Dipotso Tse di Tswang Kwa Babading
Dipotso Tse di Tswang Kwa Babading
Go ile ga diragala eng ka nako ya tiragalo e e kwadilweng mo go Ekesodo 4:24-26, mme ke botshelo jwa ga mang jo bo neng bo le mo kotsing?
Moshe o ne a le mo tseleng a ya Egepeto le mosadi wa gagwe e bong Siphora, le barwa ba gagwe Gereshome le Eliasare, fa go ne go direga se se latelang: “Go ne ga diragala mo tseleng kwa lefelong la bonno gore Jehofa a kopane le ene mme a nna a batla tsela ya go mmolaya. Labofelo Siphora a tsaya legweka mme a kgaola letlalo la bonna la ga morwawe mme a dira gore le ame dinao tsa gagwe a bo a re: ‘Ke ka gonne o monyadi wa madi mo go nna.’ Ka gone a mo lesa a tsamaya. Ka nako eo Siphora a re: ‘Monyadi wa madi,’ ka ntlha ya go rupa.” (Ekesodo 4:20, 24-26) Le mororo ditemana tseno di sa tlhaloganyesege sentle e bile go sa kgonege gore go tlhomamisiwe gore di kaya eng, Dikwalo di re naya lesedinyana ka ditemana tseno.
Pego eno ga e tlhalose sentle gore ke botshelo jwa ga mang jo bo neng bo le mo kotsing. Le fa go ntse jalo, go a utlwala gore re ka swetsa ka gore e ne e se botshelo jwa ga Moshe, ka gonne o ne a sa tswa go amogela taelo e e tswang kwa Modimong ya gore a etelele Baiseraele pele go tswa kwa Egepeto. (Ekesodo 3:10) Ga go bonale go ka direga gore fa Moshe a sa ntse a le mo tseleng go ya go diragatsa tiro eo, moengele wa Modimo a bo a tshosetsa gore o tla mmolaya. Ka jalo, go bonala e ne e le botshelo jwa mongwe wa barwa ba gagwe jo bo neng bo le mo kotsing. Molao o Aborahame a neng a o neetswe pelenyana ga moo malebana le go rupa o bolela jaana: “Motho wa monna yo o sa rupisiwang yo nama ya letlalo la gagwe la bonna e se kitlang e rupisiwa, moya oo a o kgaolwe mo bathong ba one. O tlodile kgolagano ya me.” (Genesise 17:14) Go bonala Moshe a ile a itlhokomolosa go rupisa morwawe, mme ka ntlha ya seo moengele wa ga Jehofa o ne a tshosetsa go bolaya mosimane.
Ke dinao tsa ga mang tse di neng tsa amiwa fa Siphora a ne a kgaola letlalo la bonna lwa morwawe fa a ne a leka go baakanya dilo? E ne e le moengele wa ga Jehofa yo o neng a na le maatla a go bolaya morwa yo o sa rupisiwang. Ka jalo, go a utlwala gore Siphora o ne a tla dira gore letlalo la bonna le ame dinao tsa moengele, e le bosupi jwa gore o dirile se se batlegang mo kgolaganong.
Mafoko a ga Siphora a a reng “o monyadi wa madi mo go nna” ga a tlwaelega. A supa eng ka ene? Ka go diragatsa se se batlegang mo kgolaganong malebana le go rupisiwa, Siphora o ne a dumela go tsena mo kgolaganong ya go nna le kamano le Jehofa. Molao wa kgolagano o o neng wa dirwa le Baiseraele moragonyana o bontsha gore mo kgolaganong eno ya go nna le kamano le ene, Jehofa a ka tsewa e le monna mme motho yo mongwe e le mosadi wa gagwe. (Jeremia 31:32) Ka jalo, fa a ne a bitsa Jehofa (ka moemedi wa gagwe wa moengele) a re ke “monyadi wa madi,” go bonala Siphora ka boene a ne a amogela dilo tse di batlegang mo kgolaganong. Go ne go ntse jaaka e kete o amogela boemo jwa go nna mosadi mo kgolaganong ya go rupisiwa mme Jehofa Modimo ene e le monna wa gagwe. Le fa go ntse jalo, ka go bo a ile a tsaya kgato go supa gore o tla dira se Modimo a se batlang, botshelo jwa morwawe bo ne bo sa tlhole mo le mo kotsing.