A o Na le “Boikutlo Jwa go Leta”?

“Ana lo tshwanetse go nna batho ba mofuta ofe mo ditirong tse di boitshepo tsa boitshwaro le ditiro tsa boineelo jwa bomodimo, lo letetse e bile lo ntse lo akantse thata ka go nna gone ga letsatsi la ga Jehofa!”—2 PETERE 3:11, 12.

1, 2. Re ka tshwantsha jang kgang ya go nna le “boikutlo jwa go leta” letsatsi la ga Jehofa?

AKANYA ka lelapa le le letetseng baeti go tla go ja le lone. Nako e e beilweng ya gore baeti ba goroge e ntse e atamela ka bofefo. Mmè wa lelapa o semeletse ka dithulaganyo tsa bofelo. Rre le bana ba mo thusa go baya dilo tsotlhe ka thulaganyo. Botlhe ba swegaswega dipelo. Ee, lelapa lotlhe le letetse gore baeti ba goroge le go tla go ja dijo tse di monate le go itumelela botsala jo bo molemo.

² Rona Bakeresete re letetse sengwe se se botlhokwa go feta seo. Re letetse eng? Ee, rotlhe re letetse “letsatsi la ga Jehofa”! Go fitlha letsatsi leo le goroga, re tshwanetse go tshwana le moporofeti Mika, yo o ileng a re: “Ke tla nna ke lebeletse Jehofa. Ke tla supa boikutlo jwa go leta mo Modimong wa poloko ya me.” (Mika 7:7) A seo se bolela gore re nne fela re phuthile diatla? Nnyaa. Go na le tiro e ntsi e re tshwanetseng go e dira.

3. Go ya ka 2 Petere 3:11, 12, Bakeresete ba tshwanetse go nna le boikutlo bofe?

³ Moaposetoloi Petere o re thusa go nna le boikutlo jo bo siameng fa re ntse re letile. A re: “Ana lo tshwanetse go nna batho ba mofuta ofe mo ditirong tse di boitshepo tsa boitshwaro le ditiro tsa boineelo jwa bomodimo, lo letetse e bile lo ntse lo akantse thata ka go nna gone ga letsatsi la ga Jehofa!” (2 Petere 3:11, 12) Ela tlhoko gore Petere o ne a dirisa mafoko ano go tsibosa. O ne a sa botse potso. Mo makwalong a gagwe a mabedi a a tlhotlheleditsweng, o ne a tlhalosa gore Bakeresete ba tshwanetse go nna batho ba mofuta ofe. Gape o ne a ba gakolola gore ba tswelele ba dira ‘ditiro tse di boitshepo tsa boitshwaro le tsa boineelo jwa bomodimo.’ Le fa go ne go setse go fetile dingwaga di ka nna 30 fa e sa le Jesu Keresete a umakile sesupo “sa bokhutlo jwa tsamaiso eno ya dilo,” Bakeresete ba ne ba tshwanetse go tswelela ba ntshitse matlho dinameng. (Mathaio 24:3) Ba ne ba tshwanetse go nna ba ‘letetse e bile ba ntse ba akantse thata’ ka go nna gone ga letsatsi la ga Jehofa.

4. Go ‘nna re akantse thata ka go nna gone ga letsatsi la ga Jehofa’ go akaretsa eng?

⁴ Lefoko la Segerika le fano le ranotsweng e le “lo ntse lo akantse thata” fa le ranolwa fela jaaka le ntse le kaya “go akofisa.” Ke boammaaruri gore re ka se ka ra ‘akofisa’ letsatsi la ga Jehofa ka tsela ya mmatota. Kana e bile ga re “itse letsatsi le fa e le ura” e Jesu Keresete a tlileng go atlhola baba ba ga Rraagwe ka yone. (Mathaio 24:36; 25:13) Buka nngwe e tlhalosa gore lediri la konokono la lereo  “go akofisa” fano le kaya “‘go itlhaganedisa’ mme ka gone le amana thata le ‘go tlhagafala, go nna matlhagatlhaga le go amega thata ka sengwe.’” Ka gone, Petere o ne a kgothatsa badumedikaene go gakalela go nna gone ga letsatsi la ga Jehofa. Ba ne ba ka dira seno ka go nna ba ntse ba akantse thata ka lone. (2 Petere 3:12) E re ka jaanong “letsatsi le legolo le le le boitshegang la ga Jehofa” le atametse thata, re tshwanetse go nna le boikutlo jo bo tshwanang.—Joele 2:31.

