Fa Ditsholofetso di Diragadiwa

MO HISITORING go na le ditsholofetso di le dintsi tse di sa diragadiweng. Gantsi ditšhaba di paletswe ke go boloka ditumalano tse di di saenileng di ikana gore ga di na go lwantshana, e leng selo se se neng sa felela ka gore batho ba tsone ba lwe dintwa tse di boitshegang. Nako nngwe Napoleon o ne a bolela jaana: “Dipuso di boloka ditsholofetso tsa tsone fa fela di patelesega go dira jalo, kgotsa fa e le gore seo se tla di solegela molemo.”

Go tweng ka ditsholofetso tse di dirwang ke batho? Ruri go a swabisa fa motho a palelwa ke go boloka tsholofetso ya gagwe! Bogolosegolo fa e le motho yo o mo itseng e bile o mo tshepa. Gone batho ba ka tswa ba sa kgone kgotsa ba sa batle go diragatsa ditsholofetso tsa bone.

Go na le pharologano e kgolo thata mo ditsholofetsong tse di dirwang ke batho le tse di dirwang ke Modimo! Ditsholofetso tsa Modimo di a ikanyega. Tsholofetso nngwe le nngwe e e dirwang ke Jehofa Modimo e tla diragala. Re tlhomamisegile gore e tla diragadiwa. Isaia 55:11 fa e bua ka ditsholofetso tsa Modimo tse di diragalang ya re: “Lefoko la me le le tswang mo molomong wa me le tla nna fela jalo. Ga le kitla le boela mo go nna le se na matswela, ruri le tla dira selo se se intumedisang, ruri le tla atlega mo go se ke le rometseng kwa go sone.”

Ka jalo he, re tshwanetse go leba jang ditsholofetso tsa Modimo tse di kwadilweng mo Baebeleng? Ruri re ka di ikanya. Ka sekai, moaposetoloi Johane o ne a kwala jaana: “Bona! Mogope wa Modimo o mo bathong, mme o tla aga le bone, mme ba tla nna batho ba gagwe. Mme Modimo ka boene o tla nna le bone. Mme o tla phimola dikeledi tsotlhe mo matlhong a bone, mme loso lo tla bo lo seyo, le fa e le khutsafalo le fa e le selelo le fa e le botlhoko di tla bo di sa tlhole di le gone. Dilo tsa pele di fetile.” (Tshenolo 21:3, 4) O ka itumelela ditshegofatso tseno fa o dira tumalanong le mafoko a ga Jesu a a reng: “Botshelo jo bo sa khutleng ke jo, gore ba go itse, wena, Modimo o o osi, o o boammaaruri, le ene yo o mo romileng, e bong Jesu Keresete.”—Johane 17:3.