Akanya Sentle—O Dire ka Botlhale

AKANYA ka tiragalo eno: Jesu Keresete o tlhalosa gore baba ba bodumedi kwa Jerusalema ba tla mo utlwisa botlhoko ba bo ba mmolaya. Tsala ya gagwe e kgolo, e bong moaposetoloi Petere ga a dumele. Tota e bile, o tseela Jesu kwa thoko mme o a mo kgalema. Eleruri Petere o peloephepa e bile o amegile tota. Mme Jesu o leba jang tsela e Petere a akanyang ka yone? Jesu a re: “Mpota kafa morago, Satane! O sekgopi mo go nna, ka gonne ga o akanye dikakanyo tsa Modimo, mme tsa batho.”—Mathaio 16:21-23.

Petere o tshwanetse a bo a ne a gakgametse tota! Go na le gore a nne mothusi, mo lekgetlhong leno e ne e le “sekgopi” mo go Mong wa gagwe yo o rategang. Seno se diragetse jang? Petere o ka tswa a ne a wetse mo serung sa go akanya ka tsela e e phoso e gantsi batho ba akanyang ka yone—a dumela fela se a neng a batla go se dumela.

O se Ka wa Itshepa Thata

Selo se se ka tshosetsang bokgoni jwa rona jwa go akanya sentle ke mokgwa wa go itshepa thata. Moaposetoloi Paulo o ne a tlhagisa Bakeresete mmogo le ene kwa Korintha wa bogologolo jaana: “A yo o akanyang gore o eme a tlhokomele gore a se ka a wa.” (1 Bakorintha 10:12) Ke ka ntlha yang fa Paulo a ne a bua jalo? Go lebega e le ka gonne a ne a itse kafa go leng motlhofo ka teng gore tsela e batho ba akanyang ka yone e sokame—le gore megopolo ya Bakeresete e ka “senngwa ya tswa mo bopeloephepeng le mo boitshekong tse di tshwanetseng Keresete.”—2 Bakorintha 11:3.

Seno se ne se diragaletse kokomana yotlhe ya bagologolwane ba ga Paulo. Ka nako eo Jehofa o ne a ba raya a re: “Dikakanyo tsa lona ga se dikakanyo tsa me, le gone ditsela tsa me ga se ditsela tsa lona.” (Isaia 55:8) Ba ne ba le “botlhale mo matlhong a bone,” mme seo se ne sa felela ka masetlapelo. (Isaia 5:21) Ka jalo go a utlwala gore re tlhatlhobe kafa re ka ipolokang re akanya sentle ka teng mme re tile masetlapelo a a tshwanang.

Itise mo Dikakanyong Tsa Senama

Bangwe kwa Korintha ba ne ba amilwe thata ke dikakanyo tsa senama. (1 Bakorintha 3:1-3) Ba ne ba tsaya difilosofi tsa batho di le botlhokwa go feta Lefoko la Modimo. Ke sone se baakanyi ba Bagerika ba motlha oo e neng e le banna ba ba botlhale thata. Le fa go ntse jalo, mo matlhong a Modimo ba ne ba le dieleele. Paulo o ne a re: “Go kwadilwe ga twe: ‘Ke tla nyeletsa botlhale jwa batho ba ba botlhale, mme ke tla kgaphela kwa thoko temogo ya batho ba ba nang le  temogo.’ Motho yo o botlhale o kae? Mokwadi o kae? Moganetsanyi wa tsamaiso eno ya dilo o kae? A Modimo o ne a se ka a dira gore botlhale jwa lefatshe e nne boeleele?” (1 Bakorintha 1:19, 20) Batho ba ba botlhale bao ba ne ba laolwa ke “moya wa lefatshe” go na le go laolwa ke moya wa Modimo. (1 Bakorintha 2:12) Difilosofi tsa bone le dikgopolo tsa bone di ne di sa dumalane le tsela e Jehofa a akanyang ka yone.

Motswedi o mogolo wa dikakanyo tse di ntseng jalo tsa senama ke Satane Diabolo, yo o neng a dirisa noga go raela Efa. (Genesise 3:1-6; 2 Bakorintha 11:3) A o sa ntse a ka nna kotsi mo go rona? Ee! Go ya ka Lefoko la Modimo, Satane o ‘foufaditse megopolo’ ya batho mo e leng gore jaanong o ‘tsietsa lefatshe lotlhe le le nang le banni.’ (2 Bakorintha 4:4; Tshenolo 12:9) A bo go le botlhokwa jang ne gore re nne re butse matlho gore re bone maano a gagwe!—2 Bakorintha 2:11.

