Dipotso Tse di Tswang Kwa Babading

Mo thapelong ya ga Jesu ya sekao, a o ne a raya gore thato ya Modimo e ne e dirwa kwa legodimong le fa gone baengele ba ba boikepo ba ne ba ise ba kobiwe mo go lone?

Jaaka go kwadilwe mo go Mathaio 6:10, Jesu o ne a re: “Thato ya gago e diragale le mo lefatsheng, jaaka kwa legodimong.” Kopo eno e ka tlhaloganngwa ka ditsela tse pedi. Sa ntlha, e ka tlhaloganngwa e le thapelo ya gore thato ya Modimo e dirwe mo lefatsheng jaaka e setse e dirwa kwa legodimong kana, sa bobedi, e le kopo ya gore e dirwe ka botlalo kwa legodimong le mo lefatsheng. * Mafoko a ga Jesu a a tlang pele ga ano, “a bogosi jwa gago bo tle,” a bontsha fa tlhaloso ya bobedi e le yone e e dumalanang thata le Dikwalo. E bile a bontsha maemo a a neng a le teng fa Jesu a ne a le mo lefatsheng le nako e telele morago ga moo. Ka tsela efe?

Buka ya Tshenolo e bua ka dilo tse pedi tse di neng di tla diragala fa Bogosi Jwa Modimo bo tlhongwa kwa legodimong. Selo sa ntlha se ama legodimo ka bolone, sa bobedi se ama lefatshe. Tshenolo 12:7-9, 12 ya re: “Ga tsoga ntwa kwa legodimong: Mikaele le baengele ba gagwe ba tlhabana le kgogela, le kgogela le baengele ba yone ba tlhabana mme ya se ka ya fenya, le gone ba se ka ba tlhola ba bonelwa bonno kwa legodimong. Jalo kgogela e kgolo ya piriganyediwa kwa tlase, noga ya kwa tshimologong, e e bidiwang Diabolo le Satane, yo o tsietsang lefatshe lotlhe le le nang le banni; ya piriganyediwa kwa tlase kwa lefatsheng, le baengele ba yone ba piriganyediwa kwa tlase le yone. Ka lebaka leno itumeleng, lona magodimo le lona ba lo agileng mo go one! A bo go latlhega lefatshe le lewatle, ka gonne Diabolo o fologetse kwa go lona, a le bogale jo bogolo, ka a itse gore o na le lobaka lo lokhutshwane lwa nako.”

Dibopiwa tsotlhe tsa semoya tse di neng di tsuologa di ne tsa kobiwa kwa legodimong fa Satane le madimona ba ne ba ntshiwa kwa legodimong morago ga 1914, mme seno se ne sa tlisetsa barwa ba baengele ba ba ikanyegang ba ga Jehofa boitumelo jo bogolo, ba ba neng ba bopa karolo e kgolo ya popo ya gagwe ya semoya. (Jobe 1:6-12; 2:1-7; Tshenolo 12:10) Ka jalo, kopo ya ga Jesu mo thapelong ya gagwe ya sekao, e ne ya diragadiwa kwa legodimong ka nako eo. Botlhe ba ba neng ba sala koo kwa legodimong ba ne ba ikanyega mo go Jehofa mme ba ineela ka bojotlhe mo bolaoding jwa gagwe.

Go tshwanetse ga gatelelwa gore le eleng pele ga foo, fa baengele ba ba boikepo ba ne ba sa ntse ba kgona go tsena kwa legodimong, ba ne ba sa tlhole ba le karolo ya lelapa la semoya la Modimo e bile ba beetswe dithibelo. Ka sekai, temana ya Jude 6 e bontsha gore fa e sa le ka lekgolo ka ntlha la dingwaga C.E., ba ne ba ‘beetswe katlholo ya letsatsi le legolo mo lefifing le le kwenneng [la semoya] ka dikgole tsa bosakhutleng.’ Ka tsela e e tshwanang, temana ya 2 Petere 2:4 ya re: “Modimo [ga a ka] a ithiba go otlhaya baengele ba ba neng ba leofa, mme, ka go ba latlhela mo teng ga Tatarase [lefelo le le kwa tlasetlase], o ne a ba tsenya mo dikhuting tsa lefifi le le kwenneng [la semoya] gore ba beelwe katlholo.” *

Go farologana le ka nako ya fa baengele ba ba boikepo bano ba ne ba sa ntse ba le kwa legodimong  mme gone ba sa tlhole ba le karolo ya lelapa la semoya la Modimo, gone jaanong ba na le taolo e kgolo mo lefatsheng. Tota e bile, Lefoko la Modimo le bitsa Satane le re ke “mmusi wa lefatshe leno” mme le bitsa madimona “babusi ba lefatshe ba lefifi leno.” (Johane 12:31; Baefeso 6:11, 12; 1 Johane 5:19) Ka ntlha ya taolo e Diabolo a neng a na le yone, o ne a ka kgona go naya Jesu “magosi otlhe a lefatshe le kgalalelo ya one” fa a ne a ka mo obamela gangwe fela. (Mathaio 4:8, 9) Ka jalo, go bonala sentle gore fa Bogosi Jwa Modimo ‘bo tla’ mo lefatsheng, bo tla tlisa diphetogo tse dikgolo mo lefatsheng.

Mo lefatsheng, ‘go tla’ ga Bogosi Jwa Modimo go tla tlisa tsamaiso e ntšha gotlhelele ya dilo. Bogosi jono bo tla senya dipuso tsotlhe tsa batho mme bo buse bo le bosi mo lefatsheng. Gape, batho ba ba boifang Modimo, ba ba tla bong ba busiwa ke jone, ba tla bopa “lefatshe le lesha.” (2 Petere 3:13; Daniele 2:44) Bogosi jono gape bo tla fedisa le boleo mo bathong ba ba kutlo mme kgabagare bo dire lefatshe lotlhe paradaise, ka go dira jalo bo fedise sengwe le sengwe se se amanang le puso ya ga Satane.—Baroma 8:20, 21; Tshenolo 19:17-21.

Kwa bokhutlong jwa Mileniamo, fa Bogosi Jwa ga Mesia bo dirile thato ya Modimo, “Morwa ka boene le ene o tla ipaya mo taolong ya Ene yo o neng a baya dilo tsotlhe mo taolong ya gagwe, gore Modimo a nne dilo tsotlhe mo go mongwe le mongwe.” (1 Bakorintha 15:28) Morago ga moo go tla nna le teko ya bofelo, e morago ga yone Satane, madimona a gagwe le batho botlhe ba ba tsuologang ba ba tsieditsweng ba tla senyetswang ruri mo “losong lwa bobedi.” (Tshenolo 20:7-15) Morago ga moo, dibopiwa tsotlhe tse di botlhale kwa legodimong le mo lefatsheng di tla ineela ka go rata mo bolaoding jo bo lorato jwa ga Jehofa. Fa seno se direga, thapelo ya ga Jesu ya sekao e tla bo e diragaditswe ka botlalo.—1 Johane 4:8.

[Dintlha tse di kwa tlase]