“Ke Selo se se Molemolemo Se o Ka se Dirang”

ALEXIS ke mosimane wa dingwaga di le tlhano yo o nnang mo motseng wa Morelia, kwa Mexico, mme batsadi ba gagwe ba ithuta Baebele le go ya kwa dikokoanong tsa Basupi ba ga Jehofa. Nako nngwe fa a ne a ile kwa kopanong ya potologo le ba lelapa la gabone, o ne a bona fa go dirwa pontsho ya fa go rerwa ka ntlo le ntlo. Ka yone fela nako eo o ne a leba rraagwe mme a mmotsa a re, “Papa, Papa, ke ka ntlha yang fa wena o sa ye go rera?” Rraagwe a mo araba a re, “Ke sa ntse ke ithuta gore ke kgone go dira jalo.” Alexis a araba jaana a itumetse, “Papa, seo ke selo se se molemolemo se o ka se dirang.”

Ngwana yo monnye yono o ne a lemoga gore go botlhokwa gore a dire tumalanong le se a se itseng ka Jehofa. E re ka a nna mo ntlong e le nngwe le bangwe ba bana ba ga mangwaneagwe, o ne a simolola pele ka go rapela Jehofa mme go tswa foo a bua le bone ka se a se rutilweng ke batsadi ba gagwe mo bukeng ya Buka ya Me ya Dipolelo tsa Bibela. Le mororo Alexis a ne a ise a itse go bala, o ne a itse se se mo bukeng eno sentle tota ka go leba fela ditshwantsho tse di neng di bontsha kgang e e tlotlwang. O ne a ba a tlhalosa gore o batla go etela batho mo magaeng a bone go ba tlotlela ka se a neng a se ithuta ka maikaelelo a Modimo.

Ee ruri, bana mmogo le bagolo ba ka kgona go dumalanya matshelo a bone le se Jehofa, “Moitshepi,” a se lebeletseng mo go bone mme ka go dira jalo ba nne le tshiamelo e e molemolemo ya go neela bosupi ka ene mo gare ga ditšhaba. (Isaia 43:3; Mathaio 21:16) Ga go pelaelo gore, seno ke sengwe sa dilo tse di molemolemo tse motho a ka di dirang.