Ela Tlhoko “Tsietso ya Batho”

Gape moaposetoloi Paulo o ne a tlhagisa ka “tsietso ya batho.” (Baefeso 4:14) O ne a kopana le “badiri ba ba tsietsang” ba ba neng ba itira e kete ba bolela boammaaruri mme tota ba bo sokamisa. (2 Bakorintha 11:12-15) Gore batho ba ba ntseng jalo ba fitlhelele maikaelelo a bone, ba ka nna ba dirisa bosupi jo bo emang nokeng dilo tse ba di dumelang, mafoko a a amang batho maikutlo, mafoko a a tsietsang a boammaaruri jo bo sa felelang a a bakang dipelaelo, e bile ba ka dirisa le maaka.

Batho ba ba anamisang dipuo tsa lefela gantsi ba dirisa lefoko le le tshwanang le “lekoko” go senya ba bangwe leina. Fa Kopano ya Palamente ya Khansele ya Yuropa e ne e newa kakantsho go ne ga bolelwa gore “go ka nna molemo gore” balaodi ba ba tlhotlhomisang ka ditlhopha tse disha tsa bodumedi “ba tlogele go dirisa lefoko leo.” Ka ntlha yang? Go ne go tsewa gore mafoko a a reng “lekoko le le belaetsang” a naya kgopolo e e bosula thata. Ka tsela e e tshwanang, batlhalefi ba Bagerika ba ne ba latofatsa moaposetoloi Paulo ka maaka ba re ke “mmalabadi,” kgotsa fa le ranolwa ka tlhamalalo, e le “motho yo o selaselang.” Seno se ne se raya gore e ne e le motho fela yo o balabalang, yo o neng a tsamaya a selasela a bo a boaboeletsa dilonyana di sekae tse a di itseng. Tota, Paulo o “ne a bolela dikgang tse di molemo tsa ga Jesu le tsogo ya baswi.”—Ditiro 17:18.

A mekgwa ya batho ba ba anamisang dipuo tsa lefela e a bereka? Ee. E nnile le seabe se segolo go baka letlhoo la setso le la bodumedi ka go sokamisa tsela e batho ba lebang ditšhaba tse dingwe kgotsa bodumedi ka yone. Ba bantsi ba e dirisitse go nyatsa ditlhopha tse di sa rategeng. Adolf Hitler o ne a dirisa mekgwa eo fa a ne a re Bajuda ke batho ba ba “senyegileng,” ba ba “bosula,” le ba ba nang le “matshosetsi” mo Pusong. Le ka motlha o se ka wa letla tsietso e e ntseng jalo go senya tsela e o akanyang ka yone.—Ditiro 28:19-22.

O se Ka wa Itsietsa

Gape go motlhofo gore re itsietse. Tota e bile, go ka nna thata tota go tlogela kgotsa go belaela dikgopolo tse re di ratang thata. Ka ntlha yang? Ka gonne re ngaparela tsela e re lebang dilo ka yone. Go tswa foo re ka nna ra itsietsa ka go ipeela mabaka a e keteng a a utlwala—ka go batla go buelela dilo tse re di dumelang tse tota di leng phoso e bile di timetsa.

Seno se ne sa diragalela Bakeresete bangwe ba lekgolo la ntlha la dingwaga. Ba ne ba itse Lefoko la Modimo, mme ga ba a ka ba le letla gore le laole dikakanyo tsa bone. Ba ne ba feletsa ba “itsietsa ka tsela e e phoso ya go akanya.” (Jakobe 1:22, 26) Tsela e nngwe e re ka bonang ka yone gore re wetse mo mofuteng ono wa go itsietsa ke fa re galefa fa batho ba ganetsa dilo tse re di dumelang. Go na le gore re galefe, go molemo go utlwa megopolo ya batho ba bangwe le go reetsa ka kelotlhoko dilo tse ba di buang—le fa re tlhomamisegile gore tsela e re lebang dilo ka yone e siame.—Diane 18:17.

