Ba Lelapa la Gaabo Jesu—E ne E le Bomang?

M O DIKAROLONG tse dintsi tsa lefatshe, gantsi ka December o bona ditshwantsho tsa botsalo jwa losea Jesu a tlhokometswe ke mmaagwe, e bong Marea le rraagwe yo o mo godisitseng, Josefa. Ditshwantsho tse di ntseng jalo tsa lelapa di ka nna tsa kgatlha le batho ba ba ipolelang gore ga se Bakeresete. E re ka di bontsha Jesu thata, ke eng se Dikwalo di se re bolelelang ka lelapa la gaabo Jesu la mo lefatsheng?

Jesu o goletse mo lelapeng le le sa tlwaelegang. O tshotswe ke kgarebane e e bidiwang Marea, ka jalo a nna leloko la lelapa la batho. Go ya ka Baebele, botshelo jwa gagwe bo ne jwa tsenngwa mo popelong ya ga Marea ka moya o o boitshepo. (Luke 1:30-35) Pele ga go bolelwa gore Jesu o ne a tla imiwa ka kgakgamatso, Marea o ne a beeleditswe ke monna yo o bidiwang Josefa, yo o neng a tla godisa Jesu.

Morago ga botsalo jwa ga Jesu, Josefa le Marea ba ne ba nna le bana ba bangwe, bomorwarraagwe Jesu le bokgaitsadie ka motsadi a le mongwe. Seno se bonala sentle mo potsong e banni ba Nasaretha ba neng ba e botsa Jesu moragonyana: “A yono ga se morwa mmetli wa dikgong? A mmaagwe ga a bidiwe Marea, le bomorwarraagwe a ga se Jakobe le Josefa le Simone le Judase? Le bokgaitsadie, a botlhe ga ba na le rona?” (Mathaio 1:25; 13:55, 56; Mareko 6:3) Go tswa mo go seno re ka swetsa ka gore ba lelapa la gaabo Jesu ba ba gaufi e ne e le batsadi ba gagwe, bomonnawe ba basimane ba le banè le bokgaitsadie ba ka nna babedi.

Le fa go ntse jalo, batho bangwe gompieno ga ba dumele gore bomonnawe Jesu ba basimane le bokgaitsadie e ne e le bana ba ga Josefa le Marea. Ka ntlha yang? New Catholic Encyclopedia ya re: “Kwa tshimologong, Kereke e ne e ruta gore Marea o ne a nna a le kgarebane go ya go ile. Ka ntlha ya seno, ga go na pelaelo gore Marea ga a ka a nna le bana ba bangwe.” Yone buka eo ya re mafoko “morwarre” le “kgaitsadi” a ka raya “mongwe kgotsa batho bangwe ba ba amanang ka bodumedi kgotsa ka kgolagano e nngwe” kgotsa ba losika, kgotsa bontsala.

A tota go ntse jalo? Le e leng baithutabodumedi bangwe ba Bakatoliki, ba ba sa dumalaneng le thuto e e tlwaelegileng ba ema nokeng kgang ya gore Jesu o ne a na le bomorwarraagwe le bokgaitsadie. John P. Meier, yo e neng e le poresidente wa Catholic Bible Association of America, o ne a kwala jaana: “Mo Tesetamenteng e Ntšha lefoko adelphos [morwarre] fa le sa dirisiwa ka tsela ya tshwantshetso mme le dirisiwa go tlhalosa kamano nngwe ya losika kgotsa ya semolao, le raya fela morwarramotho ka batsadi ba le babedi kgotsa a le mongwe, e seng sepe se sele.” * Ee, Dikwalo di bontsha gore Jesu o ne a na le bomorwarraagwe le bokgaitsadie, ba e neng e le bana ba ga Josefa le Marea.

Diefangele di umaka ba bangwe ba losika lwa ga Jesu, mme jaanong a re tlhomeng mogopolo mo go ba lelapa la gaabo Jesu ba ba gaufi mme re boneng se re ka se ithutang mo go bone.

[Ntlha e e kwa tlase]