Re Tla Tsamaya mo Leineng la ga Jehofa ka Bosakhutleng!
Re Tla Tsamaya mo Leineng la ga Jehofa ka Bosakhutleng!
“Re tla tsamaya mo leineng la ga Jehofa Modimo wa rona ka bosakhutleng, le ka bosaengkae.”—MIKA 4:5.
1. Ke melaetsa efe e e tlhalosiwang mo go Mika kgaolo ya 3 go ya go ya 5?
GO NA le sengwe se Jehofa a batlang go se bolelela batho ba gagwe, mme o dirisa Mika go nna moporofeti wa gagwe. Boikaelelo jwa Modimo ke go otlhaya badirabosula. O tlile go otlhaela Iseraele go obamela medingwana. Le fa go ntse jalo, se se itumedisang ke gore, Jehofa o tla segofatsa ba ba tsamayang ka leina la gagwe. Melaetsa eno e utlwala sentle mo kgaolong ya 3 go ya go ya 5 ya boporofeti jwa ga Mika.
2, 3. (a) Baeteledipele ba Iseraele ba tshwanetse ba ka bo ba na le nonofo efe, go na le moo ke eng se ba se dirang? (b) O ka tlhalosa jang papiso e e dirisitsweng mo go Mika 3:2, 3?
2 Moporofeti wa Modimo a re: “Tsweetswee, utlwang lona ditlhogo tsa ga Jakobe le lona balaodi ba ntlo ya Iseraele. A ga se tiro ya lona go itse tshiamiso?” Ee, seo ke se ba tshwanetseng ba ka bo ba se dira, mme gone ke eng se ba se dirang? Mika a re: “Lona batlhoi ba se se molemo le barati ba bosula, ba ba rutlang letlalo mo bathong le nama ya bone mo marapong a bone; lona ba e bileng lo jele nama ya batho ba me, e bile lo ba apotse letlalo la bone, gape lo tšhwetlakantse marapo a bone, lwa a thubaganya jaaka se se mo pitseng e e molomomogolo le jaaka nama mo teng ga pitsa e e apeelang.”—Mika 3:1-3.
3 Aitsane, baeteledipele ba gatelela bahumanegi le batho ba ba sa kgoneng go itshireletsa! Batho ba ba utlwang Mika ba tlhaloganya papiso e a e dirisitseng fano sentle. Fa nku e e tlhabilweng e apewa ka go bedisiwa, sa ntlha e a buiwa e bo e kgaolwa ditokololo. Ka dinako tse dingwe marapo a yone a a thujwa go ntsha moko. Nama le marapo ano di bedisediwa mo pitseng e kgolo e e tshwanang le e e umakiwang ke Mika. (Esekiele 24:3-5, 10) A bo seno e le papiso e e tshwanelang jang ne ya kafa baeteledipele ba ba bosula ba neng ba sotla batho ka teng mo motlheng wa ga Mika!
Jehofa o Lebeletse Gore re Dire Dilo ka Tshiamiso
4. Jehofa o farologana jang le baeteledipele ba Iseraele?
4 Modisa yo o lorato Jehofa o farologana thata le baeteledipele ba Iseraele. E re ka ba sa dire dilo ka tshiamiso ga ba diragatse boikarabelo jwa bone jwa go sireletsa letsomane. Go na le moo, ba sotla dinku tsa tshwantshetso, ga ba di direle dilo ka tshiamiso mme ba di direla “ditiro tsa tshololo ya madi,” jaaka go umakilwe mo go Mika 3:10. Re ka ithuta eng mo go seno?
5. Jehofa o lebeletse eng mo bathong ba ba eteletseng batho ba gagwe pele?
5 Modimo o lebeletse gore batho ba ba eteletseng batho ba gagwe pele ba dire dilo ka tshiamiso. Re fitlhela go ntse jalo ka batlhanka ba ga Jehofa gompieno. Mo godimo ga moo, seno se dumalana le Isaia 32:1 e e reng: “Bona! Kgosi e tla busa gore go nne le tshiamo; mme fa e le dikgosana, di tla busa e le dikgosana gore go nne le tshiamiso.” Mme re fitlhela go ntse jang mo motlheng wa ga Mika? “Batlhoi ba se se molemo le barati ba bosula” ba nnela go sokamisa tshiamiso.
