Thanolo e “Ntle ka Tsela e e Tlhomologileng”

GO FOPHOLETSWA gore magareng ga dingwaga tsa 1952 le 1990 go gatisitswe mo e ka nnang dithanolo di le 55 tse disha tsa Dikwalo Tsa Bokeresete Tsa Segerika ka Seesemane. Ditshwetso tse baranodi ba itirelang tsone malebana le gore ba ranole jang mafoko mangwe di dira gore thanolo nngwe le nngwe e bue se se farologaneng le se se buiwang ke e nngwe. Jason BeDuhn, yo e leng porofesa yo o ithutang dilo tsa bodumedi kwa Yunibesithing ya Northern Arizona, kwa Flagstaff, Arizona, kwa U.S.A., o ne a batla go bona gore a dithanolo tseno di utlwala sentle, mme o ne a sekaseka a ba a bapisa dithanolo di le robedi tse di itsegeng thata, go akaretsa le Thanolo ya Lefatshe le Lesha ya Dikwalo Tse di Boitshepo, e e gatisitsweng ke Basupi ba ga Jehofa. O ne a fitlhelang?

Lefa gone BeDuhn a ne a belaela tsela e mafoko mangwe a ranotsweng ka yone, o ne a bitsa Thanolo ya Lefatshe le Lesha a re ke thanolo “e ntle ka tsela e e tlhomologileng,” “e e botoka fela thata” le “e ka metlha ke e fitlhetseng e le molemo” go gaisa tse dingwe tse a di tlhatlhobileng. BeDuhn o ne a konela ka gore ka kakaretso Thanolo ya Lefatshe le Lesha (ya Seesemane) “ke nngwe ya dithanolo tsa Seesemane tsa Tesetamente e Ntšha tse di boammaaruri go gaisa tsotlhe tse di leng teng” e bile “ke yone e e boammaaruri go gaisa tsotlhe tse ke di tlhatlhobileng.”—Truth in Translation: Accuracy and Bias in English Translations of the New Testament.

BeDuhn o ne a tlhalosa gape gore baranodi ba le bantsi ba ne ba ikutlwa ba patelesega “go tlhalosa kgotsa go oketsa se Baebele e se buang gore e dumalane le se babadi ba gompieno ba batlang kgotsa ba eletsang gore e se bue.” Mme Thanolo ya Lefatshe le Lesha yone e ne e sa tshwane le tsone, go rialo BeDuhn, ka gonne “thanolo ya NW e boammaaruri thata e re ka e ranola lefoko ka lefoko le ka kelotlhoko fa e ranola mafoko a ntlhantlha a bakwadi ba Tesetamente e Ntšha.”

Jaaka fa Komiti ya Thanolo ya Baebele ya Lefatshe le Lesha e tlhalosa mo ketapeleng ya thanolo eno ya bone, “ke boikarabelo jo bogolo thata” go ranola Dikwalo tse di Boitshepo go tswa mo dipuong tsa tsone tsa kwa tshimologong o di ranolela mo puong ya segompieno. Komiti eno e tswelela pele jaana: “Baranodi ba tiro eno, ba ba boifang e bile ba rata Modimo yo e leng Mokwadi wa Dikwalo Tse di Boitshepo, ba ikutlwa ba ikarabelela ka tsela e e kgethegileng mo go Ene gore ba fetise dikakanyo le dipolelo tsa gagwe ka tsela e e tshwanetseng ka mo go kgonegang ka teng.”

Fa e sale e gatisiwa lekgetlho la ntlha ka 1961, Thanolo ya Lefatshe le Lesha ya Dikwalo Tse di Boitshepo e ile ya ranolelwa mo dipuong di le 32 le tse 2 tsa Mokwalo wa Difofu. Dikwalo Tsa Bokeresete Tsa Segerika tsa Thanolo ya Lefatshe le Lesha, kgotsa “Tesetamente e Ntšha,” di ranoletswe mo dipuong tse dingwe di le 18 le e le nngwe ya Mokwalo wa Difofu. Re go kgothaletsa gore o bale Lefoko la Modimo o dirisa thanolo eno ya segompieno “e ntle ka tsela e e tlhomologileng,” e go ka diregang gore e bo e le gone ka puo ya gaeno.