Go Gomotsa ba ba Goang ba Kopa Thuso

BAEBELE ga se buka ya botsogo jwa tlhaloganyo. Le fa go ntse jalo, e re naya kgomotso mme e re thusa go itumelela botshelo le fa re kopana le mathata. Dikwalo di bua boammaaruri fa di re: “Motho yo o tsetsweng ke mosadi, o botshelo bokhutshwane e bile o tletse matshwenyego.” (Jobe 14:1) Go bo re sa itekanela go baka mangwe a mathata a re nnang le one. Mme ke mang yo tota a dirang gore batho ba boge?

Baebele ya re ke moya o o boikepo o o bidiwang Diabolo le Satane. O ‘tsietsa lefatshe lotlhe le le nang le banni’ mme o baka bontsi jwa mathata a a tshwenyang batho. Mme le fa go ntse jalo, Baebele gape e re bolelela gore o felelwa ke nako. (Tshenolo 12:9, 12) Go ise go ye kae, tlalelo yotlhe e Satane a e tliseditseng banni ba lefatshe e tla fela fa Modimo a tsenelela. Go ya ka Baebele, lefatshe le lesha la tshiamo le Modimo a le solofeditseng le tla fedisa go itlhoboga le go tlalelwa ga batho.—2 Petere 3:13.

Go gomotsa tota go itse gore go boga ga batho ke selo sa nakwana fela! Mo pusong ya Bogosi Jwa Modimo ya kwa legodimong e Jesu Keresete a tla busang mo go yone, go tlhoka tshiamiso le go boga di tla fela. Dikwalo di bolela jaana ka Kgosi e Modimo a e tlhomileng: “O tla golola mohumanegi yo o goang a kopa thuso, le yo o bogisiwang le ope fela yo o se nang mothusi. O tla utlwela motho wa maemo a a kwa tlase le yo o humanegileng botlhoko, mme meya ya ba ba humanegileng o tla e boloka. O tla golola moya wa bone mo kgatelelong le mo tshiamololong, mme madi a bone a tla nna tlhwatlhwakgolo mo matlhong a gagwe.”—Pesalema 72:12-14.

Nako ya gore mafoko ano a boporofeti a diragadiwe e gaufi thata. Re tla itumelela botshelo jo bo sa khutleng mo lefatsheng la paradaise mo maemong a a molemolemo. (Luke 23:43; Johane 17:3) Go itse ditsholofetso tseno tse di gomotsang tse di tswang mo Dikwalong go naya tsholofelo e bile go gomotsa ba ba goang ba kopa thuso.

[Motswedi wa Setshwantsho mo go tsebe 32]

Depressed girl: Photo ILO/J. Maillard