Dipotso Tse di Tswang Kwa Babading

Ke eng fa Satane a bidiwa “ene yo o nang le dithata tsa go baka loso” mo go Bahebera 2:14?

Ka bokhutshwane, Paulo o ne a bolela gore Satane ka boene kgotsa baemedi ba gagwe ba ka dira gore batho ba swe. Go dumalana le seno, Jesu o ne a re Satane ke “mmolai fa a ne a simologa.”—Johane 8:44.

Batho ba ka nna ba se ka ba tlhaloganya Bahebera 2:14 ka tsela e e tshwanang ka ntlha ya tsela e dithanolo dingwe di e bayang ka yone, di bolela gore Satane o na le “thata ya loso” kgotsa “nonofo ya loso.” (Beibele; Baebele e e Boitshepo) Dithanolo tse di ntseng jalo di ka dira gore go lebege e kete Satane o na le nonofo e e sa feleng ya go bolaya mongwe le mongwe yo a batlang go mmolaya. Mme gone ga go a nna jalo. Fa Satane a ka bo a na le nonofo eo, ga go pelaelo gore a ka bo a sa bolo go nyeletsa baobamedi botlhe ba ga Jehofa mo lefatsheng.—Genesise 3:15.

Polelwana ya Segerika e e ranotsweng ka gore “nonofo ya loso” mo dithanolong tse dingwe le e e ranotsweng ka gore “dithata tsa go baka loso” mo go Thanolo ya Lefatshe le Lesha ke “kraʹtos tou tha·naʹtou.” Tou tha·naʹtou ke mofuta wa polelwana e e kayang “loso.” Tota kraʹtos e kaya “maatla, nonofo, thata.” Go ya ka Theological Dictionary of the New Testament, polelwana eno e kaya “go nna gone ga maatla kgotsa nonofo le bogolo jwa one e seng go dirisiwa ga one.” Ka gone, mo go Bahebera 2:14, Paulo ga a kaye gore Satane o na le nonofo e e sa feleng ya go baka loso. Go na le moo, o tlhalosa kafa Satane a nang le bokgoni jwa go ka baka loso ka teng.

Satane o dirisa jang “dithata tsa go baka loso”? Mo bukeng ya ga Jobe, re bala ka tiragalo nngwe e e sa tshwaneng le epe. Pego eo e bontsha gore Satane o ne a dirisa sefefo go ‘baka loso’ lwa bana ba ga Jobe. Le fa go ntse jalo, ela tlhoko gore Satane o ne a ka dira seno fela fa Modimo a ne a ka mo letla, mme Modimo o ne a mo naya tetla eo ka gonne tiragalo eno e ne e amana le kgang nngwe ya botlhokwa thata. (Jobe 1:12, 18, 19) Eleruri, Satane ka boene o ne a se ka a kgona go bolaya Jobe. O ne a se ka a letlelelwa go dira jalo. (Jobe 2:6) Seno se bontsha gore le fa ka dinako tse dingwe Satane a ile a kgona go baka loso lwa batho ba ba ikanyegang, ga re a tshwanela go boifa gore a ka re bolaya nako nngwe le nngwe fa a batla.

Gape, Satane o ile a dirisa batho ba gagwe go baka loso. Ka jalo, Bakeresete ba le bantsi ba ile ba swela tumelo ya bone, bangwe ba ile ba bolawa ke digongwana tse di shakgetseng kgotsa ba atlholelwa loso ke badiredibagolo ba dipuso kgotsa baatlhodi go sa tshwanela.—Tshenolo 2:13.

Mo godimo ga moo, ka dinako tse dingwe Satane o ile a bakela batho loso ka go dirisa makoa a bone ka tsela e e sa siamang. Bogologolo mo metlheng ya Iseraele, moporofeti Balaame o ne a rotloetsa Bamoabe go tlhotlheletsa Baiseraele “gore ba direle Jehofa ka go tlhoka boikanyegi.” (Dipalo 31:16) Seno se ne sa felela ka gore go swe Baiseraele ba ba fetang 23 000. (Dipalo 25:9; 1 Bakorintha 10:8) Le gompieno bangwe ba tsiediwa ke “maano a boferefere” a ga Satane mme ba raelesega go dira boitsholo jo bo sa siamang kgotsa ditiro dingwe tse di sa itumediseng Modimo. (Baefeso 6:11) Ke boammaaruri gore gantsi batho ba ba ntseng jalo ga ba swe ka yone nako eo. Mme gone, ba latlhegelwa ke tshono ya go bona botshelo jo bo sa khutleng, e leng tsela e Satane a dirang gore ba swe ka yone.

Le fa re lemoga gore Satane a ka kgona go re gobatsa, ga re a tshwanela go mmoifa ka tsela e e sa tshwanelang. Fa Paulo a ne a bolela gore Satane o na le dithata tsa go baka loso, gape o ne a re Keresete o ne a swa gore a “nyeletse [Satane] . . . le gore a tle a golole botlhe ba ka ntlha ya go boifa loso, ba neng ba le mo botlhankeng botshelo jotlhe jwa bone.” (Bahebera 2:14, 15) Ee, Jesu o ile a duela thekololo me ka jalo a golola batho ba ba nang le tumelo mo go ene mo botlhankeng jwa boleo le loso.—2 Timotheo 1:10.

Gone mme, go a utlwala go akanya gore Satane o na le dithata tsa go baka loso, le fa go ntse jalo, re dumela re sa belaele gore Jehofa a ka kgona go fedisa botlhoko bope fela jo Satane le baemedi ba gagwe ba ka dirang gore batho ba bo utlwe. Jehofa o re tlhomamisetsa gore Jesu yo o tsositsweng o tla “senya ditiro tsa ga Diabolo.” (1 Johane 3:8) Jesu o tla tsosa baswi ka maatla a ga Jehofa mme fa a dira jalo o tla bo a nyeletsa loso ka bolone. (Johane 5:28, 29) Kgabagare Jesu o tla senola ka tsela e e gakgamatsang gore Satane o na le maatla a a lekanyeditsweng fa a tla bo a mo piriganyetsa mo moleteng. Ka jalo, Satane o tla bo a atlholetswe tshenyego ya bosakhutleng.—Tshenolo 20:1-10.