Dipotso Tse di Tswang Kwa Babading

Ke eng fa Basupi ba ga Jehofa ba tsaya gore palo ya 144 000 e e umakilweng mo bukeng ya Tshenolo ke ya mmatota ba sa e tseye e le ya tshwantshetso?

Moaposetoloi Johane o ne a kwala jaana: “Ka utlwa palo ya ba ba neng ba tshwailwe, dikete di le lekgolo masome a manè le bonè.” (Tshenolo 7:4) Mo Baebeleng, polelwana e e reng “ba ba neng ba tshwailwe” e bua ka setlhopha sa ba ba tlhophilweng mo bathong gore ba ye go busa le Keresete kwa legodimong ba busa lefatshe le le tlang la Paradaise. (2 Bakorintha 1:21, 22; Tshenolo 5:9, 10; 20:6) Palo ya bone ya 144 000 e tsewa e le ya mmatota ka mabaka a le mmalwa. Lengwe la mabaka le fitlhelwa mo ditemaneng tse di dikologileng Tshenolo 7:4.

Fa moaposetoloi Johane a sena go bolelelwa mo ponong ka ga setlhopha seno sa ba ba 144-000, o ne a bontshiwa setlhopha se sengwe. Johane o tlhalosa setlhopha seno sa bobedi a re ke “boidiidi jo bogolo, jo go seng motho ope yo o neng a kgona go bo bala, bo tswa mo merafeng yotlhe le ditso le ditšhaba le diteme.” Boidiidi jono jo bogolo ke jwa batho ba ba tla falolang “pitlagano e kgolo” e e tlang, e e tla senyang lefatshe la gompieno le le boikepo.—Tshenolo 7:9, 14.

Le fa go ntse jalo, ela tlhoko pharologanyo e Johane a e bontshang magareng ga temana 4 le 9 tsa Tshenolo kgaolo 7. O bolela gore setlhopha sa ntlha sa “ba ba neng ba tshwailwe,” se na le palo e e tlhomameng. Le fa go ntse jalo, setlhopha sa bobedi sa “boidiidi jo bogolo,” ga se na palo e e tlhomameng. Ka ntlha ya seno, go a utlwala go tsaya palo ya 144 000 e le ya mmatota. Fa palo eno ya 144 000 e ne e ka bo e le ya tshwantshetso e bile e lebisitse go setlhopha sa batho ba tota ba se nang palo, re ne re se kitla re kgona go bona pharologanyo e e leng teng fa gare ga ditemana tseno tse pedi sentle. Ka jalo, kgang e go buiwang ka yone mo ditemaneng tse dingwe tse di dikologileng ditemana tseno e bontsha sentle gore palo ya 144 000 e tshwanetse go tsewa e le ya mmatota.

Bakanoki ba ba farologaneng ba Baebele, ba bogologolo le ba gompieno, ba fitlheletse tshwetso e e tshwanang—gore palo eno ke ya mmatota. Ka sekai, mokwadi mongwe wa dikishinare kwa Boritane e bong Dr. Ethelbert W. Bullinger o ne a bua jaana dingwaga di le 100 tse di fetileng fa a ne a akgela ka Tshenolo 7:4, 9: “Ke boammaaruri fela: palo e e tlhomameng e farologanngwa le palo e e sa tlhomamang mo go yone kgaolo eo.” (The Apocalypse or “The Day of the Lord,” tsebe 282) Bosheng jaana Robert L. Thomas, Jr., yo e leng porofesa wa New Testament at The Master’s Seminary kwa United States o ne a kwala jaana: “Ga go na mabaka ape a a utlwalang a go tsaya palo eno e le ya tshwantshetso.” O ne a oketsa a re: “Palo e e tlhomamameng ya [Tshenolo 7:4] e farologanngwa le palo e e sa tlhomamang ya [Tshenolo] 7:9. Fa palo eno e tsewa e le ya tshwantshetso, ga go na palo epe mo bukeng eno e e ka tsewang e le ya mmatota.”—Revelation: An Exegetical Commentary, Bolumo 1, tsebe 474.