Go Arabiwa Dithapelo Tsa Bomang?
6, 7. Ke ntlha efe ya botlhokwa e e gatelelwang mo go Mika 3:4?
6 A batho ba motlha wa ga Mika ba ka lebelela go amogelwa ke Jehofa? Legoka! Mika 3:4 ya re: “Ba tla ikuela kwa go Jehofa gore a ba thuse, mme ga a na go ba araba. Mme o tla ba fitlhela sefatlhego sa gagwe ka nako eo, go ya ka fa ba dirileng bosula ka teng mo ditirong tsa bone.” Seno se gatelela ntlha nngwe e e botlhokwa thata.
7 Jehofa ga a kitla a araba dithapelo tsa rona fa re itlwaetsa go dira boleo. Go tla nna jalo segolobogolo fa re tshela botshelo jwa boitimokanyi, re fitlha diphoso tsa rona re itira e kete re direla Modimo ka boikanyegi. Dafide o opela jaana mo go Pesalema 26:4: “Ga ke a nna le batho ba ba se nang boammaaruri; e bile ga ke tsene le ba ba fitlhang se ba leng sone.” Jehofa le ene ga a kitla a araba dithapelo tsa batho ba ba itlhokomolosang Lefoko la gagwe ka boomo!
Go Nonotshiwa ke Moya wa Modimo
8. Baporofeti ba maaka ba motlha wa ga Mika ba ne ba tlhagisiwa gore ba tla diragalelwa ke eng?
8 A bo baeteledipele ba Iseraele ba itlwaeditse go dira ditiro tse di bosula jang ne! Baporofeti ba maaka ba dira gore batho ba Modimo ba kgarakgatshege semoyeng. Baeteledipele ba ba bogagaru ba goa ba re, “Kagiso!” mme tota e le gore ba itshepisa ntwa kgatlhanong le ope fela yo o sa tsenyeng sepe mo leganong la bone. Jehofa a re: “Ka jalo lo tla nna le bosigo, gore go se ka ga nna le ponatshegelo epe; gape lo tla nna le lefifi, gore lo se ka lwa dira boitseanape. Mme letsatsi le tla phirimela baporofeti, le motshegare o tla ba fifalela. Mme ba ba bonang diponatshegelo ba tla tlhabiwa ke ditlhong, le ba ba dirang tiro ya boitseanape ruri ba tla swabisiwa. Mme ba tla tshwanelwa ke go bipa ditedu tse di fa godimo ga dipounama.”—Mika 3:5-7a.
9, 10. Go “bipa ditedu tse di fa godimo ga dipounama” go kaya eng, mme ke eng fa Mika a se na lebaka la go dira jalo?
9 Ke eng fa ba “bipa ditedu tse di fa godimo ga dipounama”? Batho ba ba boikepo ba motlha wa ga Mika ba dira jalo ka ntlha ya go tlhabiwa ke ditlhong. Mme go a tshwanela gore banna bano ba ba bosula ba tlhabiwe ke ditlhong. Go ya ka bone, “ga go na karabo epe e e tswang kwa Modimong.” (Mika 3:7b) Jehofa ga a reetse dithapelo tsa batho bape fela ba ba boikepo le ba ba boikgodiso.
10 Ga go tlhokege gore Mika a ‘bipe ditedu tse di fa godimo ga dipounama.’ Ene ga a tlhabiwe ke ditlhong. Jehofa o araba dithapelo tsa gagwe. Ela tlhoko se moporofeti yono yo o ikanyegang a se bolelang mo go Mika 3:8: “Kafa letlhakoreng le lengwe, nna ke tletse maatla, ka ntlha ya moya wa ga Jehofa, le ka tshiamiso le thata.” Mika o lebogela go bo ka metlha a ile a ‘tlala maatla, ka ntlha ya moya wa ga Jehofa’ mo bodireding jwa gagwe jo boleele le jo a bo dirileng ka boikanyegi! Seno se ile sa mo nonotsha ‘gore a bolelele Jakobe botlhanogi jwa gagwe le Iseraele boleo jwa gagwe.’
