“Lo Amogetse Mahala, Nayang Mahala”

“LO AMOGETSE mahala, nayang mahala.” (Mathaio 10:8) Jesu o ne a laela baaposetoloi ba gagwe jalo fa a ne a ba roma go ya go rera dikgang tse di molemo. A baaposetoloi bano ba ne ba dira jaaka fa ba laetswe? Ee, mme ba ne ba tswelela ba dira jalo tota le fa Jesu a sena go tswa mo lefatsheng.

Ka sekai, fa Simone yo e kileng ya bo e le moloi a ne a bona maatla a go dira dikgakgamatso a moaposetoloi Petere le moaposetoloi Johane ba neng ba na le one, o ne a re o tla ba duela fa ba ka mo naya maatla ao. Mme Petere o ne a kgalema Simone, a mo raya a re: “A selefera ya gago e nyelele le wena, ka gonne o akantse gore o ka bona mpho ya mahala ya Modimo ka madi.”—Ditiro 8:18-20.

Moaposetoloi Paulo o ne a bontsha moya o o tshwanang le wa ga Petere. Paulo o ne a ka nna a lebelela gore bakaulengwe ba gagwe ba Bakeresete ba ba kwa Korintha ba mo tlamele ka madi. Le fa go ntse jalo, o ne a dira ka diatla tsa gagwe go itlamela. (Ditiro 18:1-3) Ka gone o ne a ka kgona go bua a tlhatswegile pelo gore o ne a rerela Bakorintha dikgang tse di molemo “kwantle ga tuelo.”—1 Bakorintha 4:12; 9:18.

Ka maswabi, ba le bantsi ba ba reng ke balatedi ba ga Keresete ga ba bontshe moya o o tshwanang wa go ‘naya mahala.’ Ee, ba le bantsi ba baeteledipele ba bodumedi mo go Labokeresete ba “ruta fela ba gabile tlhwatlhwa.” (Mika 3:11) E bile baeteledipele bangwe ba bodumedi bone ba ikhumisitse ka madi a ba a kolekileng mo matsomaneng a bone. Ka 1989 moreri mongwe wa United States o ne a atlholelwa go nna dingwaga di le 45 kwa kgolegelong. Ka ntlha yang? O ne a “jela batshegetsi ba gagwe didolara di le dimilionemilione e bile a dirisa mangwe a madi ano go ithekela matlo, dikoloi, go ya malatsing a boikhutso, tota le go rekela ntša ya gagwe ntlo e e nang le tsamaiso ya moya o o tsididi.”—People’s Daily Graphic, October 7, 1989.

Kwa Ghana, go ya ka lokwalodikgang lwa Ghanaian Times lwa March 31, 1990, moruti mongwe wa kereke ya Katoliki ya Roma o ne a tsaya madi a a ntshitsweng koleke mme a konopa phuthego ka one. Lokwalodikgang lono lwa re: “Lebaka la gagwe e ne e le gore batho bano ba godile, ka jalo go ne go lebeletswe gore ba ntshe madi a mantsinyana go feta a ba a ntshitseng.” Ga go gakgamatse go bo dikereke di le dintsi di ya bokgakaleng jwa go leka go kgothaletsa batho ba tsone gore ba nne pelotshetlha, di ba kgothaletsa go betšha le go dirisa maano a mangwe go leka go kokoanya madi.

Ka fa letlhakoreng le lengwe, Basupi ba ga Jehofa ba leka go etsa Jesu le barutwa ba gagwe ba bogologolo. Ga ba na baruti ba ba duelwang. Mosupi mongwe le mongwe ke modiredi yo o neilweng boikarabelo jwa go rerela ba bangwe “dikgang tse di molemo tseno tsa bogosi.” (Mathaio 24:14) Ka gone, go na le ba ba fetang dimilione di le thataro ba ba tshwaregileng mo go tlisetseng batho “metsi a botshelo” mahala. (Tshenolo 22:17) Ka tsela eno, tota le ba ba “se nang madi” ba kgona go solegelwa molemo ke molaetsa wa Baebele. (Isaia 55:1) Le mororo tiro ya bone ya lefatshe ka bophara e tshegediwa ka meneelo e batho ba e ntshang ka go rata, ga ba tsamaye ba kopa madi. Jaaka badiredi ba boammaaruri ba Modimo, ga se “babapatsi ba lefoko la Modimo,” mme ba bua “ka bopeloephepa, ee, jaaka ba ba romilweng ke Modimo.”—2 Bakorintha 2:17.

 Le fa go ntse jalo, ke ka ntlha yang fa Basupi ba ga Jehofa ba iketleeleditse go thusa ba bangwe, le gone ba dira jalo ka ditshenyegelo tsa bone? Ke eng se se ba tlhotlheletsang? A go naya mahala go raya gore ga ba duelelwe matsapa a bone gotlhelele?

