, jaaka go bontshiwa mo setshwantshong, ke mathudi a kago. Bodilo jwa sentlhaga bo dirilwe ka dikgolokwenyana tsa seretse tse di kgomaragantsweng e kete ke kopi. Nonyane e tonanyana le e namagadi di dira mmogo ka thata go kgobokanya dikgolokwe tsa seretse mme di ka nna tsa tsaya lobaka lo lo fetang kgwedi go fetsa go itirela sentlhaga. Go tswa foo di ala tlhaga le mafofa. Tsoopedi di thusana go jesa mamphorwana a tsone. Fa tlase ke sentlhaga sa thaga e tonanyana. Nonyane eno ya sethakga ya mo Afrika e ikagela sentlhaga e dirisa tlhaga kgotsa dikala tsa dimela tse dingwe. E ka fetsa go dira sentlhaga ka letsatsi le le lengwe e bile e ka nna ya loga dintlhaga di feta 30 ka paka e le nngwe!

Re ithuta eng mo go seno? Fa e le gore Modimo o naya dinonyane bokgoni jo bo ntseng jalo le didirisiwa tse dintsi jalo gore di dire dintlhaga, eleruri o ka thusa batlhanka ba gagwe gore ba nne le matlo. Le fa go ntse jalo, Jesu o ne a bontsha gore go na le sengwe se se tlhokegang gore Jehofa Modimo a re thuse gore re nne le dilo tse di bonalang tse re di tlhokang. Jesu o ne a solofetsa jaana: “Jalo, nnang lo batle pele bogosi le tshiamo ya gagwe, mme dilo tse dingwe tseno tsotlhe lo tla di okelediwa.” (Mathaio 6:33) O ka nna wa ipotsa gore, ‘Go batla Bogosi jwa Modimo pele go akaretsa eng?’ Basupi ba ga Jehofa, ba ba anamisang makasine ono, ba tla itumelela go araba potso eo.