11. Batho ba nonotshiwa jang gore ba kgone go bolela molaetsa wa Modimo?
11 Mika o tlhoka maatla a a fetang a motho go bolela molaetsa wa Modimo wa katlholo. Moya wa ga Jehofa kana maatla a gagwe a a dirang, o botlhokwa. Go tweng ka rona? Re ka kgona go diragatsa thomo ya rona ya go rera fa fela Jehofa a re nonotsha ka moya wa gagwe o o boitshepo. Tiro ya rona ya go rera ga e kitla e nna le mosola ope fa re itlwaetsa go dira boleo ka boomo. Mo maemong a a ntseng jalo Modimo ga a kitla a araba dithapelo tsa rona fa re mo kopa gore a re nonotshe go dira tiro eno. Ruri re ka se ka ra kgona go bolela melaetsa ya dikatlholo tsa ga Rraarona wa selegodimo fa re se na “moya wa ga Jehofa.” Fa dithapelo tsa rona di utlwiwa e bile re thusiwa ke moya o o boitshepo, re ka kgona go bua lefoko la Modimo ka bopelokgale, jaaka Mika.
12. Ke eng fa barutwa ba pele ba ga Jesu ba ne ba ka ‘bua lefoko ka bopelokgale jotlhe’?
12 Gongwe o gakologelwa pego e e mo go Ditiro 4:23-31. Akanya o le mongwe wa barutwa ba ga Jesu ba lekgolo la ntlha la dingwaga. Babogisi ba ba galefileng ba ntse ba batla go didimatsa balatedi ba ga Keresete. Mme balatedi ba ba ikanyegang bano ba rapela Morena Molaodimogolo, ba mo kopa ba re: “Jehofa, tlhokomela matshosetsi a bone, mme o dire gore batlhanka ba gago ba nne ba bue lefoko la gago ka bopelokgale jotlhe.” Matswela e nna afe? Fa ba dira mokokotlelo, lefelo le ba neng ba phuthegetse mo go lone le a reketla, mme botlhe fela ba tladiwa moya o o boitshepo e bile ba bua lefoko la Modimo ka bopelokgale. Ka gone e kete re ka ikanya Jehofa le go ikaega ka thuso ya moya wa gagwe o o boitshepo fa re ntse re diragatsa bodiredi jwa rona.
13. Go tla direga eng ka Jerusalema le Samarea, mme ka ntlha yang?
13 Akanya gape ka motlha wa ga Mika. Go ya ka Mika 3:9-12, babusi ba ba nang le molato wa madi ba atlhola ba gabile pipamolomo, baperesiti ba ruta fela ba gabile tlhwatlhwa, mme baporofeti ba maaka ba dira tiro ya boitseanape fela ka ntlha ya madi. Ga go gakgamatse go bo Modimo a laotse gore motsemogolo wa Juda, e bong Jerusalema, “o tla nna mekoa fela ya marope”! E re ka go tletse kobamelo ya maaka le boitsholo jo bo maswe mo Iseraele, Mika o tlhotlheletsega go tlhagisa batho ba teng gore Modimo o tla dira Samarea “mokoa wa marope.” (Mika 1:6) Tota e bile, moporofeti yono o ne a tshela go fitlha a bona mephato ya Asiria e senya Samarea ka 740 B.C.E. (2 Dikgosi 17:5, 6; 25:1-21) Ga go na pelaelo gore melaetsa eno e e nonofileng kgatlhanong le Jerusalema le Samarea e ne e ka bolelwa fela ka thuso ya maatla a ga Jehofa.