Go Araba Kgwetlho ya ga Satane

Selo se segolo se se tlhotlheletsang Bakeresete ba boammaaruri gompieno ke go batla go itumedisa Jehofa—e seng go batla go ikhumisa. Ka go rialo ba kgona go araba kgwetlho e e tsositsweng ke Satane Diabolo makgolokgolo a dingwaga a a fetileng. Fa Satane a ne a bua ka monna yo o siameng e bong Jobe, o ne a botsa Jehofa potso eno: “A Jobe o boifa Modimo lefela?” Satane o ne a raya gore Jobe o ne a direla Modimo fela ka gonne Modimo a ne a mmeetse legora la go mo sireletsa. Satane o ne a bolela gore fa Jobe a ne a ka tseelwa dilo tse a nang natso, o ne a tla tlhapatsa Modimo a sa mo tshabe!—Jobe 1:7-11.

Modimo o ne a arabela kgwetlho eno ka go letla Satane gore a leke Jobe, a re: “Sengwe le sengwe se a nang le sone se mo seatleng sa gago.” (Jobe 1:12) Go ne ga felela ka eng? Jobe o ne a supa gore Satane ke moaki. Mo matlhotlhapelong otlhe a a neng a mo diragalela, Jobe o ne a nna a ikanyega. O ne a re: “Nka se tlose bothokgami jwa me mo go nna go fitlha ke swa!”—Jobe 27:5, 6.

Baobamedi ba boammaaruri gompieno ba bontsha boikutlo jo bo tshwanang le jwa ga Jobe. Tiro e ba e direlang Modimo ga ba e dire ka gonne ba batla go bona dikhumo.

Mpho ya Modimo ya Mahala ya Bopelonomi Jo bo Sa re Tshwanelang

Lebaka le lengwe la go bo Bakeresete ba boammaaruri ba iketleeleditse go ‘naya mahala’ ke gore le bone ka bobone ba “amogetse mahala” mo Modimong. Batho ba mo bokgobeng jwa boleo le loso ka ntlha ya boleo jwa ga rraaronamogolo e bong Adame. (Baroma 5:12) Ka lorato Jehofa o ne a rulaganya gore Morwawe a swe loso lwa go intsha setlhabelo—e leng selo se se neng sa dira gore Modimo a latlhegelwe thata. Tota ga se gore batho ba ne ba tshwanelwa ke go direlwa molemo ono. Nnyaa, ke mpho e re e neilweng ke Modimo.—Baroma 4:4; 5:8; 6:23.

Ka gone, jaaka go kwadilwe mo go Baroma 3:23, 24, Paulo o ne a bolelela Bakeresete ba ba tloditsweng a re: “Botlhe ba leofile e bile ba tlhaela kgalalelo ya Modimo, mme go ntse jaaka e kete ke mpho ya mahala go bo ba bolelwa e le ba ba siameng ka bopelonomi jo bo sa re tshwanelang jwa gagwe ka go gololwa ka thekololo e e neng ya duelwa ke Keresete Jesu.” Ba ba nang le tsholofelo ya go tshelela ruri mo lefatsheng le bone ba amogetse ‘mpho eno ya mahala.’ Mpho eno e akaretsa tshiamelo ya go kaiwa re siame jaaka ditsala tsa ga Jehofa.—Jakobe 2:23; Tshenolo 7:14.

Setlhabelo sa thekololo sa ga Keresete le sone se dira gore Bakeresete botlhe ba kgone go nna badiredi ba Modimo. Moaposetoloi Paulo o ne a kwala jaana: “Ke ne ka nna modiredi wa [sephiri se se boitshepo] seno go ya ka mpho ya mahala ya bopelonomi jo bo sa re tshwanelang jwa Modimo.” (Baefeso 3:4-7) E re ka badiredi bano ba boammaaruri ba Modimo ba dira bodiredi jono ka gonne ba biditswe ka mpho e e neng e sa ba tshwanela kgotsa mpho e ba neng ba ka se ka ba re ba e diretse ka thata, ba ne ba ka se ka ba lebelela gore tiro e ba e dirileng ya go bolelela ba bangwe dikgang tsa  mpho eno ba e duelelwe ka go newa dilo tse di bonalang.

A re Gogelwa Ke go Bo re Solofeditswe Botshelo Jo bo Sa Khutleng?

A mme seno se raya gore Modimo o lebeletse gore Bakeresete ba mo direle mme ba se ka ba lebelela gore ba tla bona tuelo? Nnyaa, ka gonne moaposetoloi Paulo o ne a bolelela badumedi mmogo le ene a re: “Modimo ga a tshiamololo mo a ka lebalang tiro ya lona le lorato lo lo le bontshitseng leina la gagwe.” (Bahebera 6:10) E bile Jehofa ke Modimo yo o tshiamiso. (Duteronome 32:4) Tota e bile, Jehofa ke “moduedi wa ba ba mmatlang ka tlhoafalo.” (Bahebera 11:6) A mme ga se gore re solofediwa botshelo jo bo sa khutleng mo Paradaiseng go re gogela fela?—Luke 23:43.