Go Leta ka ‘Ditiro Tse di Boitshepo Tsa Boitshwaro’

5. Re ka bontsha jang gore re gakaletse go bona “letsatsi la ga Jehofa”?

⁵ Fa e le gore re gakaletse go falola letsatsi la ga Jehofa, re tla dira gore seo se bonale sentle ka ‘ditiro tse di boitshepo tsa boitshwaro le ditiro tsa boineelo jwa bomodimo.’ Mafoko a a reng ‘ditiro tse di boitshepo’ a ka re gopotsa kgakololo eno ya ga Petere: “Jaaka bana ba ba utlwang, tlogelang go bopega go ya ka dikeletso tse pele lo neng lo na le tsone mo go tlhokeng kitso ga lona, mme, tumalanong le Moitshepi yo o neng a lo bitsa, le lona ka bolona nnang boitshepo mo boitshwarong jotlhe jwa lona, ka gonne go kwadilwe ga twe: ‘Lo nne boitshepo, ka gonne nna ke boitshepo.’”—1 Petere 1:14-16.

6. Go nna boitshepo go re tlhoka gore re dire eng?

⁶ Go nna boitshepo go re tlhoka gore re ipoloke re le phepa mo mmeleng, mo mogopolong, mo boitsholong le semoyeng. A re ipaakanyetsa “letsatsi la ga Jehofa” ka go ipoloka re le boitshepo ka tsela e e tshwanelang batho ba ba ipitsang ka leina la ga Jehofa? Gompieno ga go motlhofo go ipoloka re le phepa jalo ka gonne boitshwaro jwa lefatshe leno bo ntse bo senyegela pele. (1 Bakorintha 7:31; 2 Timotheo 3:13) A pharologano e e leng gone gareng ga boitshwaro jwa rona le jwa lefatshe e ntse e oketsegela pele? Fa go se jalo, seo se tshwanetse sa re tshwenya. A e ka tswa e le gore boitshwaro jwa rona, le mororo bo farologane le jwa lefatshe, bo simolola go senyega? Fa go le jalo, re tshwanetse go tsaya dikgato tse di gagametseng go baakanya dilo gore re itumedise Modimo.

7, 8. (a) Ke eng se se ka dirang gore re se ka ra lemoga botlhokwa jwa go dira ‘ditiro tse di boitshepo tsa boitshwaro’? (b) Go ka tlhokega gore re tseye dikgato dife tsa go baakanya dilo?

⁷ Ngaka nngwe ya kalafi e bolela gore, e re ka ditshwantsho tse di hepisang di anama mo Internet e bile motho a ka kgona go di lebelela a sa bonwe, batho bangwe ba pele ba neng ba sa kgone go bona ditshwantsho tseno tse di maswe, jaanong ba nna le “ditshono tse dintsintsi tsa go bona dilo tseno tsa tlhakanelodikobo.” Fa re ne re ka batlana le mafelo a a ntseng jalo mo Internet, ruri re ne re tla bo re tlhokomologa taelo ya Baebele ya gore re ‘se ka ra ama sepe se se seng phepa.’ (Isaia 52:11) A tota re ne re tla bo re bontsha gore re nna re “akantse thata ka go nna gone ga letsatsi la ga Jehofa”? Kana a e ne e tla bo e le gore ka mogopolo wa rona re busetsa letsatsi leo morago, re akanya gore tota le fa re kgotlela mogopolo wa rona ka dilo tse di leswe, re sa ntse re na le nako ya go iphepafatsa? Fa e le gore re ile ra nna le bothata mo kgannyeng eno, a bo go tla bo go potlakile jang ne gore re kope Jehofa go ‘dira gore matlho a rona a fete a sa bona se se se nang mosola le go re boloka re tshela mo tseleng ya gagwe’!—Pesalema 119:37.

