“Nngwe ya Ditiro Tse Dikgolo Tsa Boenjeniri”

FA TEMPELE ya ga Jehofa e ne e agiwa kwa Jerusalema ka nako ya puso ya ga Kgosi Solomone dingwaga tse di ka nnang 3 000 tse di fetileng, go ne ga agiwa mogopo o montle wa kopore mme wa bewa ka fa ntle ga kgoro ya tempele. O ne o le bokete jo bo fetang ditone di le 30 mme o kgona go rwala dilitara di le 40 000 tsa metsi. Mogopo ono o mogolo o ne o bidiwa lewatle le le thetsweng. (1 Dikgosi 7:23-26) Albert Zuidhof, yo e kileng ya nna mookamedi wa tsa botegeniki wa National Research Council ya kwa Canada, o akgela jaana mo makasineng wa Biblical Archeologist: “Ga go pelaelo gore eno e ne e le nngwe ya ditiro tse dikgolo thata tsa boenjeniri e e kileng ya dirwa mo setšhabeng sa Bahebera.”

Lewatle leno le ne le agilwe jang? Baebele ya re: “Kgosi e ne ya di thela [dilwana tsa kopore] mo seboping sa letsopa mo Kgaolong ya Joredane.” (1 Dikgosi 7:45, 46) Zuidhof a re: “Tiro eno ya go thela e tshwanetse ya bo e ne e tshwana le e e sa ntseng e dirisiwa go dira ditleloko tse dikgolo tsa boronse.” O tlhalosa jaana: “Seno se ne se akaretsa foromo ya beisene e e dirilweng ka bonota e e thetsweng mo seboping se se omileng sentle. . . . Fa seno se sena go dirwa, banna ba ba thelang ba ne ba tshwanetse go aga foromo ya kwa ntle mo godimo ga foromo e e dirilweng ka bonota ba bo ba e tlogela gore e ome. Dikgato tsa bofelo e ne e le go gakolosa bonota ba bo ba thela kopore e e gakologileng mo teng.”

Ka ntlha ya bogolo le boima jwa lewatle le le thetsweng, go le aga go ne go tlhoka botswerere jo bo bogolo. Karolo e e ka fa teng le e ka fa ntle ya foromo e ne e tshwanetse go kgona go emelana le bokete jwa ditone tse di ka nnang 30 tsa kopore e e gakolositsweng, mme kopore e ne e tshwanetse go thelwa kwantle ga go kgaotsa go thibela gore e se ka ya phanyega. Go ka direga gore seno se ne se tlhoka gore go nne le maubelo a a gokagantsweng go thela kopore e e gakolositsweng mo foromong. A bo e ne e le namane e tona ya tiro jang ne!

Mo thapelong ya ga Kgosi Solomone ya fa a ne a neela tempele, o ne a tlotla Jehofa Modimo ka ntlha ya tiro e kgolo eno ya mo tempeleng, a re: “O ne wa dira tsholofetso ka molomo wa gago, mme o e diragaditse ka seatla sa gago.”—1 Dikgosi 8:24.