Epa Gore o Bone “e e Leng Kitso ya Modimo”

Ke eng se re ka se dirang gore re nne re akanya sentle? Go na le dilo tse dintsi tse di ka re thusang, mme re tshwanetse go bo re ikemiseditse go dira maiteko. Kgosi Solomone yo o botlhale o  ne a re: “Morwaaka, fa e le gore o tla amogela mafoko a me mme wa boloka ditaelo tsa me mo go wena, gore o tle o tlhwaele botlhale tsebe, gore o tle o sekamisetse pelo ya gago kwa temogong; mo godimo ga moo, fa o tlhaeletsa tlhaloganyo mme o ntshetsa temogo lentswe la gago, fa o nna o e senka jaaka selefera o bo o nna o e batla jaaka matlotlo a a fitlhegileng, foo o tla tlhaloganya go boifa Jehofa, mme o tla bona e e leng kitso ya Modimo.” (Diane 2:1-5) Ee, fa re dira maiteko a go tlatsa megopolo ya rona le dipelo tsa rona ka boammaaruri jwa Lefoko la Modimo, re tla nna le botlhale jwa mmatota, temogo le kitso. Tota e bile, re tla bo re epa go bona dilo tse di fetang selefera kgotsa matlotlo kgakala ka boleng.—Diane 3:13-15.

Eleruri botlhale le kitso di botlhokwa gore motho a kgone go akanya sentle. Lefoko la Modimo la re: “Fa botlhale bo tsena mo pelong ya gago le kitso e nna monate mo moyeng wa gago, bokgoni jwa go akanya bo tla nna bo go lebeletse, temogo e tla go dibela, go go golola mo tseleng e e bosula, mo mothong yo o buang dilo tse di sokameng, mo go ba ba tlogelang ditselana tsa thokgamo gore ba tsamaye mo ditseleng tsa lefifi.”—Diane 2:10-13.

Go botlhokwa thata go dira gore dikakanyo tsa Modimo di kaele dikakanyo tsa rona mo dinakong tsa fa re le mo mathateng kgotsa mo kotsing. Maikutlo a a nonofileng a a jaaka bogale kgotsa poifo a ka dira gore go nne thata go akanya sentle. Solomone a re: ‘Kgatelelo e ka dira gore yo o botlhale a itshware jaaka setsenwa.’ (Moreri 7:7) E bile go ka kgonega go “galefela Jehofa ka boene.” (Diane 19:3) Jang? Ka go pega Modimo molato ka mathata a re nang le one le ka go a dirisa e le diipato go dira dilo tse di sa dumalaneng le melao ya gagwe le melaometheo. Go na le gore ka metlha re akanye gore re itse thata, a ka boikokobetso re reetseng bagakolodi ba ba botlhale ba ba batlang go re thusa ba dirisa Dikwalo. Mme fa go tlhokega, a re iketleeletseng go tlogela dilo tse re neng re di dumela thata fa go bonala gore di phoso.—Diane 1:1-5; 15:22.

‘Nna o Kope Modimo’

Re tshela mo metlheng e e tsietsang le e e kotsi. Gore re tle re kgone go leba dilo ka tsela e e siameng mme re dire ka botlhale, go botlhokwa gore re rapele ka metlha re kopa kaelo ya ga Jehofa. Paulo a re: “Lo se ka lwa tlhobaela ka sepe, mme mo go sengwe le sengwe ka thapelo le mokokotlelo mmogo le go ntshiwa ga ditebogo a dikopo tsa lona di itsisiwe Modimo; mme kagiso ya Modimo e e gaisang kakanyo yotlhe e tla disa dipelo tsa lona le maatla a lona a mogopolo ka Keresete Jesu.” (Bafilipi 4:6, 7) Fa re se na botlhale jwa go rarabolola mathata a a raraaneng kgotsa diteko, re tshwanetse go ‘nna re kopa Modimo, gonne o naya botlhe ka bopelotshweu e bile a sa kgobe.’—Jakobe 1:5-8.

Ka gonne moaposetoloi Petere o ne a itse gore Bakeresete ka ene ba ne ba tshwanetse go bontsha botlhale, o ne a batla go ‘kurusa bokgoni jwa bone jwa go akanya.’ O ne a batla gore ba “gakologelwe mafoko a a neng a buiwa pelenyana ke baporofeti ba ba boitshepo le taolo ya Morena le Mmoloki,” Jesu Keresete. (2 Petere 3:1, 2) Fa re dira jalo e bile re dira gore megopolo ya rona e nne e tsamaisane le Lefoko la ga Jehofa, re tla akanya sentle le go dira ka botlhale.

[Ditshwantsho mo go tsebe 21]

Bakeresete ba bogologolo ba ne ba letla botlhale jwa bomodimo, e seng difilosofi, gore bo laole dikakanyo tsa bone

[Metswedi ya Ditshwantsho]

Borafilosofi go tswa kafa molemeng go ya kafa mojeng: Epicurus: Photograph taken by courtesy of the British Museum; Cicero: Reproduced from The Lives of the Twelve Caesars; Plato: Roma, Musei Capitolini

[Ditshwantsho mo go tsebe 23]

Thapelo le go ithuta Lefoko la Modimo di botlhokwa