Bangwe ba bolela gore ka ntlha ya gore buka ya Tshenolo e bua thata ka mafoko a tshwantshetso, dipalo tsotlhe tse di fitlhelwang mo bukeng eno, go akaretsa le palo ya 144 000 di tshwanetse tsa tsewa e le tsa tshwantshetso. (Tshenolo 1:1, 4; 2:10) Le fa go ntse jalo, tshwetso eo ga se yone le e seng. Ke boammaaruri gore buka ya Tshenolo e  na le dipalo di le dintsi tsa tshwantshetso, mme gape e na le dipalo tsa mmatota. Ka sekai, Johane o bua ka “baaposetoloi ba le lesome le bobedi ba ga Kwana.” (Tshenolo 21:14) Go bonala sentle gore palo ya 12 e go buiwang ka yone mo temaneng eno ke ya mmatota, ga se ya tshwantshetso. Mo godimo ga moo, moaposetoloi Johane o kwadile ka “dingwaga tse di sekete” tsa puso ya ga Keresete. Palo eno le yone e tshwanetse go tsewa e le ya mmatota, jaaka re lemoga fa re sekaseka ka kelotlhoko se Baebele e se buang. * (Tshenolo 20:3, 5-7) Ka gone, gore palo e e mo bukeng ya Tshenolo e tshwanetse go tsewa e le ya mmatota kgotsa e le ya tshwantshetso, go ikaegile ka kgang e go buiwang ka yone mo ditemaneng tse di e dikologileng.

Kgopolo ya gore palo ya 144 000 ke ya mmatota le gore e lebisitse go palo e e lekanyeditsweng ya batho, ke gore setlhopha se sennye fa se bapisiwa le “boidiidi jo bogolo,” gape e dumalana le ditemana tse dingwe tsa Baebele. Ka sekai, moragonyana mo ponong ya ga moaposetoloi Johane, ba ba 144,000 ba tlhalosiwa e le ba ba neng “ba rekwa mo bathong e le mabutswapele.” (Tshenolo 14:1, 4) Lefoko le le reng “mabutswapele” le kaya setlhopha se sennye sa maungo se se tlhophilweng go tswa mo maungong a mangwe. Gape, fa Jesu a ne a sa ntse a le mo lefatsheng, o ne a bua ka ga ba ba neng ba tla busa le ene mo Bogosing jwa gagwe jwa kwa legodimong mme a ba bitsa “letsomanyane.” (Luke 12:32; 22:29) Ee ruri, palo ya ba ba tlhophilweng mo bathong ba ba tla busang kwa legodimong e nnye thata fa e bapisiwa le ya batho ba ba tlileng go nna mo lefatsheng le le tlang la Paradaise.

Ka gone, ditemana tse di dikologileng Tshenolo 7:4 le ditemana tse dingwe tse di amanang le yone tse di fitlhelwang mo Baebeleng di supa gore palo ya 144 000 e tshwanetse go tsewa e le ya mmatota. E lebisitse mo go ba ba tla busang kwa legodimong le Keresete ba busa lefatshe la paradaise, le le tla bong le tletse ka palo e kgolo e e ka se kang ya lekanngwa ya batho ba ba itumetseng ba ba obamelang Jehofa Modimo.—Pesalema 37:29.

[Ntlha e e kwa tlase]

[Mafoko a a mo go tsebe 31]

Palo ya baruaboswa kwa legodimong ke 144 000 fela

[Setshwantsho mo go tsebe 31]

“Boidiidi jo bogolo” ga bo na palo

[Motswedi wa Setshwantsho mo go tsebe 31]

Dinaledi: Courtesy of Anglo-Australian Observatory, setshwantsho se tserwe ke David Malin