⁸ Bontsi jwa Basupi ba ga Jehofa, ba basha le ba ba godileng, ba leka ka natla go tshela ka melao ya maemo a a kwa godimo ya Modimo le go tila dithaelo tsa lefatshe leno tsa boitsholo jo bo maswe. E re ka ba lemoga go potlaka ga motlha wa rona le ga tlhagiso ya ga Petere ya gore “letsatsi la ga Jehofa le tla tla jaaka legodu,” ba tswelela pele ba dira ‘ditiro tse di boitshepo tsa boitshwaro.’ (2 Petere 3:10) Ditiro tsa bone di bontsha gore ba nna ba ‘letile e bile ba  ntse ba akantse thata ka go nna gone ga letsatsi la ga Jehofa.’ *

Go Leta ka “Ditiro Tsa Boineelo Jwa Bomodimo”

9. Boineelo jwa bomodimo bo tshwanetse go re tlhotlheletsa go dira eng?

⁹ “Ditiro tsa boineelo jwa bomodimo” le tsone di a tlhokega gore re nne re akantse ka letsatsi la ga Jehofa. “Ditiro tsa boineelo jwa bomodimo” di akaretsa go boifa Modimo ka tlotlo e e re tlhotlheletsang go dira dilo tse di mo itumedisang. Go ikanyega ka botlalo mo go Jehofa ke gone go go re tlhotlheletsang go dira ditiro tse di ntseng jalo tsa boineelo jwa bomodimo. O batla gore “batho ba mefuta yotlhe ba bolokwe mme ba tle mo kitsong e e leng yone, ya boammaaruri.” (1 Timotheo 2:4) Modimo “ga a eletse gore ope a senngwe mme o eletsa gore botlhe ba fitlhe mo boikwatlhaong.” (2 Petere 3:9) Ka gone, a boineelo jwa rona jwa bomodimo ga bo a tshwanela go re tlhotlheletsa go oketsa maiteko a rona a go thusa batho go ithuta ka Jehofa le go mo etsa?—Baefeso 5:1.

10. Ke eng fa re tshwanetse go ikela tlhoko gore re se ka ra tsiediwa ke “maatla a a tsietsang a dikhumo”?

¹⁰ Botshelo jwa rona bo tla tlala ka ditiro tsa boineelo jwa bomodimo fa re batla Bogosi Jwa Modimo pele. (Mathaio 6:33) Seno se akaretsa go leba dikhumo ka tsela e e siameng. Jesu o ile a tlhagisa jaana: “Nnang lo butse matlho lo bo lo itise kgatlhanong le keletso ya bopelotshetlha ya mofuta mongwe le mongwe, ka gonne le e leng fa motho a na le letlotlo botshelo jwa gagwe ga bo nne gone ka ntlha ya dilo tse a di ruileng.” (Luke 12:15) Le fa go ka nna thata go akanya gore re ka foufadiwa ke go rata madi, re tshwanetse go ela tlhoko gore “tlhobaelo ya tsamaiso eno ya dilo le maatla a a tsietsang a dikhumo” di ka ‘hupetsa lefoko’ la Modimo. (Mathaio 13:22) Go ka nna ga se ka ga nna motlhofo go itshedisa. Ka ntlha ya seo, batho ba le bantsi mo dikarolong dingwe tsa lefatshe ba akanya gore fa ba ka fudugela kwa nageng nngwe e e humileng gongwe ba tlogela ba malapa a bone kwa morago, seo se tla ba thusa go tshela botshelo jo bo botokanyana. Tota le bangwe ba batho ba Modimo ba ile ba akanya jalo. Ka go fudugela kwa dinageng tse dingwe, ba ka nna ba kgona go tlamela ba malapa a bone ka dilo tsa segompieno. Le fa go ntse jalo, go tla direga eng ka bomoya jwa baratiwa ba bone ba ba setseng kwa gae? E re ka ba tla bo ba se na tlhogo ya lelapa e e ba etelelang pele, a ba tla kgona go nna le bomoya jo bo tla ba thusang go falola letsatsi la ga Jehofa?

