Ga se Go Tshameka Fela

BANA ba rata go tshameka. Mme buka ya The Developing Child ya re: “Seno ga se tiro e e sa reng sepe kgotsa e e se nang mosola. Go lebega seno se godisa bokgoni jwa bone jwa go ithuta.” Ka go tshameka, bana ba ithuta go dirisa ditemosi tsa bone, go tlhaloganya tikologo ya bone le go dira dilo le bana ba bangwe.

Fa bana ba na le dingwaga di le nnè kgotsa di le tlhano, ba tla simolola go tshameka ka go etsa dilo tse bagolo ba di dirang. Jesu o kile a bua ka bana ba tshameka. Bangwe ba ne ba batla go tshameka ba dirile “lenyalo,” ba bangwe ba ne ba batla go tshameka ba le mo “phitlhong” mme, jaaka bana ba rata go ngangisana, ba ne ba ngangisana ka gore bangwe ba ne ba sa batle go tshameka. (Mathaio 11:16, 17) Metshameko e e ntseng jalo e gatelela mo ngwaneng yo o ntseng a gola dilo tse di botlhokwa thata mo botshelong.

Bana ba ba mo ditshwantshong tse di mo tsebeng eno ba tshameka e le morutisi wa Baebele le moithuti. Ga ba a tshwara thuto ya Baebele ya mmatota, mme go bonala sentle gore ba akantse ka kgang ya go bolelela ba bangwe molaetsa wa Baebele. Mme thuto eno e botlhokwa ka gonne Jesu o ne a laela balatedi botlhe ba gagwe gore ba dire barutwa mme ba rute batho go boloka dilo tsotlhe tse a di ba rutileng.—Mathaio 28:19, 20.

Batsadi ba bana ba bone ba ratang go dira e kete ba tshwere dithuto tsa Baebele, ba neetse dipuo kgotsa ba rera ka ntlo le ntlo, ba tshwanetse go itumela. Ka tlwaelo bana ba dira se ba bonang bagolo ba ba nang le bone ba se dira. Metshameko ya bana ya Baebele ke sesupo sa gore ba godisiwa ka “mofuta wa thuto le kgakololo tse Morena a di amogelang.”—Baefeso 6:4, ­Charles B. Williams.

Jehofa o batla gore bana ba nne le seabe mo kobamelong ya boammaaruri. O ne a raya Moshe a re a akaretse le “ba bannye” fa go ne go balwa Molao. (Duteronome 31:12) Fa bana le bone ba ikutlwa ba akarediwa, ba tla bontsha seo mo metshamekong ya bone. Mme ngwana yo o tshamekang a le modiredi wa Modimo o bontsha gore o isa koo.