Tsela ya go Tshela Botshelo jo Boleele jo bo Itumedisang

“MONGWE LE MONGWE o batla go gola; mme ga go na ope yo o batlang go tsofala.” Polelwana nngwe ya rialo. Batho ba le bantsi ba ba atamelang dingwaga tsa go tlogela tiro ba lebeletse pele gore ba nne le nako e e oketsegileng mme maikarabelo a bone a fokotsege. Le fa go ntse jalo, ba boifa gore ba ka nna batho ba ba se nang maikaelelo ape mo botshelong. Mme gape ba boifa go kgaphelwa kwa thoko, go sa itumele le go koafala mo mmeleng.

Ka jalo, sephiri sa botshelo jo bo itumetseng ke eng? Ditsala tse di siameng le lelapa le go ratanwang mo go lone di thusa batho ba basha le ba ba godileng gore ba itumele. Mme se ba bangwe ba se dirang go thusa motho yo o godileng ga se sone fela se se botlhokwa. Se se botlhokwa le go feta ke se motho yo o godileng a ka se direlang ba bangwe.

Patlisiso nngwe e go tserweng nako e telele e dirwa mo banyalaning ba ba setseng ba godile ba le 423 e ne ya bontsha gore “go thusa batho ba bangwe go ka leelefatsa botshelo jwa rona.” Stephanie Brown, yo o neng a dira patlisiso eno, o tlhalosa jaana: “Dilo tse re di lemogileng mo patlisisong eno di bontsha gore se re se bonang mo bathong ba re tsalanang le bone ga se sone se se re solegelang molemo; ke moya wa go aba o re o bontshang mo go bone.” Go aba go go ntseng jalo go ka nna ga akaretsa go thusa ba bangwe ka tiro ya mo ntlong, go tlhokomela bana, go dira ditiro dingwe, go thusa ka sepalangwa kgotsa go reetsa fa mongwe a tlhoka go bua le rona.

Dingwaga di ka nna 2 000 tse di fetileng, Jesu Keresete o ne a re: “Go na le boitumelo jo bogolo mo go abeng go na le jo bo leng gone mo go amogeleng.” (Ditiro 20:35) Tsela ya go tshela botshelo jo boleele le jo bo itumetseng ga e a ikaega ka go nna le madi a mantsi mo bankeng kgotsa kalafi e e dirang gore motho a se ka a tsofala kgotsa go ja dijo tse di nang le dikotla. Go na le moo, e ikaegile ka gore motho a nne a tlhagafetse go dirisa nako, nonofo le maatla a gagwe go thusa batho ba bangwe ka dilo tse ba di tlhokang mo botshelong.

Le fa go ntse jalo, go tlhokega se se fetang fela go aba gore re se ka ra tsofala ka bonako, ra lwala le go swa ka bonako. Ke Bogosi Jwa Modimo fela jo bo tla fedisang dilo tse di ntseng jalo. Mo pusong ya gagwe, bolwetse bo tla bo bo sa tlhole bo le gone le e leng “loso lo tla bo lo seyo.” (Tshenolo 21:3, 4; Isaia 33:24) Tota e bile, batho ba ba kutlo ba tla tshelela ruri ka boitumelo mo lefatsheng la paradaise. (Luke 23:43) Basupi ba ga Jehofa ba itumela go bo ba kgona go bontsha ba bangwe tsela eno e e theilweng mo Baebeleng ya go tshela botshelo jo boleele le jo bo itumetseng.