11. Modiri mongwe o ne a bontsha jang gore ditiro tsa boineelo jwa bomodimo di botlhokwa go feta dikhumo?

¹¹ Modiri mongwe yo o tswang kwa Philippines o ne a rutwa boammaaruri jwa Baebele ke Basupi ba ga Jehofa kwa Japane. Fa a sena go ithuta ka maikarabelo a Dikwalo a botlhogo, o ne a lemoga gore o tshwanetse go thusa lelapa la gagwe go nna baobamedi ba ga Jehofa. (1 Bakorintha 11:3) Mosadi wa gagwe kwa gae o ne a le kgatlhanong thata le tumelo eno ya gagwe e ntšha mme a batla gore a tswelele pele a romelela lelapa madi go na le gore a boele gae go tla go ruta lelapa dilo tse a di dumelang tse di theilweng mo Baebeleng. Le fa go ntse jalo, ka ntlha ya go tlhotlhelediwa ke go lemoga gore nako e re tshelang mo go yone e potlakile le go amega ka baratiwa ba gagwe, o ne a boela gae. Bopelotelele jwa gagwe mo tseleng e a neng a dirisana le ba lelapa la gagwe ka yone bo  ne jwa mo tswela mosola. Fa nako e ntse e ya, lelapa la gagwe le ne la nna seoposengwe mo kobamelong ya boammaaruri mme mosadi wa gagwe o ne a tsenela bodiredi jwa nako e e tletseng.

12. Ke eng fa re tshwanetse go dira gore dilo tsa semoya e nne tsone di tlang pele mo botshelong jwa rona?

¹² Seemo sa rona se ka tshwantshiwa le sa motho a le mo kagong e e shang. A go ne go ka nna botlhale gore motho a nnele go teatea mo kagong eo e e tlogang e phutlhamisiwa ke molelo a leka go ogola dithoto tse di mo go yone? Go na le moo, a go ne go se kitla go nna botlhokwa thata go namola matshelo—a rona le a ba malapa a rona le a batho ba bangwe ba ba nnang mo kagong eo? Ee, tsamaiso eno ya dilo e ntse e a phutlhama ka bofefo jo bogolo mme matshelo a batho a mo kotsing. E re ka re lemoga seno, ruri re tshwanetse go dira gore dilo tsa semoya e nne tsone di tlang pele mme re tlhome megopolo ka tlhagafalo mo tirong e e namolang matshelo ya go rera ka Bogosi.—1 Timotheo 4:16.

Re Tshwanetse go Tlhoka “Selabe”

13. Re tshwanetse go lwela gore re fitlhelwe re le mo seemong sefe fa letsatsi la ga Jehofa le fitlha?

¹³ Fa Petere a gatelela botlhokwa jwa go nna le boikutlo jwa go leta, a re: “Baratwa, e re ka lo letetse dilo tseno, dirang bojotlhe jwa lona gore kwa bofelong [Modimo] a lo fitlhele lo se na selabe lo se na molato e bile lo le mo kagisong.” (2 Petere 3:14) Petere o ile a oketsa kgakololo eno ya gagwe ya gore re nne le seabe mo ditirong tse di boitshepo tsa boitshwaro le mo ditirong tsa boineelo jwa bomodimo ka go gatelela gore go botlhokwa gore Jehofa a re fitlhele re le batho ba ba phepafaditsweng ke madi a a tlhotlhwakgolo a ga Jesu. (Tshenolo 7:9, 14) Seno se tlhoka gore motho a bontshe gore o dumela mo setlhabelong sa ga Jesu le gore a nne motlhanka wa ga Jehofa yo o ineetseng le go kolobediwa.

14. Go se nne le “selabe” go akaretsa eng?

¹⁴ Petere o re kgothaletsa gore re dire bojotlhe gore re fitlhelwe re “se na selabe.” A re boloka diaparo tsa rona tsa boitshwaro jwa Bokeresete le botho jwa rona di se na selabe, di sa kgotlelwe ke lefatshe? Fa re bona patso mo seaparong, re leka go e tlosa ka yone nako eo. Fa e le seaparo se re se ratang thata re nna bonako le e leng go feta go e tlosa. A re ikutlwa jalo le fa diaparo tsa rona tsa Bokeresete di kgotletswe, jaaka fa go ka tualo, ka ntlha ya bokoa bongwe jo re nang le jone mo bothong kana mo boitshwarong jwa rona?

15. (a) Ke eng fa Baiseraele ba ne ba tshwanelwa ke go dira makantsa mo dintlheng tsa diaparo tsa bone? (b) Ke ka ntlha yang fa batlhanka ba ga Jehofa ba gompieno ba farologana thata le batho ba bangwe?

