A o Nonotshiwa ke Lefoko la Modimo?

ODIRA jang fa o lebane le dikgwetlho? Fa Jesu a ne a lebane le dikgwetlho tsa ga Satane, o ne a thuswa ke go gakologelwa temana e e amanang le maemo a a neng a le mo go one. (Mathaio 4:1-11) Ka tsela e e tshwanang, fa Kgosi Dafide a ne a lebane le diteko, o ne a nonotshiwa ke Lefoko la Modimo. O ne a re: “Fa dikakanyo tsa me tse di tlhobaetsang di ne di ntsifala mo teng ga me, dikgomotso tsa gago di ne tsa simolola go tshwara moya wa me ka tlekeetso.”—Pesalema 94:19.

Ka tsela e e tshwanang, fa re gopola temana e re e ratang, e ka re gomotsa kgotsa ya re nonotsha fa re lebane le dikgwetlho. Ka sekai, Rex, yo gone jaanong a nang le dingwaga di le 89, o nnile mmoledi wa nako e e tletseng fa e sa le ka 1931. Le fa go ntse jalo, a re: “Gantsi ke ne ke ikutlwa ke sa tshwanelege fa ke fiwa kabelo e e kgethegileng mo bodireding.” O ne a lebana jang le seno? Ke ne ka gopola temana ya me e ke e ratang thata, Diane 3:5 e e reng: ‘Ikanye Jehofa ka pelo ya gago yotlhe mme o se ka wa ikaega ka tlhaloganyo ya gago.’ Go gopola le go dirisa temana eno go ne ga nthusa gore ke diragatse kabelo ya me sentle.”

Tota le bana ba solegelwa molemo fa ba na le temana e ba e ratang. Jack wa dingwaga di le thataro a re temana e a e ratang thata ke Mathaio 24:14. Temana eno e mo rotloetsa gore a dire tiro ya go rera le batsadi ba gagwe. A re: “Ke rata go neela bosupi ka Matlhatso mangwe le mangwe le mama, papa le kgaitsadiake.”

Jaaka Jesu, a le wena ka dinako tse dingwe tumelo ya gago e gwetlhiwa ka tlhamalalo? Fa go ntse jalo, Bafilipi 4:13 e ka nna nngwe ya ditemana tse o di ratang thata. Jaaka Kgosi Dafide, a o na le ‘dikakanyo tse di go tlhobaetsang’? Fa o ka gopola Bafilipi 4:6, 7 go tla go thusa gore o itshoke. A ka dinako tse dingwe o tshwenyega ka gore tirelo e o e direlang Modimo ga e na mosola? Fa go ntse jalo, o tla nonotshiwa ke go gopola 1 Bakorintha 15:58.

Fa re itse ditemana tse di tshwanetseng ka tlhogo, Lefoko la Modimo le tla re naya maatla mo botshelong. (Bahebera 4:12) Ditemana tse di ntseng jalo tse re di ratang di ka re nonotsha le go re gomotsa.—Baroma 15:4.