‘Batlisisang Gore ke Mang yo o Tshwanetseng’

DAMASEKO e ne e le motse o o atlegileng mo lekgolong la ntlha la Motlha wa rona o o Tlwaelegileng. Ka gonne o ne o dikologilwe ke ditshingwana tsa maungo, o ne o tshwana le lefelo le ditlhopha tsa batho ba ba tswang kwa dinageng tsa botlhaba jwa yone ba neng ba ka ikhutsa mo go lone. Morago fela ga loso lwa ga Jesu Keresete, go ne ga nna le phuthego ya Bokeresete kwa Damaseko. Maloko mangwe a yone e ne e le Bajuda ba ba ka tswang ba nnile balatedi ba ga Jesu kwa Moketeng wa Pentekosete kwa Jerusalema ka 33 C.E. (Ditiro 2:5, 41) Bangwe ba barutwa ba ba neng ba tswa kwa Judea ba ka tswa ba ne ba fudugela kwa Damaseko fa go ne go tsoga pogiso fa Setefane a sena go kgobotlediwa ka maje.—Ditiro 8:1.

Mo e ka nnang ka 34 C.E., Mokeresete mongwe wa kwa Damaseko yo o bidiwang Ananiase o ne a newa kabelo e e sa tlwaelegang. Morena o ne a mo raya a re: “Nanoga, ya kwa mmileng o o bidiwang Tlhamalalo, mme kwa ntlong ya ga Judase o batle monna yo o bidiwang Saulo, yo o tswang kwa Tareso. Gonne, bona! o a rapela.”—Ditiro 9:11.

Mmila o o bidiwang Tlhamalalo o ne o le boleele jwa dikilometara di le 1,5 mme o ne o ralala bogare jwa Damaseko. Re kgona go bona mo setshwantshong se se gabilweng sa lekgolo la bo19 la dingwaga se se mo tsebeng eno gore mmila oo o ka tswa o ne o lebega jang mo metlheng ya bogologolo. Gongwe Ananiase o ne a tshwanelwa ke go senka ntlo ya ga Judase ka lobakanyana ka ntlha ya tsela e mmila oo o neng o dirilwe ka yone. Le fa go ntse jalo, Ananiase o ne a e bona, mme loeto lwa gagwe lo ne lwa felela ka gore Saulo a nne moaposetoloi Paulo, moreri yo o matlhagatlhaga wa dikgang tse di molemo.—Ditiro 9:12-19.

Jesu o ne a rometse barutwa ba gagwe mme a ba boleletse gore ba ‘batlisise gore ke mang yo o tshwanetseng’ dikgang tse di molemo. (Mathaio 10:11) Go lebega Ananiase a ne a ikisa ka boene go ya go senka Saulo. Jaaka Ananiase, Basupi ba ga Jehofa ba itumelela go batla ba ba tshwanetseng mme ba a ipela fa batho ba amogela dikgang tse di molemo tsa Bogosi. Go bona batho ba ba tshwanetseng go dira gore maiteko otlhe a ba a dirang a nne le mosola.—1 Bakorintha 15:58.

[Setshwantsho mo go tsebe 32]

‘Mmila o o bidiwang Tlhamalalo’ wa motlha wa gompieno

[Motswedi wa Setshwantsho mo go tsebe 32]

Go tswa mo bukeng ya La Tierra Santa, Bolumo II, 1830