¹⁵ Baiseraele ba ne ba tshwanelwa ke go dira “makantsa mo dintlheng tsa diaparo tsa bone” le go tsenya “thapo e e bobududu mo godimo ga makantsa a seaparo.” Ka ntlha yang? Gore ba gopole ditaelo tsa ga Jehofa, ba di ikobele le go ‘itshupa ba le boitshepo’ mo Modimong wa bone. (Dipalo 15:38-40) Rona batlhanka ba ga Jehofa ba gompieno re farologana thata le lefatshe ka gonne re ikobela melao le melaometheo ya Modimo. Ka sekai, re ipoloka re le phepa mo boitsholong, re tsaya madi a le boitshepo e bile re tila mefuta yotlhe ya kobamelo ya medingwana. (Ditiro 15:28, 29) Batho ba le bantsi ba a re tlotla ka ntlha ya go ititaya ga rona sehuba go nna re sa leswafala.—Jakobe 1:27.

Re Tshwanetse go Nna Re “se Na Molato”

16. Go ipoloka re “se na molato” go akaretsa eng?

¹⁶ Gape Petere a re re tshwanetse go fitlhelwa re “se na molato.” Re ka kgona seo jang? Gantsi selabe ke selo se se ka tlosiwang kana sa phepafadiwa mme go nna le molato go kaya sengwe se se masisi. Go kaya go dira sengwe se se sa siamang kana se se phoso. Moaposetoloi Paulo o ile a gakolola  Bakeresetekaene ba Filipi jaana: “Nnang lo dire dilo tsotlhe go se na dingongorego le manganga, gore lo nne ba ba se nang selabe e bile lo se na molato, lo le bana ba Modimo ba ba se nang bogole mo kokomaneng e e sokameng le e e kgopameng, e mo gare ga yone lo phatsimang jaaka masedi mo lefatsheng.” (Bafilipi 2:14, 15) Fa re reetsa kgakololo eo, re tla tila dingongorego le go baka dikgang mme re tla direla Modimo ka maitlhomo a a siameng. Re tla tlhotlhelediwa ke go rata Jehofa le go rata baagelani fa re ntse re rera ‘dikgang tse di molemo tsa bogosi.’ (Mathaio 22:35-40; 24:14) Mo godimo ga moo, re tla tswelela pele re bolela dikgang tse di molemo le fa bontsi jwa batho ba sa tlhaloganye gore ke ka ntlha yang fa re ithaopela go dirisa nako ya rona mo tirong ya go thusa batho ba bangwe go itse ka Modimo le Lefoko la gagwe Baebele.

17. Maitlhomo a rona e tshwanetse go nna afe fa re gagamalela ditshiamelo dingwe mo phuthegong ya Bokeresete?

¹⁷ E re ka re batla go fitlhelwa re “se na molato,” re tshwanetse go sekaseka maitlhomo a rona mo go sengwe le sengwe se re se dirang. Re tlogetse tsela ya lefatshe ya go dira dilo ka bogagapa, tse di jaaka go gwalalela dikhumo kana maemo. Fa e le gore re gagamalela go nna le ditshiamelo dingwe mo phuthegong ya Bokeresete, e kete maitlhomo a rona a ka tswelela e le a a siameng mme e kete ka metlha re ka tlhotlhelediwa ke go rata Jehofa le batho ba bangwe. Go itumedisa tota go bona banna ba semoya ba “kgaratlhela tiro ya bolebedi” ka boipelo mme ba batla go direla Jehofa le badumedikabone ka boikokobetso. (1 Timotheo 3:1; 2 Bakorintha 1:24) Ee ruri, batho ba ba tshwanelegang go nna bagolwane ba ‘disa letsomane la Modimo ka go rata; e seng ka go rata poelo ya go sa ikanyege, mme ka tlhagafalo; e seng ka go rena mo go ba e leng boswa jwa Modimo, mme ka go nna dikao mo letsomaneng.’—1 Petere 5:1-4.

