Lefatshe Le le Se Nang Bokebekwa le Tloga le Tla

FA E le gore o ka kgona, akanya ka lefatshe le le se nang dikebekwa! Go tla bo go sa tlhole go tlhokega mapodise, dikgolegelo kgotsa tsamaiso ya tshiamiso e e lepalepanang le bokebekwa e e jang madi a mantsi e bile e raraane. E tla bo e le lefatshe le mo go lone mongwe le mongwe a tla bong a tlotla botshelo le dilo tsa ba bangwe. A seno ke go ijesa dijo tsa ditoro? O ka tswa o akanya jalo, mme phetogo e e gakgamatsang eno ya go tokafatsa dilo ke yone e e solofediwang mo Baebeleng. Ke eng o sa sekaseke se se bolelelwang pele mo Dikwalong malebana le bokebekwa le dilo tse dingwe tse di bosula tsa lefatshe leno?

Mo bukeng ya Pesalema, re bala jaana: “O se ka wa itshupa o galefile ka ntlha ya badirabosula. O se ka wa tswela ba ba dirang tshiamololo pelo. Gonne ba tla swaba ka bofefo jaaka bojang, mme ba tla nyelela jaaka bojang jo bosha jo botala. Mme ba ba pelonolo ba tla rua lefatshe, ruri ba tla nna le boitumelo jo bogolo mo letlotlong la kagiso.” (Pesalema 37:1, 2, 11) Tota ga go na ope yo o ka thibelang Modimo go diragatsa tsholofetso eno le ditsholofetso tsa gagwe tse dingwe tse di itumedisang.

Modimo o tla dirisa Bogosi jwa gagwe go tlisa masego ano. Mo thapelong ya Morena, Jesu Keresete o ne a ruta balatedi ba gagwe gore ba rapelele Bogosi jono gore bo tle le gore go rata ga Modimo go dirwe “mo lefatsheng, jaaka kwa legodimong.” (Mathaio 6:9, 10) Go ise go ye kae, mo Bogosing jono, go tla bo go sa tlhole go na le ope mo lefatsheng yo o tla tlhotlheletsegang go dira bokebekwa ka ntlha ya go humanega, go gatelelwa kgotsa ka ntlha ya bopelotshetlha. Go na le moo, Lefoko la Modimo le bolela jaana: “Go tla nna le dijo tsa ditlhaka di le dintsi mo lefatsheng; go tla penologa mo godimo ga dithaba.” (Pesalema 72:16) Ee, Jehofa Modimo o tla naya mongwe le mongwe mo lefatsheng dilo tse di molemo goyagoile. Se se botlhokwa le go feta, batho ba tla bo ba rata Modimo le baagelani mme lefatshe ga le kitla le tlhola le tshwenngwa ke bokebekwa.