14. Boporofeti jo bo kwadilweng mo go Mika 3:12 bo ile jwa diragadiwa jang, mme seo se tshwanetse go re ama jang?
14 Ruri Juda ga a kitla a kgona go tila katlholo e e botlhoko ya ga Jehofa. Gore boporofeti jo bo mo go Mika 3:12 bo diragadiwe, Siona o tla “lemiwa jaaka tshimo fela.” Go ya ka tsela e re lebang dilo ka yone mo lekgolong leno la bo21 la dingwaga, re a itse gore dilo tseno di diragetse fa Bababelona ba ne ba senya Juda le Jerusalema ka 607 B.C.E. Dilo tseno di diragetse dingwaga di le dintsi morago ga gore Mika a di porofete, mme gone o ne a tlhomamisegile gore di tlile go direga. Ruri le rona re tshwanetse go tlhomamisega fela jalo gore tsamaiso e e boikepo ya dilo ya gone jaanong e tla fedisiwa ka “letsatsi la ga Jehofa” le le boleletsweng pele.—2 Petere 3:11, 12.
Jehofa o Tlhamalatsa Dilo
15. O ka tlhalosa jang boporofeti jo bo kwadilweng mo go Mika 4:1-4 ka mafoko a gago?
15 Fa re leba dilo tse di neng tsa direga, re lemoga gore Mika o ne a bolela molaetsa o mongwe o o kgatlhang wa tsholofelo. A bo re fitlhela mafoko a a itumedisang jang ne mo go Mika 4:1-4! Mangwe a mafoko a ga Mika ke ano: “Go tla diragala go ela kwa bokhutlong jwa metlha gore thaba ya ntlo ya ga Jehofa e tla tlhomamisiwa thata kwa godimo ga ditlhoa tsa dithaba, mme eleruri e tla tsholelediwa kwa godimo ga dithota; mme ditšhaba di tla ologela kwa go yone. . . . Mme ruri o tla atlhola mo gare ga ditšhaba di le dintsi, a ba a tlhamalatsa dilo malebana le ditšhaba tse di thata tse di kwa kgakala. Mme ba tla thula ditšhaka tsa bone ba di dira magale a megoma le marumo a bone ba a dira dikere tse di pomang. Setšhaba ga se kitla se tsholeletsa setšhaba se sengwe tšhaka, le gone ga ba kitla ba tlhola ba ithuta ntwa gape. Mme ruri ba tla nna, mongwe le mongwe kafa tlase ga mofine wa gagwe le kafa tlase ga setlhare sa gagwe sa mofeige, mme go tla bo go se na ope yo o ba boifisang; gonne molomo wa ga Jehofa wa masomosomo o go buile.”
16, 17. Mika 4:1-4 e diragadiwa jang gompieno?
16 “Ditšhaba di le dintsi” le “ditšhaba tse di thata” tse go buiwang ka tsone fano ke bomang? Ga se ditšhaba le dipuso tsa lefatshe leno. Go na le moo, boporofeti jono bo bua ka batho ba ba tswang mo ditšhabeng tsotlhe ba gone jaanong ba leng seoposengwe mo tirelong e e boitshepo mo thabeng ya ga Jehofa e e leng kobamelo ya gagwe ya boammaaruri.
17 Go dumalana le boporofeti jwa ga Mika, go ise go ye kae, go tla bo go na le kobamelo e e itshekileng ya ga Jehofa mo lefatsheng lotlhe. Gompieno batho ba ba nang le “tshekamelo e e siameng ya go bona botshelo jo bo sa khutleng” ba rutwa ditsela tsa ga Jehofa. (Ditiro 13:48) Jehofa o atlhola badumedi ba ba emang Bogosi nokeng le go ba tlhamalaletsa dilo tsa semoya. Ba tla falola “pitlagano e kgolo” e le karolo ya “boidiidi jo bogolo.” (Tshenolo 7:9, 14) E re ka ba thutse ditšhaka tsa bone magale a megoma, le gompieno jaana ba tshedisana ka kagiso le Basupi ka bone le batho ba bangwe. A bo go itumedisa jang ne go nna bangwe ba bone!
Go Ikemisetsa go Tsamaya mo Leineng la ga Jehofa
18. ‘Go nna ka fa tlase ga setlhare sa mofine le sa mofeige’ go kaya eng?
