O ne A Rata Bopelonomi

MILTON G. HENSCHEL, yo o sa bolong go nna leloko la Setlhopha se se Laolang sa Basupi ba ga Jehofa ka lobaka lo loleele, o ne a wetsa bodiredi jwa gagwe jwa mo lefatsheng ka Matlhatso, March 22, 2003. O ne a na le dingwaga di le 82.

Fa Milton Henschel e sa ntse e le lekawana, o ne a nna mongwe wa badiredi ba kwa ntlokgolong ya Basupi ba ga Jehofa mme a direla teng ka boikanyegi dingwaga di feta 60. Go ise go ye kae o ne a itsewe e le motho yo o nang le bokgoni jwa go dira ditshwetso tse di botlhale e bile a kgatlhegela ka bopeloephepa tiro ya go rera ka Bogosi. Ka 1939 o ne a nna mokwaledi wa ga N. H. Knorr, yo ka nako eo e neng e le molebedi wa bogatisetso jwa kwa Brooklyn jwa Basupi ba ga Jehofa. Fa Mokaulengwe Knorr a ne a simolola go etelela pele mo tirong ya Basupi ya lefatshe lotlhe ka 1942, o ne a dira gore Mokaulengwe Henschel a tswelele e le mothusi wa gagwe. Mokaulengwe Henschel o ne a nyalana le Lucille Bennett ka 1956, mme ba ne ba itumelela botshelo le go lebana le mathata a jone mmogo.

Mokaulengwe Henschel o ne a dira mmogo le Mokaulengwe Knorr go fitlha Knorr a tlhokafala ka 1977. Mokaulengwe Henschel o ne a tsaya maeto go ya kwa dinageng di feta 150, gantsi a na le Mokaulengwe Knorr. O ne a etela le go kgothatsa Basupi ba ga Jehofa mo lefatsheng lotlhe, bogolo jang barongwa le ba ba direlang mo diofising tsa makala. Ka dinako tse dingwe maeto ano a ne a se motlhofo, e bile a le kotsi. Ka 1963 fa Mokaulengwe Henschel a ne a etetse kopano nngwe kwa Liberia, o ne a nna mongwe wa ba ba neng ba bogisiwa setlhogo ka gonne a ne a gana go nna le seabe mo moetlong wa boratanaga. * Ka bopelokgale, Mokaulengwe Henschel o ne a boela kwa Liberia dikgwedi di sekae moragonyana go ya go kopana le poresidente wa naga eo le go mo kopa gore a neye Basupi ba ga Jehofa koo kgololesego e kgolwane.

Fa go na le mathata le dikgwetlho, Mokaulengwe Henschel o ne a itsewe a kgona go dira ditshwetso a sa fekeediwe ke maikutlo, a fetofetoga le maemo e bile a le tekatekano. Se badirikaene ba neng ba se anaanela thata e ne e le go rata thulaganyo ga gagwe, boingotlo jwa gagwe le go rata go dira metlae. E re ka a ne a segofaditswe ka bokgoni jo bo gakgamatsang jwa go gopola dilo, o ne a itumedisa barongwa ba bantsi mo lefatsheng ka gore ka bonako fela a kgone go gopola maina a bone, a bue polelwana e le nngwe kgotsa tse pedi ka puo ya lefelo leo, a bo a dire motlae—a ntse a nyenya.

Mika 6:8 e re gopotsa gore Jehofa Modimo o batla gore re ‘rate bopelonomi.’ Milton Henschel o tla gopolwa ka go tlhoma sekao mo ntlheng eno. Le fa a ne a na le maikarabelo a mantsi, go ne go ntse go le motlhofo go mo atamela, a le bonolo e bile a le pelonomi. O ne a rata go re, “Fa o sa tlhomamisege ka sengwe, gakologelwa gore go dira ka bopelonomi ke gone mo go tshwanetseng.” Le fa re hutsafaditswe ke loso lwa mokaulengwe yono yo o rategang, re itumelela gore o ile a itshoka ka boikanyegi go ya bokhutlong, a tlhomamisegile gore o tla bona tuelo ya gagwe, “serwalo sa botshelo.”—Tshenolo 2:10.

[Ntlha e e kwa tlase]

[Setshwantsho mo go tsebe 31]

M. G. Henschel le N. H. Knorr

[Setshwantsho mo go tsebe 31]

A na le mosadi wa gagwe, Lucille