Nnyaa, le e seng. Ka gonne tota keletso ya go tshela mo Paradaiseng mo lefatsheng e tswa kwa Modimong ka boene. Ke ene a neileng batho ba ntlha ba babedi tebelelo eno. (Genesise 1:28; 2:15-17) Gape o ne a dira gore tsholofelo eno e boe e nne teng fa Adame le Efa ba sena go dira gore bana ba bone ba latlhegelwe ke yone. Ka gone Modimo o solofetsa mo Lefokong la gagwe gore “popo ka boyone le yone e tla gololwa mo go nneng motlhanka wa go bola mme e nne le kgololesego e e galalelang ya bana ba Modimo.” (Baroma 8:21) Ka gone go a tshwanela gore Bakeresete gompieno ba ‘lebe ka tlhomamo kwa go neweng maduo,’ fela jaaka Moshe wa bogologolo. (Bahebera 11:26) Modimo ga a re neye maduo ano go re reka. O a naya ba ba mo direlang, ka gonne a ba rata ka lorato lwa mmatota. (2 Bathesalonika 2:16, 17) Ka gone le rona “re a rata, ka gonne a re ratile pele.”—1 Johane 4:19.

Boitlhomo jo bo Siameng Jwa go Direla Modimo

Le fa go ntse jalo, Bakeresete gompieno ba tshwanetse go nna ba sekaseka boitlhomo jwa bone jwa go bo ba direla Modimo. Mo go Johane 6:10-13, re bala gore Jesu o ne a fepa boidiidi jwa batho ba feta dikete di le tlhano ka kgakgamatso. Morago ga moo, bangwe ba ne ba simolola go sala Jesu morago fela gore ba bone se bone ba se batlang. Jesu o ne a ba raya a re: “Lo a mpatla, . . . ka gonne lo ne lwa ja dinkgwe mme lwa kgora.” (Johane 6:26) Masome a le mmalwa a dingwaga moragonyana Bakeresete bangwe ba ba ineetseng le bone ba ne ba direla Modimo “e seng ka boitlhomo jo bo itshekileng.” (Bafilipi 1:17) Bangwe ba ba neng ba sa ‘dumalane le mafoko a a itekanetseng a ga Jesu Keresete’ ba ne ba bo ba batla ditsela tsa go kopanela le Bakeresete gore fela ba iponele melemo mengwe.—1 Timotheo 6:3-5.

Gompieno Mokeresete yo o direlang fela ka gonne a batla go tshelela ruri mo Paradaiseng le ene a ka nna a bo a direla ka boitlhomo jo bo sa siamang. Fa nako e ntse e ile seno se ka feleletsa ka gore a we semoyeng. E ka nna ya re ka gonne a bona e kete tsamaiso eno ya ga Satane e tsere lobaka lo loleele go feta jaaka a ne a lebeletse, a ‘lapa,’ a nna le maikutlo a gore bokhutlo bo diegile. (Bagalatia 6:9) A ka nna a ba a ngongoregela le dilo tse a ileng a tshwanelwa ke go itima tsone. Jesu o re gakolola jaana: “O rate Jehofa Modimo wa gago ka pelo yotlhe ya gago le ka moya otlhe wa gago le ka mogopolo otlhe wa gago.” (Mathaio 22:37) Ee, motho yo o tlhotlhelediwang ke lorato go direla Modimo ga a ipolelele gore o tla mo direla ka lobaka lo lo rileng fela. O ikemiseditse go direla Jehofa ka bosakhutleng! (Mika 4:5) Ga a ikotlhaele go bo a itimile dilo dingwe mo go direleng ga gagwe Modimo. (Bahebera 13:15, 16) Go rata Modimo go mo tlhotlheletsa gore a dire gore dilo tse di amanang le Modimo di tle pele mo botshelong jwa gagwe.—Mathaio 6:33.

Gompieno baobamedi ba boammaaruri ba feta dimilione di le thataro ba “ithaopa ka go rata” mo go direleng Jehofa. (Pesalema 110:3) A o mongwe wa bone? Fa go sa nna jalo, akanyetsa se Modimo a go nayang sone: kitso e e itshekileng ya boammaaruri; (Johane 17:3) go gololesega mo dikgoleng tsa dithuto tsa maaka tsa bodumedi; (Johane 8:32) tsholofelo ya go tshelela ruri. (Tshenolo 21:3, 4) Basupi ba ga Jehofa ba ka kgona go go thusa go ithuta kafa o ka amogelang dilo tseno tsotlhe ka teng mo Modimong—mahala.

[Mafoko a a mo go tsebe 22]

Bakeresete ba boammaaruri gompieno ba tlhotlhelediwa thata ke go eletsa go itumedisa Jehofa—e seng go ikhumisa

[Setshwantsho mo go tsebe 21]

Mpho ya Modimo ya mahala ya thekololo e tlhotlheletsa Bakeresete go bolelela ba bangwe dikgang tse di molemo mahala