18 Mo motlheng wa rona, le fa batho mo lefatsheng lotlhe ba boifa, go a re itumedisa go bo batho ba le bantsi ba ithuta ditsela tsa ga Jehofa. Re tlhoafaletse nako e ka yone batho botlhe ba ba ratang Modimo ba se kitlang ba tlhola ba ithuta ntwa gape, mme ba tla nna mongwe le mongwe ka fa tlase ga mofine le mofeige wa bone. Gantsi ditlhare tsa mofeige di jalwa mo masimong a mofine. (Luke 13:6) Go nna ka fa tlase ga mofine wa gago le setlhare sa mofeige go tshwantshetsa kagiso, katlego le polokesego. Tota le gone jaanong, kamano e re nang le yone le Jehofa e dira gore re ritibale le go ikutlwa re sireletsegile semoyeng. Fa maemo a a ntseng jalo a le teng mo pusong ya Bogosi, re tla bo re sa boife mme re tla bo re sireletsegile ka botlalo.
19. Go tsamaya mo leineng la ga Jehofa go kaya eng?
19 Fa re batla go amogelwa ke Jehofa le gore a re segofatse re tshwanetse go tsamaya ka leina la gagwe. Seno se tlhalosiwa ka tsela e e maatla mo go Mika 4:5 e mo go yone moporofeti a bolelang jaana: “Ditšhaba tsotlhe, di tla tsamaya sengwe le sengwe mo leineng la modimo wa sone; mme fa e le rona, re tla tsamaya mo leineng la ga Jehofa Modimo wa rona ka bosakhutleng, le ka bosaengkae.” Go tsamaya mo leineng la ga Jehofa ga go kaye go bua fela re re ke Modimo wa rona. Ga go re tlhoke fela gore re nne le seabe mo dipokanong tsa Bokeresete le mo tirong ya go rera ka Bogosi, le mororo ditiro tse di ntseng jalo di le botlhokwa. Fa e le gore re tsamaya mo leineng la ga Jehofa, re tshwanetse go ineela mo go ene le go leka ka bojotlhe go mo direla ka boikanyegi ka go bo re mo rata ka pelo yotlhe. (Mathaio 22:37) E re ka re le baobamedi ba ga Jehofa Modimo wa rona, re ikemiseditse go tsamaya mo leineng la gagwe.
20. Ke eng se se boleletsweng pele mo go Mika 4:6-13?
20 Tsweetswee a jaanong re sekaseke mafoko a boporofeti a Mika 4:6-13. “Morwadia Siona” o tshwanetse go ya botshwarwa ‘go ya go fitlha kwa Babelona.’ Seo ke sone se se neng sa diragalela banni ba Jerusalema mo lekgolong la bosupa la dingwaga B.C.E. Le fa go ntse jalo, boporofeti jwa ga Mika bo bontsha gore masalela a ne a tla boela kwa Juda, mme fa Siona e tsosolosiwa, Jehofa o tla ela tlhoko gore baba ba gagwe ba nyelelediwa ruri.
21, 22. Mika 5:2 e ne ya diragadiwa jang?
21 Ditiragalo tse dingwe tse dikgolo di bolelelwa pele mo go Mika kgaolo ya 5. Ka sekai, ela tlhoko se se buiwang mo go Mika 5:2-4. Mika o ne a bolelela pele gore Mmusi yo o tlhomilweng ke Modimo—“yo o simologileng mo motlheng wa bogologolo”—o tla tswa mo Bethelehema. O tla busa jaaka modisa “ka nonofo ya ga Jehofa.” Mo godimo ga moo, Mmusi yoo o tla nna mogolo, e seng fela mo Iseraele, mme le “go ya mafelelong a lefatshe.” Batho ba le bantsi ba ka tswa ba sa mo itse, mme rona re a mo itse.
22 Ke mang motho wa botlhokwa go gaisa botlhe yo o neng a tsholelwa kwa Bethelehema? Mme ke mang yo o tla nnang “mogolo go ya kwa mafelelong a lefatshe”? Ga se ope fa e se Mesia, Jesu Keresete! Fa Herode yo Mogolo a ne a botsa baperesiti ba bagolo le bakwadi gore Mesia o ne a tla tsholelwa kae, ba ne ba araba ba re: “Kwa Bethelehema wa Judea.” Ba ne ba bo ba nopola mafoko a Mika 5:2. (Mathaio 2:3-6) Batho bangwe ba lefelo leo ba e seng ba maemo le bone ba ne ba itse seno, gonne Johane 7:42 e ba nopola ba re: “A Lokwalo ga lo a re Keresete o tswa mo losikeng lwa ga Dafide, le kwa Bethelehema motsana o Dafide a kileng a bo a nna kwa go one?”