Re Tshwanetse go Nna “mo Kagisong”

18. Basupi ba ga Jehofa ba itsege ka dinonofo dife?

¹⁸ Selo sa bofelo se Petere a re bolelelang sone ke gore re fitlhelwe re le “mo kagisong.” Re ka kgona go dira jalo ka go nna mo kagisong le Jehofa le baagelani ba rona. Petere o gatelela botlhokwa jwa go ‘ratana ka lorato lo logolo’ le go nna re le mo kagisong le Bakeresetekarona. (1 Petere 2:17; 3:10, 11; 4:8; 2 Petere 1:5-7) Re tshwanetse go ratana gore re nne re na le kagiso. (Johane 13:34, 35; Baefeso 4:1, 2) Lorato le kagiso ya rona di bonala segolobogolo ka nako ya dikopano tsa rona tsa ditšhabatšhaba. Kwa kopanong ya kwa Costa Rica ka 1999, morekisi mongwe yo o rekisang kwa boemafofaneng jwa teng o ne a kgopisiwa ke go bo Basupi ba koo ba ne ba sira dilo tse a di rekisang ka nako ya fa ba ne ba itumeletse go amogela batlakopanong. Le fa go ntse jalo, ka letsatsi la bobedi, o ne a lemoga lorato le kagiso mo tseleng e batlakopanong ba neng ba amogelwa ka boitumelo jo bogolo ka yone le mororo Basupi ba koo ba ne ba sa ba itse. Ka letsatsi la bofelo morekisi yono le ene o ne a nna le seabe mo go dumediseng  baeng mme a kopa gore go ithutiwe Baebele le ene.

19. Ke eng fa go le botlhokwa gore re tshedisane ka kagiso le badumedikarona?

¹⁹ Maiteko a re a dirang ka tlhoafalo go tshedisana ka kagiso le bakaulengwe le bokgaitsadi ba rona ba semoya a ka ama tlhoafalo e re nang le yone mo go leteleng letsatsi la ga Jehofa le lefatshe la gagwe le lesha le a le solofeditseng. (Pesalema 37:11; 2 Petere 3:13) Gongwe o fitlhela go le thata go tshedisana ka kagiso le modumedikawena mongwe. A o akanya gore o ka kgona go tshela le ene ka kagiso mo Paradaiseng? Fa mokaulengwe a na le sekgopi le rona, re tshwanetse go itlhaganelela go ‘agisana le ene.’ (Mathaio 5:23, 24) Go dira jalo go botlhokwa ka gonne go tla dira gore re nne re le mo kagisong le Jehofa.—Pesalema 35:27; 1 Johane 4:20.

20. “Boikutlo jwa go leta” bo tshwanetse go bontshiwa ka ditsela dife?

²⁰ A rona ka borona re nna re ‘letetse e bile re ntse re akantse thata ka go nna gone ga letsatsi la ga Jehofa’? Re bontsha gore re eletsa fa boikepo bo ka fedisiwa ka go nna re le boitshepo mo lefatsheng leno le le nang le boitshwaro jo bo maswe. Mo godimo ga moo, keletso ya rona e kgolo ya go bona letsatsi la ga Jehofa le gorogile le go ipona re tshela mo pusong ya Bogosi e bonala ka ditiro tsa rona tsa boineelo jwa bomodimo. Mme tsholofelo ya rona ya go tshela mo lefatsheng le lesha la kagiso e bonala ka maiteko a re a dirang gone jaanong a go tshedisana ka kagiso le badumedikarona. Ka go dira dilo tseno, re bontsha gore re na le “boikutlo jwa go leta” le gore re nna re “akantse thata ka go nna gone ga letsatsi la ga Jehofa.”

[Ntlha e e kwa tlase]

A o A Gakologelwa?

• Ke eng se re tshwanetseng go se dira gore Jehofa a re fitlhele re ‘se na selabe re se na molato e bile re le mo kagisong’?

• Go nna re “akantse thata ka go nna gone ga letsatsi la ga Jehofa” go kaya eng?

• Boitshwaro jwa rona bo ka bontsha jang gore re na le “boikutlo jwa go leta”?

• Ke eng fa “ditiro tsa boineelo jwa bomodimo” di le botlhokwa thata?

[Dipotso Tsa Thuto]

[Setshwantsho mo go tsebe 11]

Re bontsha “boikutlo jwa go leta” ka ditiro tse di boitshepo tsa boitshwaro

[Ditshwantsho mo go tsebe 12]

Tiro ya go rera ka Bogosi e namola matshelo a batho

[Setshwantsho mo go tsebe 14]

A re lweleng go tshela ka kagiso le batho ba bangwe fa re ntse re letetse letsatsi la ga Jehofa