“E Kabile Phatlha mo Pelong ya Me”

“KE LO leboga ka pelo ya me yotlhe ka ntlha ya mpho e e molemo ya Atamalana le Jehofa. E kabile phatlha mo pelong ya me—phatlha ya go batla go ikutlwa ke ratiwa le go anaanelwa ke Jehofa. Jaanong ke ikutlwa ke atamalane thata le Jehofa le Morwawe yo o rategang. Ke batla go bolelela batho botlhe ka buka eno le go abela batho botlhe ba ke ba ratang khopi ya yone.” Ke kafa Mosupi mongwe wa ga Jehofa a ileng a ikutlwa ka teng ka buka e ntšha ya ditsebe tse 320 e e neng ya gololwa kwa Dikopanong Tsa Kgaolo Tsa “Baboledi ba ba Tlhagafetseng ba Bogosi” tse di neng di tshwerwe ka 2002/03. A re sekasekeng dikarolo dingwe tsa buka eno e ntšha le lebaka la go bo e ile ya gatisiwa.

Dikarolo Dingwe Tsa Buka Eno e Ntšha

Buka eno e ntšha e tshwere tshedimosetso efe? E tshwere tshedimosetso yotlhe e e mo ditlhogong tseno tse pedi tse di ithutiwang tse di mo makasineng ono—le e nngwe e ntsintsi! Buka eno e na le dikgaolo tse 31, nngwe le nngwe e boleele jo bo lekanang le ditlhogo tse di ithutiwang tsa Tora ya Tebelo. Morago ga mafoko a ketapele le dikgaolo tsa ntlha tse tharo, buka eno e kgaogantswe ka dikarolo di le nnè, tse nngwe le nngwe ya tsone e tlhalosang nngwe ya dinonofo tse nnè tsa ga Jehofa tsa konokono. Karolo nngwe le nngwe e simolola ka tshobokanyo ya nonofo e e e tlhalosang. Dikgaolo di sekae tse di latelang di tlhalosa kafa Jehofa a bontshitseng nonofo eo ka teng. Karolo nngwe le nngwe e na le kgaolo e e buang ka Jesu. Ka ntlha yang? Ebu, Jesu o ile a re: “Yo o mponeng o bone le Rara.” (Johane 14:9) E re ka Jesu e le setshwano sa ga Jehofa ka botlalo, re kgona go bona dinonofo tsa Modimo mo go ene. Karolo nngwe le nngwe e konela ka kgaolo e e re bontshang kafa re ka etsang Jehofa ka teng fa re bontsha nonofo e kgaolo eo e e tlhalosang. Fa buka eno e ntšha e tlhalosa nonofo nngwe ya ga Jehofa e umaka buka nngwe le nngwe ya Baebele.

Buka eno ya Atamalana le Jehofa gape e na le dikarolo dingwe tse di kgethegileng. Go tloga ka kgaolo 2, kgaolo nngwe le nngwe e na le lebokoso la setlhogo se se reng “Dipotso Tsa go Tlhatlhanya.” Dikwalo le dipotso tsa lone ga di a direlwa go nna poeletso ya dintlha tsa kgaolo. Go na le moo, di diretswe go go thusa go dirisa Baebele go tlhatlhanya thata ka kgang eo. Go akantshiwa gore o bale Lekwalo lengwe le lengwe ka kelotlhoko. Go tswa foo akanya ka potso mme o leke go bona kafa o ka dirisang dintlha tsa yone ka teng. Go tlhatlhanya jalo go ka go ama pelo, ga go thusa go atamalana thata le Jehofa.—Pesalema 19:14.

Go dirilwe dipatlisiso tse di tseneletseng ka ditshwantsho tse di mo bukeng ya Atamalana le Jehofa ga ba ga dirwa gore e nne tse di rutang le tse di tlhotlheletsang. Dikgaolo tse 17 tsa yone di na le ditshwantsho tse dintle tsa mebalabala tsa dilo tse go buiwang ka tsone mo Baebeleng.

Ke Eng fa e Ile ya Gatisiwa?

Ke eng fa buka ya Atamalana le Jehofa e ile ya gatisiwa? Lebaka la konokono la buka eno e ntšha ke go re thusa go itse Jehofa botoka e le gore re nne le kamano e e nonofileng ya botsala le Modimo wa rona.

A o ka akanya ka mongwe yo o ka solegelwang molemo ke buka eno ya Atamalana le Jehofa, gongwe motho mongwe yo o ithutang Baebele le ene kana bakaulengwe le bokgaitsadi ba rona ba ba tsidifetseng? Go tweng ka wena—a o setse o simolotse go bala buka eno e ntšha? Fa e le gore ga o ise go dire jalo, ke eng fa o sa dire dithulaganyo tsa gore o simolole ka bonako jo bo ka kgonegang? Iphe nako ya go akanya ka se o se balang. E kete kgatiso eno e ntšha e ka go thusa go atamalana thata le Jehofa Modimo, e le gore o bolele dikgang tse di molemo tsa Bogosi jwa gagwe ka boipelo jo bogolo le tlhagafalo!