Tapologo ya Mmatota mo Bathong
23. Ke eng se se diregang gone jaanong se se diragatsang mafoko a Mika 5:7?
23 Mika 5:5-15 e bua ka go tlhasela ga Asiria go go neng go tla atlega ka nakwana fela e bile e umaka gore Modimo o tla ipusolosetsa mo ditšhabeng tse di sa mo ikobeleng. Mika 5:7 e solofetsa gore masalela a Bajuda ba ba ikwatlhaileng a tla boela kwa nagagaeng ya bone, mme gape mafoko ano a bua ka se se tla diregang mo motlheng wa rona. Mika o bolela jaana: “Ba ba setseng ba ga Jakobe ba tla nna jaaka monyo o o tswang kwa go Jehofa mo gare ga ditšhaba di le dintsi, jaaka dipula tse dikgolo mo dimeleng.” Go dirisiwa setshwantsho seno se se kgatlhang go bolelela pele gore masalela a ga Jakobe kgotsa Iseraele wa semoya a tla nna tshegofatso e e tswang kwa Modimong mo bathong. “Dinku tse dingwe” tsa ga Jesu tse di nang le tsholofelo ya mo lefatsheng di itumelela go direla ba le seoposengwe le masalela a segompieno a “Iseraele wa Modimo,” ba ba thusa go lapolosa batho ba bangwe semoyeng. (Johane 10:16; Bagalatia 6:16; Sefania 3:9) Go na le sengwe sa botlhokwa se re tshwanetseng go se akanya malebana le kgang eno. E re ka re le baboledi ba Bogosi, rotlhe re tshwanetse go anaanela tshiamelo ya go leretse batho ba bangwe tapologo ya boammaaruri.
24. O kgatlhilwe ke dintlha dife mo boporofeting jwa Mika kgaolo ya 3 go ya go ya 5?
24 O ithutile eng mo kgaolong ya 3 go ya go ya 5 ya boporofeti jwa ga Mika? Gongwe o ithutile dintlha tse di jaaka tseno: (1) Modimo o lebeletse gore batho ba ba eteletseng batho ba gagwe pele ba dire dilo ka tshiamiso. (2) Jehofa ga a kitla a araba dithapelo tsa rona fa re itlwaetsa go dira boleo ka boomo. (3) Re ka kgona go diragatsa thomo ya rona ya go rera fa fela Modimo a re nonotsha ka moya wa gagwe o o boitshepo. (4) Fa re batla go amogelwa ke Jehofa re tshwanetse go tsamaya ka leina la gagwe. (5) E re ka re le baboledi ba Bogosi, re tshwanetse go anaanela tshiamelo e re nang le yone ya go tlisetsa batho tapologo ya boammaaruri. Go ka tswa go na le dintlha tse dingwe tse di go kgatlhileng. Re ka ithuta eng gape mo bukeng eno ya Baebele ya boporofeti? Setlhogo se se latelang se tla re thusa go ithuta dithuto tsa botlhokwa go tswa mo dikgaolong tse pedi tsa bofelo tsa boporofeti jwa ga Mika jo bo nonotshang tumelo.
O ne O ka Araba Jang?
• Modimo o lebeletse eng mo bathong ba ba eteletseng batho ba gagwe pele?
• Ke eng fa thapelo le moya o o boitshepo di le botlhokwa fa re direla Jehofa?
• Batho ba ‘tsamaya jang mo leineng la ga Jehofa’?
[Dipotso Tsa Thuto]
[Setshwantsho mo go tsebe 15]
A o ka tlhalosa setshwantsho sa ga Mika se se buang ka pitsa e e apeelang?
[Ditshwantsho mo go tsebe 16]
Re dira bodiredi jwa rona ka bopelokgale fela jaaka Mika